އެމް.އެން.ޔޫ.އެސް.ޔޫގެ ސ.ހިތަދޫ ކެމްޕަހުގެ ގޮފި، ”ދޮންދީނި“ އަށް 2020ވަނަ އަހަރު އިންތިޙާބުވި މެމްބަރުންނަށް މަޤާމުގެ ލިޔުން ހަވާލުކޮށްފިއެވެ.
ދޮންދީނި ގޮފި އިފްތިތާޙު ކޮށްފައިވަނީ ފެބްރުއަރީ 29ވަނަ ދުވަހުގެރޭ އެމް.އެން.ޔޫ ހިތަދޫ ކެމްޕަހުގައި ބޭއްވުނު ޚާއްސަ ރަސްމިއްޔާތެއްގައެވެ. މިރަސްމިއްޔާތުގައި އެމް.އެން.ޔޫ.އެސް.ޔޫގެ ރައީސް އަލީ ޝަމްޢޫން ބައިވެރިވެފައިވާއިރު، ހިންގާ ކޮމިޓީގެ މަޤާމް ހަވާލުކުރުމުގެ ރަސްމިއްޔާތު ޝަރަފްވެރިކޮށްދެއްވާފައިވަނީ ސަދާން ކޮމިއުނިޓީ އެމްޕަވަރމެންޓްގެ، ޑައިރެކްޓަރ އޮފް ފައިނޭންސް، އަޙްމަދު ހިސާމްއެވެ.
ހިންގާކޮމިޓީގެ މެމްބަރުންނަށް މަޤާމް ހަވާލުކުރުމުގެ އިތުރުން ޝަރަފުވެރި މެޙްމާނު ވަނީ ރަސްމިއްޔާތުގައި ވާހަކަފުޅު ދައްކަވާފައެވެ. ހަމައެހެންމެ، އެމް.އެން.ޔޫ.އެސް.ޔޫގެ ރައީސްގެ އިތުރުން ދޮންދީނި ގޮފީގެ ރައީސްކަމަށް އިންތިޚާބުވި ޠާއިފް މަޖީދް ވަނީ ވާހަކަފުޅު ދައްކަވާފައެވެ.
2020 ވަނަ އަހަރު ދޮންދީނި ގޮފީގެ 4 މަޤާމެއް އިންތިޚާބަކަށްގޮސްފައިވާއިރު، ވޯޓުލުންއޮތީ 2020 ފެބުރުވަރީ 28ވީ ހުކުރު ދުވަހުގައެވެ. ހަމައެހެންމެ، ދޮންދީނިއަކީ މިއަހަރުގެ އެމް.އެން.ޔޫ.އެސް.ޔޫގެ އަތޮޅުތެރޭ ކެމްޕަސްތަކުން އިފްތިތާޙުވި ފުރަތަމަ ގޮތްޕެވެ.
އެމް.އެން.ޔޫ ހިތަދޫ ކެމްޕަހުގައި އެމް.އެން.ޔޫ.އެސް.ޔޫގެ ގޮތްޕެއް ޤާއިމް ކުރެވިފައިވަނީ 2018ވަނަ އަހަރުގައެވެ.
ލިޔުނީ: އައިމިނަތު ހަމީޒާ އަޙްމަދު،
ސެކްރެޓަރީ، އެމް.އެން.ޔޫ.އެސް.ޔޫ
