ދިވެހިރާއްޖޭގެ ޤައުމީ ޔުނިވާރސިޓިގެ ދަރިވަރުންގެ ޔޫނިއަންގެ ދެ ގޮފިކަމަށްވާ ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ) އަދި ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) ގުޅިގެން މާހެފުމެއް ބާއްވައިފިއެވެ. 15 މެއި 2018 ވީ އަންގާރަ ދުވަހުގެރޭ 08:30ގައި ފެކަލްޓީ އޮފް އެޑިއުކޭޝަންގެ ގޯތިތެރޭގައި ބޭއްވުނު މި މާހެފުމުގައި ދިވެހިރާއްޖޭގެ ޤައުމީ ޔުނިވާރސިޓިގެ ޑެޕިއުޓި ވައިސް ޗާންސެލާރ އަލްފާޟިލާ އާއިޝަތު ޝާހީން، ޑެޕިއުޓީ ވައިސް ޗާންސެލާރ ޑރ. މުއާވިއަތު މުޙައްމަދު އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު ބައިވެރިވެލެއްވިއެވެ. އަދި ފެކަލްޓީ އޮފް އެޑިއުކޭޝަންގެ ކުރީގެ ޑިރެކްޓަރ ޖެނެރަލް ރަޝީދު ސަރގެ އިތުރުން އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް، ނައިބުރައީސް (ގޮފިތައް) އަލީ ޝަމްއޫން، ނައިބުރައީސް (ޢިލްމީ) އާދަމް ރުޝްދީ، ހަޒާންދާރު އަބްދުﷲ ޝަހުނީޒް، މީޑިއާ ކޯޑިނޭޓަރ މުޙައްމަދު ޝާން އާމިރު އަދި ސެކްރެޓަރީ އަނާ އަޙްމަދު ބައިވެރިވެލެއްވިއެވެ. އަދި ޕާކިސްތާން ޔުނިވަރސިޓީ އަކުން ވަޑަިގެންދެއްވި ހަތަރު މެހެމާނަކު ވެސް މި އަހަރުގެ މާހެފުގައި ބައިވެރިވެލެއްވިއެވެ.
”މާހެފުން “ މި ހަރަކާތަކީ ކޮންމެ އަހަރަކުވެސް ފެކަލްޓީ އޮފް އެޑިއުކޭޝަންގެ ދަރިވަރުން ވަރަށް ކުލަގަދަ ކޮށް ފާހަގަ ކުރަމުން އަންނަ ހަރަކާތަކަށް ވާއިރު މިއަހަރު ގެ މާހެފުން އިތުރަށް ކުލަގަދަ ވެގެން ގޮސްފައިމިވަނީ ބީ.އެސް.އެސް.އޭ ގެ އެއްބާރުލުން މިހަރަކާތަށް ލިބިގެންނެވެ . މި ހަރަކާތުގައި އެމް.އެން.ޔޫގެ ޑެޕިއުޓި ވައިސް ޗާންސެލާރ ޝާހީން މިސް އަދި މުއާވިއަތު ސަރ، ޑީން އޮފް ސްޓޫޑެންޓްސް ނާދިޔާ މިސް، އެފް.އީގެ ކުރީގެ ޑިރެކްޓަރ ޖެނެރަލް ރަޝީދު ސަރގެ އަދި އެމް.އެން.ޔޫ.އެސް.ޔޫގެ ރައީސް އަރުޝަދުވެސްވަނީ ވާހަކަފުޅު ދައްކަވާފައެވެ. ޝާހީން މިސް އަދި ނާދިޔާ މިސްގެ ވާހަކަފުޅުގައި، ގޮފިތަކުން ހަރަކާތްތައް ކުރިއަށް ގެންދިއުމުގައި އެއްގޮފި އަނެއްގޮތްޕާ ގުޅިގެން ހަރަކާތްތައް ހިންގުމަށް ހިތްވަރު ދެއްވާފައިވެއެވެ. މިގޮތައް އެއްގޮފި އަނެއް ގޮތްޕާއި ގުޅިގެން ހަރަކާތްތައް ހިންގުމަކީ ގޮފިތަކުގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމެއްކަމަށާއި އަދި ކުރިޔަށް ގެންދާ ހަރަކާތް ތަކުގެ ފެންވަރުވެސް ރަގަނޅުވާނެ ކަމަށް ވިދާޅުވެ އެކުވެރިކަން ބަދަހި ކުރުމަށް އެންމެހާ ދަރިވަރުންނަށް ހިއްވަރު ދެއްވާފައިވެއެވެ . އަދި އެކިގޮފިތަކުން ގުޅިގެން މަސައްކަތް ކުރުމަކީ ވަރަށް އުފާކުރާ ކަމެއްކަމަށްވެސް ޝާހީން މިސް އަދ ނާދިޔާ މިސްގެ ވާހަކަފުޅުގައި ވިދާޅުވިއެވެ.
މިސްމެންގެ ވާހަކަފުޅައްފަހު ދެން މިރަސްމިއްޔާތުގައި އޮތީ މިއަހަރު ފެކަލްޓީ އޮފް އެޑިއުކޭޝަން އިން ދަސްވެނިވާ ބެޗެލާރސް އޮފް ޓީޗިންގ ސެކެންޑްރީގެ ދަރިވަރުންނަށް، އެ ދަރިވަރުން ފެސާގެ ހަރަކާތްތަކަށް ދެއްވާ އެއްބާރުލުން ފާހަގަ ކޮށް ހަނދާނީ ސޭޝްއެއް އަޅުއްވައިދެއްވުމެވެ. މި ދަރިވަރުންނަށް ސޭޝް އަޅުއްވައިދެއްވީ އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. މުއާވިއަތު މުޙައްމަދެވެ. އަދި ރަސްމިއްޔާތުގެ ތެރެއިން މި ދަރިވަރުންނަށް ހާއްސަ ކޭކެއް ފެޅުއްވިއެވެ. މި ކޭކް ފަޅުއްވައިދެއްވީ ބެޗެލާރސް އޮފް ޓީޗިންގ ސެކެންޑްރީގެ އެންމެހާ ދަރިވަރުންނެވެ.އެހެން އަހަރުތަކެކޭވެސް އެއްފަދައިން މިއަހަރުގެ މާހެފުމުގައިވެސްވަނީ ކަރައެއް ފަޅާފައެވެ. މި ކަރާފަޅުއްވައިދެއްވީ ޕާކިސްތާން ޔުނިވަރސިޓީއަކުން ވަޑައިގެންދެއްވި ހަތަރު މެހެމާހުންނެވެ.
