ބިޒްނަސް ސުކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އިން ކުރިން އަހަރުތަކެކޭ އެއްފަދައިން މިއަހަރުގެ ރަމަޟާން މަހުގައިވެސް ކުރިއަށްގެންދާ އެމް.އެން.ޔޫ.އެސް.ޔޫ – ބީ.އެސް.އެސް.އޭ ފީފާ މުބާރާތް ފަށައިފިއެވެ.
މި މުބާރާތުގައި ބައިވެރިވުމަށް ހުޅުވާލި ފުރުސަތުގައި ގިނަ ދަރިވަރުންތަކެއް ވަނީ ބައިވެރިވެފައެވެ. މިއަހަރުގައި މިބޭއްވޭ މުބާރާތަކީ، އެމް.އެން.ޔޫ.އެސް.ޔޫ ބީ.އެސް.އެސް.އޭ ފީފާ ޓޯނަމެންޓް ނަމުގައި ބޭއްވޭ 03 ވަނަ މުބާރާތެވެ.
އެމް.އެން.ޔޫގެ ހުރިހާ ދަރިވަރުންނަށް ބައިވެރިވުމުގެ ފުރުސަތު ހުޅުވާލައިގެން ކުރިއަށްގެންދާ މި މުބާރާތުގައި މިއަހަރުގައިވެސް 02 ޑިވިސަން އަކަށް ކުޅެވިގެންދާނެއެވެ. އެއީ، ފިރިހެން ޑިވިސަން އާއި އަންހެން ޑިވިސަންއެވެ. އަދި މީގެ އިތުރުން މިއަހަރުގެ މުބާރާތުގައި މުޅިން އަލަށް ޓީމް އިވެންޓެއް ކުރިޔަށް ދާނެއެވެ. މިއިވެންޓްއަކީ މާލެ ސަރަހައްދުގެ ކޮންމެ ފެކަލްޓީއަކުން އެއް ޓީމަށް ބައިވެރި ވުމުގެ ފުރުސަތު ހުޅުވައިލައިގެން ކުރިޔަށް ގެންދާ ބުރެކެވެ.
މި މުބާރާތުގައި ކޮންމެ ޑިވިޝަނަކުން އެއްވަނަ، ދެވަނަ އަދި ތިންވަނަ ހޮވުމަށް ހަމަޖެހިފައިވާއިރު، ޓީމް އިވެންޓް ބައިންވެސް އެއްވަނަ، ދެވަނަ އަދި ތިންވަނަ ހޮވިގެންދާނެއެވެ.
އެމް.އެން.ޔޫ.އެސް.ޔޫ – ބީ.އެސް.އެސް.އޭ ފީފާ މުބާރާތަކީ 2019 ވަނަ އަހަރުން ފެށިގެން ގިނަ ދަރިވަރުންގެ ތަރުހީބާއެކު ފޯރިގަދަކޮށް ބާއްވަމުން އަންނަ މުބާރާތެކެވެ.
