އެމް.އެން.ޔޫ ބިޒްނަސް ސްކޫލް ސްޓޫޑަންޓް އެސޯސިއޭޝަނާއި ތަރަހަ ގުޅިގެން ބާއްވާ ފުޓްސަލް މުބާރާތް ފަށައިފި އެވެ.
އިއްޔެ ހެނދުނު އެފް.އޭ.އެމް ޓާފްގައި ފެށި މި މުބާރާތަކީ އެމް.އެން.ޔޫ ބިޒްނަސް ސްކޫލުގެ ގޮފި ބީއެސްއެސްއޭ އާއި ސެންޓަރ ފޮރ ފައުންޑޭޝަން ސްޓަޑީޒްގެ ގޮފި ތަރަހަ ގުޅިގެން ބާއްވާ ފުޓްސަލް މުބާރާތެކެވެ.
ދެ ޑިވިޜަނަކަށް ބަހާލައިގެން ކުރިއަށް ގެންދާ މި މުބާރާތުގައި އިއްޔެ ހެނދުނުގެ ސެޝަނުގައި އަންހެން ޑިވިޜަނުގެ 2 މެޗު އަދި ފިރިހެން ޑިވިޜަންގެ 6 މެޗު ވަނީ ކުޅެފައެވެ. އެގޮތުން އަންހެން ޑިވިޜަނުގެ މެޗުތަކުން އެރީ ކެޓީ ގާލްސް އާއި ޓީމް ވީ ވަނީ މޮޅުވެފައެވެ. އެރީ ކެޓީ ގާލްސް ހޮޓް ޝޮޓްސް ކުޅުނު މެޗުން މޮޅުވެފައިވަނީ 3-0ގެ ނަތީޖާއަކުންނެވެ. އަދި ޓީމް ވީ މޮޅުވެފައިވަނީ ހޮޓް ޝޮޓްސް އާ ވާދަކޮށް 5-1ގެ ނަތީޖާއަކުންނެވެ.
ފިރިހެން ޑިވިޜަނުގެ 6 މެޗުގެ ނަތީޖާއަށް ބަލާލާއިރު އެފް.ސީ 24 ކުޅުނު ދެ މެޗުން ވަނީ މޮޅުވެފައެވެ. އަދި މަޑުފެހި ޓީމުންވެސް ވަނީ ކުޅުނު ދެ މެޗުވެސް ކާމިޔާބުކޮށްފައެވެ. މީގެ އިތުރުން ކަރާ އެފް.ސީ އާއި އެސްޕަޑާ ވަނީ އަނެއް ދެ މެޗުން މޮޅުވެފައެވެ.
ބީ.އެސް.އެސް.އޭ – ތަރަހަ ފުޓްސަލް މުބާރާތް ކުރިއަށް ގެންދިއުމުގެ މަޤުސަދަކީ ދަރިވަރުންގެ ހުނަރުތައް ކުރިއެރުވުމުގެ މަންސައެއް ފަހިކުރުމެވެ. މި މުބާރާތުގައި 12 ޓީމަކުން ވަނީ ބައިވެރިވެފައިވާއިރު، މުބާރާތް ކުރިއަށް ގެންދަނީ ދެ ޑިވިޜަނަކަށް ބަހާލައިގެންނެވެ. އަންހެން ޑިވިޝަނުގައި ތިން ޓީމު އަދި ފިރިހެން ޑިވިޝަނުގައި ނުވަ ޓީމު ވަނީ ބައިވެރިވެފައެވެ.
ބީއެސްއެސްއޭ އަކީ އެމް.އެން.ޔޫ ބިޒްނަސް ސްކޫލުގައި ގާއިމުކުރެވިފައިވާ ގޮތްޕެވެ. އަދި ތަރަހަ އަކީ ސެންޓަރ ފޮރ ފައުންޑޭޝަން ސްޓަޑީޒްގައި ގާއިމުކުރެވިފައިވާ ގޮތްޕެވެ.
