ކޮންމެ އަހަރެއްގެ ވެސް 5 އޮކްޓޯބަރ އަކީ ބައިނަލްއަގުވާމީ ގޮތުން ފާހަގަ ކުރަމުން އަންނަ ޓީޗަރުންގެ ދުވަހެވެ. ހުރިހާ ދަރިވަރުންނާއި ޓީޗަރުންނަށްވެސް އަހަރުގައި އަންނަ އެންމެ މުނާސަބު ދުވަހަށް ތައްޔާރުވުމުގައި ފެކަލްޓީ އޮފް އެޑިއުކޭޝަންގެ ދަރިވަރުން ވަރަށް ފޯރީގައި މިއަހަރުވެސް ތައްޔާރުވާން ފަށައިފިއެވެ.
ފެކަލްޓީ އޮފް އެޑިއުކޭޝަންގައި މިވަގުތު ކިޔަވަމުންދާ ހުރިހާ ބެޗް ތަކުގެ ދަރިވަރުންނާއި ބައްދަލު ކޮށް މި ދުވަސް ފާހަގަ ކުރުމުގައި އެކުދިންގެ ޝައުގުވެރިކަމާއި ވިސްނުމާއި އެއްގޮތަށް ރާވާ ނިންމާފައިވަނީ 25 ސެޕްޓެމްބަރ ވަނަ ދުވަހު ފެކަލްޓީ އޮފް އެޑިއުކޭޝަންގެ B1.15 ކްލާސްރޫމްގައި ބޭއްވުނު މަޝްވަރާ ބައްދަލުވުމުގެ ތެރެއިންނެވެ.
ފެސާގެ ރައީސާ ދަރިވަރުންނާއި މުޚާތަބު ކުރައްވަމުން ވިދާޅުވެފައިވަނީ އަޅުގަނޑުމެންނަށްޓަކައި އެބައެއްގެ ވަގުތާއި ހަކަތަ ގުރުބާން ކުރަމުންދާ އަޅުގަނޑުމެންގެ ލޮބުވެތި ޓީޗަރުން ވަމުންދާ ގުރުބާނީގެ އަގު މިކަހަލަ އެންމެ ދުވަހަކުން ވަޒަން ނުކުރެވޭނެކަމީ ޔަގީން ކަމެކެވެ. އަދި އަޅުގަނޑުމެންނަށްޓަކައި އެބޭފުޅުން ކުރައްވާ މަސައްކަތުގެ އަގު އެންމެ ފުރިހަމަޔަށް އަދާ ކުރެވޭނެ ގޮތަކީ ކިޔެވުމަށް ގަދައަޅައި މަސައްކަތް ކޮށްގެން ރަގަނޅު ނަތީޖާ އެއް ހޯދުން ކަމަށެވެ. އެހެންކަމުން ކޮންމެ ކުއްޖަކީވެސް އެކުއްޖެއްގެ އެދުރުންނަށް އިޙްތިރާމްކުރާ ކިޔަމަންތެރި ނަމޫނާ ދަރިވަރަކަށް ވުމަށް ފެސާގެ ރައީސާ މަރިޔަމް ވަޖާހާ ވަނީ ދަރިވަރުންނަށް ނަސޭހަތްތެރިވެފައެވެ.
ޤައުމީ ޔުނިވަރސިޓީގެ ސްޓޫޑެންޓްސް ޔޫނިއަންގެ ރައީސް އަރުޝަދު އަޝްރަފް ދަރިވަރުންނާއި މުޚާތަބު ކުރައްވާ ދަރިވަރުންނަށް ހިއްވަރުދެއްވަމުން ވިދާޅުވެފައިވަނީ ކިޔެވުމުގެ އިތުރުން ފެކަލްޓީގައި ހިންގޭ އިތުރު ހަރަކާތް ތަކުގައި ބައިވެރި ވުމަކީ ދޭދޭ ދަރިވަރުންގެ މެދުގައި ގުޅުން ބަދަހި ވުމުގެ އިތުރުން ދަރިވަރުން ކިޔަވައިގެން އަމަލީ މައިދާނަށް ނިކުތުމަށް ފަހުވެސް އެކަމުގެ ފައިދާ ދަރިވަރުންނަށް ކުރާނެ ކަމެއް ކަމުގައެވެ. އަދި ހަމައެފަދައިން ކޮންމެ އަހަރަކުވެސް ޓީޗަރުންގެ ދުވަހާ ގުޅުވައިގެން ފެކަލްޓީ އޮފް އެޑިއުކޭޝަން އިން ބާއްވާ ”ހަވާސް ޝޯ“ މި އަހަރުވެސް އޮކްޓޯބަރ 5 ވާ ހުކުރު ދުވަހުގެ ރޭގައި އޮންނަ އިރު ގިނަ ދަރިވަރުންގެ ތަފާތު ހުނަރުވެރި ގިނަ ހަރަކާތް ތަކެށް ފެނިގެންދާނެ ކަމަށް އުންމީދު ކުރައްވާ ކަމުގައެވެ.
ކުލަގަދަކޮށް ފާހަގަ ކުރުމަށް ރާވަމުންދާ މި ރަސްމިއްޔާތުގައި ބެނުންކުރާ ތީމް ކުލައަކީ މުށި ކުލައެވެ. ތިމާވެއްޓާއި ރައްޓެހި ގޮތަކަށް މި ރަސްމިއްޔާތުގެ ހުރިހާ އިންތިޒާމް ތަށް ހަމަ ޖެއްސުމަކީ މިއަހަރު އެފް.އީގެ ދަރިވަރުން ވަރަށް އިސްކަމެއް ދީގެން ކުރަމުން އަންނަ ކަމެކެވެ.
ޓިޗަރުންގެ ދުވަހުގެ ހަރަކާތްތަކަށް ފޯރީގައި ދަރިވަރުން ގުޅިގެން މަސައްކަތް ކުރާއިރު ހުރިހާ ކުދިންގެ އަޒުމަކީވެސް މޫސުމް ތަން ނުދިން ކަމުގައިވިޔަސް މި ރަސްމިއްޔާތު ކުލަގަދަ ކޮށް ފާހަގަ ކުރުމެވެ.
