މިރޭ ފެށުމަށް ހަމަޖެހިފައިވާ އެމް.އެން.ޔޫ.އެސް.ޔޫ ގެ އިންޓަރ ފެކަލްޓީ ވޮލީބޯޅަ މުބާރާތުގައި ބައިވެރިވާ ފެކަލްޓީ އޮފް އެޑިއުކޭޝަންގެ ދެ ޓީމުގެ މެމްބަރުންނަށް ޖަރޒީ ހަވާލުކޮށްދެއްވައިފިއެވެ. މިއަދު މެންދުރު ދޭއްޖެހި އިރު ފެކަލްޓީ އޮފް އެޑިއުކޭޝަންގައި ކުރިއަށް ގެންދިޔަ މި ރަސްމިއްޔާތުގައި ބައިވެރިންނާއި ޖާރޒީ ޙަވާލު ކޮށްދެއްވީ ފެކަލްޓީ އޮފް އެޑިއުކޭޝަންގެ ޑީން އަލްފާޟިލާ މަރިޔަމް ފިޒާނާ ރަޝީދާއި އެމް.އެން.ޔޫ.އެސް.ޔޫ ގެ ކުރީގެ ރައީސް އަދި ދަރިވަރުންގެ ކައުންސިލް މެންބަރު އަލްފާޟިލް އަލީ ރަޝީދެވެ. ފެކަލްޓީ އޮފް އެޑިއުކޭޝަންގެ ފަރާތުން މި މުބާރާތުގައި ބައިވެރިވުމަށް ހަމަޖެހިފައި ވަނީ އަންހެން ޓީމަކާއި ފިރިހެން ޓީމެކެވެ. މި ރަސްމިއްޔާތުގައި ޓީމުތަކުގެ އޮފިޝަލުންނަށް ވެސް ވަނީ އޮފިޝަލުންގެ ޓީޝާޓު ޙަވާލު ކޮށްދެއްވާފައެވެ.
މި ރަސްމިއްޔާތުގައި ފެކަލްޓީގެ ޑީން ވަނީ ބައިވެރިންނާއި މުޚާޠަބުކޮށް ވާހަކަފުޅު ދައްކަވާފައެވެ. ޑީންގެ ވާހަކަފުޅުގައި ކޮންމެ ކަމަކަށް ކުރިމަތިލި ކަމުގައި ވިޔަސް ކާމިޔާބީ އާއި ހަމައަށް ވާޞިލުވުމަށް މަސައްކަތް ކުރުމަށާއި ކާމިޔާބީ ހޯދުމަށްޓަކައި އަބަދުވެސް ނަމާދަށް ފަރުވާތެރިވުމަށާއި ގިނަގިނައިން ﷲގެ ޙަޟްރަތުގައި ދުޢާ ދެންނެވުމަށް ނަޞޭޙަތްތެރި ވެފައިވެއެވެ. ދަރިވަރުންގެ ކައުންސިލް މެންބަރު އަދި އެމް.އެން.ޔޫ.އެސް.ޔޫގެ ކުރީގެ ރައީސް ވެސް ވަނީ މި ރަސްމިއްޔާތުގައި ވާހަކަފުޅުދައްކަވާފައެވެ. އަލީ ރަޝީދުގެ ވާހަކަ ފުޅުގައި އެފް.އި އަށް ލިބިގެންދާ ކޮންމެ ކާމިޔާބީ އަކީވެސް އެބޭފުޅާގެ އަމިއްލަ ކާމިޔާބީއެއް ކަމުގެ އިހްޞާޞް ކުރެވޭ ކަމުގައި ވިދާޅުވެ ޓީމުތަކަށް ހިތްވަރު ދެއްވާފައި ވެއެވެ.
މި މުބާރާތަށް ތައްޔާރުވުމަށް ފެސާއާއި ޙަވާލުވެގެން ހުންނެވި ލެކްޗަރާރ އާދަމް ޒާހިރު އެކި ގޮތްގޮތުން ވެދެއްވި އެހީތެރިކަމަށް މި ފުރުޞަތުގައި ޝުކުރު ދަންނަވަމެވެ. މި މުބާރާތުގައި ވާދަކުރާ ފެކަލްޓީ އޮފް އެޑިއުކޭޝަންގެ ފިރިހެން ޓީމަށް ޖާރޒީ ހަދިޔާކުރެއްވި ގއ. މާމެންދުއަށް ނިޞްބަތްވާ ޖަމްޢިއްޔާ އެކަމުގައިވާ ސޮސައިޓީ ފޯރ މާމެންދޫ ސްޕޯޓްސް އަށް ވަރަށް ޚާއްސަ ޝުކުރެއް ދަންނަވަމެވެ.
ފެށުމަށް ވަގުތު ކުޑަތަންވަމުން ދާ ވޮލީބޯޅަ މުބާރާތުގައި ކުޅުމަށް ހަމަޖެހިފައިވާ ފެކަލްޓީ އޮފް އެޑިއުކޭޝަންގެ ދެ ޓީމަށްވެސް ކާމިޔާބު މުބާރާތަކަށް އެދެމެވެ. އެފް.އީ ގެ ޓީމުތައް ކުޅެން ހަމަޖެހިފައިވަނީ މާދަމާގެ ވަގުތުތަކުގައިކަން ވެސް ފާހަގަ ކޮށްލަމެވެ.
