ދިވެހިރާއްޖޭގެ ޤައުމީ ޔުނިވަރސިޓީގެ ހިތަދޫ ކެމްޕަހާ އަލަށް ގުޅުނު ދަރިވަރުންނަށް ޚާއްސަކޮށްގެން ފްރެޝާސް ނައިޓް ބާއްވައިފި އެވެ.
މާރިޗު މަހުގެ 5 ވަނަ ދުވަހުގެ ރޭ އެމް.އެން.ޔޫ ހިތަދޫ ކެމްޕަހުގައި ބޭއްވި މި އިވެންޓުގައި ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ.މުޙައްމަދު ޝަރީފު ވަނީ ބައިވެރިވެވަޑައިގަންނަވާފައެވެ.
މީގެއިތުރުން، އެމް.އެން.ޔޫ.އެސް.ޔޫގެ ކުރީގެ ރައީސް އަރުޝަދު އަޝްރަފް އާއި، އެމް.އެން.ޔޫ.އެސް.ޔޫގެ ކުރީގެ އެސިސްޓެންޓް ސެކްރެޓަރީ އައިޝަތު އީފާ އާއި، އެމް.އެން.ޔޫ.އެސް.ޔޫގެ ކުރީގެ ސެކެރެޓަރީ ފާތިމަތު ނަޝާތު ވަހީދު އަދި ހިތަދޫ ކެމްޕަހުގެ މެނޭޖަރު އިދުހާމް ފަހުމީވެސް ވަނީ ބައިވެރިވެވަޑައިގަންނަވާފައެވެ.
ހިތަދޫ ކެމްޕަހުގެ ގްރައުންޑުގައި ބޭއްވި މި އިވެންޓުގައި ކުޅިވަރުގެ ގިނަ ހަރަކާތްތަކެއް ކުރިއަށް ގެންގޮސްފައިވާއިރު، ކެމްޕަހުގެ ތަޢާރަފަކާއި އެމް.އެން.ޔޫ.އެސް.ޔޫގެ ހިތަދޫ ކެމްޕަހުގެ ގޮފި ”ދޮންދީނި“ގެ ހިންގާ ކޮމިޓީގެ ތަޢާރަފެއް ދަރިވަރުންނަށް ވާނީ ދީފައެވެ.
މި އިވެންޓުގައި ކުރިއަށް ގެންދިޔަ ހަރަކާތްތަކުގެ ތެރޭގައި މިއުޒިކަލް ޗެއަރ އާއި، އިރުޝާދު މުބާރާތާއި، ޕާނީ ޕޫރީ ކެއުމުގެ މުބާރާތެއް ވަނީ ކުރިއަށް ގެންގޮސްފައެވެ.
މި މުބާރާތްތަކުން އެއްވަނައަށް ދިޔަ ބައިވެރިންނަށް އިނާމު ދީފައިވާއިރު، ޕާނީ ޕޫރީ މުބާރާތުގައި ވައިސް ޗާންސެލަރާއި، ހިތަދޫ ކެމްޕަހުގެ ބައެއް ބޭފުޅުން ވަނީ ބައިވެރިވެވަޑައިގަންނަވާފައެވެ.
މި އިވެންޓުގައި އެމް.އެން.ޔޫ.އެސް.ޔޫގެ ކުރީގެ ރައީސް އަރުޝަދު އަޝްރަފު ވަނީ ދަރިވަރުންނާ މުޚާޠަބުކޮށް ވާހަކަފުޅުދައްކަވާފައެވެ. މީގެއިތުރުން، ވައިސް ޗާންސެލަރާއި، ކެމްޕަސް މެނޭޖަރުވެސް ވަނީ ދަރިވަރުންނާ ވާހަކަފުޅުދައްކަވާފައެވެ.
ފްރެޝާސް ނައިޓް އިވެންޓް ނިންމައިލީ ވައިސް ޗާންސެލަރ ޑރ.މުޙައްމަދު ޝަރީފު، ދަރިވަރުންގެ ޚިޔާލުތަކާއި އެހެނިހެން ވާހަކަތައް ހިއްސާކުރެއްވުމަށް ކުޑަ ވަގުތުކޮޅަކާއެކުގައެވެ.
