ދިވެހިރާއްޖޭގެ ޤައުމީ ޔުނިވާރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން މި އަހަރު ކުރިއަށް ގެންދިޔަ އިންޓާރ-ފެކަލްޓީ ވޮލީބޯޅަ މުބާރާތުން އެމް.އެން.ޔޫ ބިޒްނަސް ސްކޫލް(އެމް.އެން.ޔޫ.ބީ.އެސް) އަށް ލިބުނު ކާމިޔާބީތައް ފާހަގަކޮށްފިއެވެ.
އެމް.އެން.ޔޫ.ބީ.އެސްގެ ޓީމުން ވަނީ ފިރިހެން ޑިވިޝަން ކާމިޔާބުކޮށް ، އަންހެން ޑިވިޝަންގެ 2ވަނަ ޙާސިލުކޮށްފައެވެ. އެހެންކަމުން ، މި 2 ޓީމު ހޯދި ކާމިޔާބީ ފާހަގަކުރުމަށް ޓަކައި ، އެމް.އެން.ޔޫ ބިޒްނަސް ސްކޫލުން ވަނީ މަރުޙަބާ ކިޔުމުގެ ޙަފްލާއެއް ބާއްވާފައެވެ.
އެމް.އެން.ޔޫ ބިޒްނަސް ސްކޫލްގެ އޮޑިޓޯރިއަމްގައި މެއި 13 އަށް ވީ އާދީއްތަ ދުވަހު ބޭއްވުނު މި ޙަފްލާ ޝަރަފުވެރި ކޮށްދެއްވީ އެމް.އެން.ޔޫ ބިޒްނަސް ސްކޫލްގެ އެކްޓިންގް ޑީން ލީޒާ މިސްއެވެ. ލީޒާ މިސްވަނީ ދެ ޓީމުގެ ހުރިހާ ކުޅުންތެރިންނާއި، އޮފިޝަލުން އަދި ކޯޗުންގެ އިތުރުން ބީ.އެސް.އެސް.އޭ ހިންގާ ކޮމެޓީގެ މެމްބަރުންނާއި ސަޕޯޓަރުން ކުރެއްވި ބުރަ މަސައްކަތަށް ތަޢުރީފު ކޮށްފައެވެ. އަދި ލީޒާ މިސްގެ ނަޒަރުގައި 2 ޓީމަކީ ވެސް މުބާރާތް ކާމިޔާބު ކޮށްފައިވާ 2 ޓީމް ކަމުގައި ދެކޭކަމަށް ފާހަގަކޮށްފައެވެ.
ކާމިޔާބީ އާއި ގުޅޭގޮތުން ވާހަކަ ދައްކަމުން ބީ.އެސް.އެސް.އޭގެ ރައީސް ނަޝާޔާ މުޙައްމަދު ނިޒާމް ވަނީ 2 ޓީމުން ވެސް ހޯދި ކާމިޔާބީ ފާހަގަކޮށް 2 ޓީމު ކުރި ހިތްވަރަށް ތަޢުރީފް ކޮށްފައެވެ. ހަމަ އެހެންމެ ، ލީޒާ މިސް އާއި އެމް.އެން.ޔޫ.ބީ.އެސްގެ މެނޭޖްމެންޓް ، އަދި މި 2 ޓީމަށް އެހީތެރިވި ފަރާތްތަކަށް ޝުކުރު އަދާކޮށްފައެވެ.
މި ޙަފްލާ ނިމިގެން ދިޔައީ އެމް.އެން.ޔޫ.ބީ.އެސް އަށް ލިބުނު ކާމިޔާބީ ފާހަގަކުރުމަށް ތައްޔާރުކޮށްފައިވާ ކޭކު ފެޅުމާއިއެކު ، އެމް.އެން.ޔޫ.ބީ.އެސްގެ މެނޭޖްމެންޓުން ތައްޔާރުކޮށްފައިވާ ސަޔަކާއި އެކުގައެވެ.
މި މުބާރާތުގެ އެންމެ ކާމިޔާބު އެއް ފެކަލްޓީގެ ގޮތުގައި ފާހަގަކުރެވިފައިވާ އެމް.އެން.ޔޫ ބިޒްނަސް ސްކޫލަކީ މިމުބާރާތުގެ 2 ޑިވިޝަންގެ ވެސް ފައިނަލް މެޗުގައި ވާދަކޮށްފައިވާ ހަމަ އެކަނި ޓީމެވެ. އަދި އެމް.އެން.ޔޫ.ބީ.އެސް ގެ ފިރިހެން ޓީމު ވަނީ މި މުބާރާތުގެ ޗެމްޕިއަންކަން ފުރުތަމަ ފަހަރަށް ނަގާފައެވެ.
