ދިވެހިރާއްޖޭގެ ޤައުމީ ޔުނިވަރސިޓީގެ ބިޒްނަސް ސްކޫލްގެ ގޮފި ބިޒްނަސް ސްކޫލް ސްޓޫޑަންޓް އެސޯސިއޭޝަނާއި، ސެންޓަރ ފޮރ ފައުންޑޭޝަން ސްޓަޑީޒްގެ ގޮފި ތަރަހައާ ގުޅިގެން ގޮނޑުދޮށް ސާފުކުރުމުގެ ހަރަކާތެއް ބާއްވައިފި އެވެ.
މިއަދު ހަވީރު ހެންވޭރު އާޓިފިޝަލް ބީޗު ސަރަހައްދުގައި ކުރިއަށް ގެންދިޔަ މި ހަރަކާތުގައި ދެ ގޮފީގެ އިސްވާރުން ވަނީ ބައިވެރިވެފައެވެ. އިޖުތިމާޢީ މަސައްކަތެއްގެ ގޮތުގައި ދެ ވިންގުން ގުޅިގެން ކުރިއަށް ގެންދިޔަ މި މަސައްކަތުގައި 18 ކޮތަޅުގެ ކުނި ވަނީ އެ ސަރަހައްދުން ނަގާފައެވެ.
މި ހަރަކާތާ ގުޅިގެން ބީއެސްއެސްއޭގެ ރައީސް މިޝަލް މޫސާ ވިދާޅުވީ، މިފަދަ ހަރަކާތްތަކުގައި ދަރިވަރުންގެ ބައިވެރިވުން ލިބޭތީ ވަރަށް އުފާވާކަމަށެވެ. އަދި އުންމީދަކީ ކުރިއަށް އޮތް ތަނުގައިވެސް ދެ ގޮފިން ގުޅިގެން މިފަދަ ހަރަކާތްތައް ހިންގާލުން ކަމަށެވެ.
ބީއެސްއެސްއޭއާއި ތަރަހަ ގުޅިގެން މި ހިނގާ އޮކްޓޯބަރުމަހުގެ ފަހުކޮޅު ފުޓްސަލް މުބާރާތެއްވެސް ބޭއްވުމަށް ވަނީ ނިންމާފައެވެ. މި މުބާރާތުގައި ދެ ގޮފީގެ ދަރިވަރުންނަށްވެސް ބައިވެރިވެވޭއިރު، މިއީ ދަރިވަރުންގެ ކުޅިވަރުގެ ހުނަރުތައް ދައްކާލުމަށް ހޯދައިދެވޭ ފަހި ފުރުސަތެއްގެ ގޮތުގައި ދެ ގޮފިން ދެކެއެވެ.
