ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އެމް.އެން.ޔޫ ހިތަދޫ ކެމްޕަހުގައި ޤާއިމުކޮށްފައިވާ ގޮފި، ދޮންދީނިގެ އައު ހިންގާ ކޮމިޓީ އިފްތިތާހުކުރި ރަސްމިއްޔާތުގައި ޔޫނިއަންގެ ރައީސް ޙުސައިން ޒައިދު އަދި އެޑްވައިޒަރީ ބޯޑުގެ މެންބަރު އަރުޝަދު އަޝްރަފް ބައިވެރިވެލައްވައިފިއެވެ.
މިކަމަށް ޚާއްސަކޮށް ހިތަދޫ ކެމްޕަހުގައި ބޭއްވި ރަސްމިއްޔާތެއްގައި ހިންގާ ކޮމިޓީ އިފްތިތާހުކުރީ މާރިޗު 10 ވީ ހުކުރުދުވަހުގެ ރެޔެވެ. މި ރަސްމިއްޔާތު ޝަރަފުވެރިކޮށްދެއްވާފައިވަނީ ނޭޝަނަލް ކޮލެޖު އޮފް ޕޮލިސިންގ އެންޑް ލޯ އެންފޯސްމެންޓުގެ ހެޑް، ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާނެވެ. ރަސްމިއްޔާތުގައި ވާހަކަ ދައްކަވަމުން ޝިފާން ފާހަގަކުރެއްވި ގޮތުގައި ޕޮލިސް ކޮލެޖުގެ ދޮރު އެމް.އެން.ޔޫ ކުދިންނަށް އަބަދުވެސް އޮންނާނީ ހުޅުވިފައެވެ. މީގެ އިތުރުން ރައީސް ޒައިދުގެ ވާހަކައިގައި ދޮންދީނި ގޮފީގެ ތާރީޚަށް އަލިއަޅުވާލާފައިވާއިރު، ކެމްޕަހުގެ ދަރިވަރުންގެ އެއްބާރުލުން ހިންގާ ކޮމިޓީ މެންބަރުންނަށް ދެއްވުމަށް ވަނީ އިލްތިމާސް ކުރައްވާފައެވެ.
މި ރަސްމިއްޔާތުގައި ހިތަދޫ ކެމްޕަސް މެނޭޖަރު އިދުހާމް ފަހުމީގެ އިތުރުން ދޮންދީނިގެ ކުރީގެ ރައީސް ޠާއިފް މަޖީދުވެސް ވަނީ ބައިވެރިވެލައްވާފައެވެ.
މިފަހަރު މި އިފްތިތާހު ކުރެވުނީ ދޮންދީނިގެ 5 ވަނަ ދައުރެވެ. ދޮންދީނި އުފެދިފައިވަނީ 2018 ވަނަ އަހަރެވެ.
