ދުނިޔޭގެ ޑައުން ސިންޑްރޯމް ދުވަސް ފާހަގަކުރުމުގެ ގޮތުން އެމް.އެން.ޔޫ އެސް.ޔޫގެ ދޮންދީނި ގޮފިންވަނީ ޝަރަފުއްދީން ސްކޫލުގެ ސެން ކުލާހަށް ހަދިޔާކުރުމުގެ ގޮތުން ފަންޑް ރެއިޒަރއެއް ކުރިއަށްގެންގޮސްފައެވެ.
21 މާރޗްވީ ބުދަ ދުވަހުގެ ހަވީރު 16:30 އިން ރޭގަނޑު 20:00 އަށް ކުރިއަށްގެންދިޔަ މިހަރަކާތުގައި ވަނީ ފަންޑް ހޯދުމުގެގޮތުން ކަޕްކޭކް ވިއްކާފައެވެ. މީގެ އިތުރުން ބޮޑު ކަޕްކޭކެއް ވަނީ ބިޑަށް ހުޅުވާލާފައެވެ. ދޮންދީނި ގޮފިންވަނީ މިހަރަކާތް އިތުރަށް ފުރިހަމަ ކުރުމުގެ ގޮތުން، ހޭންޑް ޕްރިންޓް ބެނަރއެއް ހެދުމުގެ އިންތިޒާމުވެސް ސްޓޯލް ސަރަހައްދުގައި ހަމަޖައްސާފައެވެ. މިގޮތުން ވަޑައިގަންނަވާ ކޮންމެ ބޭފުޅަކަށް ވެސް މިބެނަރގައި ހޭންޑް ޕްރިންޓް ޖެހުމުގެ ފުރުސަތު އޮތީ ހުޅުވާލާފައެވެ.
މިހަރަކާތް ފެށިގެންދިޔައީ ޝަރަފުއްދީން ސްކޫލްގެ ސްޕެޝަލް އެޑިއުކޭޝަނަލް ނީޑްސް (ސެން) ކުލާހުގެ ދަރިވަރުން ބެނަރގައި ހޭންޑް ޕްރިންޓް ޖެހުމަށްފަހު، ބިޑަށް ހުޅުވާލި ކަޕްކޭކުގައި އައިސިންގ ޖެހުމުންނެވެ. މިހަރަކާތުން ޖުމްލަ -/7850 ރުފިޔާ ލިބިފައިވާއިރު، މިފައިސާ ވަނީ އިއްޔެ ޝަރަފުއްދީން ސްކޫލާއި ހަވާލުކޮށްފައެވެ. މީގެ އިތުރުން ބިޑްކުރެވުނު ކަޕްކޭކް ކާމިޔާބު ކުރި ޔާމިން ހަސަން މާހިރު ވަނީ އެ ކޭކު ސެން ކުލާހަށް ހަދިޔާ ކޮށްފައެވެ. މި ހަރަކާތުގައި ހެދުނު ބެނަރ އެމް.އެން.ޔޫގެ ހިތަދޫ ކެމްޕަހުގައި އެއް ހަފްތާ ވަންދެން ޑިސްޕްލޭ ކުރެވިފައި ހުންނާނެއެވެ.
ކޮންމެ އަހަރެއްގެ މާރޗް 21 ވަނަ ދުވަހަކީ ދުނިޔޭގެ ފެންވަރުގައި ޑައުން ސިންޑްރޯމަށް ހޭލުންތެރި ކުރުމުގެ ގޮތުން ފާހަގަ ކުރާ ދުނިޔޭގެ ޑައުން ސިންޑްރޯމް ދުވަހެވެ.
