ދުނިޔޭގެ އެކި ހިސާބުތަކުގައި މިއަދު ފާހަގަކުރާ ”އާރތް އަވަރ“ ފާހަގަ ކުރުމުގެ ގޮތުން ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ) އަދި އިންޖިނިއަރިންގ، ސައިންސް އެންޑް ޓެކްނޮލޮޖީ އެސޯސިއޭޝަން (އެސްޓާ( ގުޅިގެން ހަރަކާތްތަކެއް ބާއްވައިފިއެވެ.
24 މާރޗް 2018 ވީ ހޮނިހިރު ދުވަހުގެ ރޭ ފެކަލްޓީ އޮފް އެޑިއުކޭޝަންގެ ގޯތިތެރޭގައި ބޭއްވި މި ހަރަކާތުގައި ވަނީ އާރތް އަވަރ އާއި ގުޅޭގޮތުން ތަފާތު މައުލޫމާތުތައް ދަރިވަރުންނާ ހިއްސާ ކޮށްފައެވެ. އަދި ކުޅިވަރުގެ އެކި ހަރަކާތްތަށް ކުރިޔަށް ގެންގޮސްފައިވާއިރު، އެފްއީ ގޯތިތެރޭގެ ބޮކިތައްވެސް ވަނީ މި ހަރަކާތަށް އެއްބާރުލުން ދިނުމުގެ ގޮތުން ނިއްވާލާފައެވެ.
އާރތް އަވަރ އެންމެ ފުރަތަމަ ފާހަގަ ކޮށްފައިވަނީ 2007 ވަނަ އަހަރު އޮސްޓްރޭލިއާގެ ސިޑްނީގައެވެ. ރާއްޖޭގައި މި ހަރަކާތް އެންމެ ފުރަތަމަ ކުރިއަށް ގެންގޮސްފައިވަނީ 2009 ވަނަ އަހަރުއެވެ. ދުނިޔެއަށްޓަކައި އެއްގަޑިއިރު ފާހަގަ ކުރުމުގެ މަޤުސަދަކީ މޫސުމާއި ތިމާވެއްޓަށް އަންނަ ބަދަލުތަކާމެދު ހޭލުންތެރިކަން އިތުރުކޮށް ފަރުދީ ފެންވަރުގައި ބައިވެރިވެ އެއްބައިވަންތަކަން ދެއްކުމެވެ. މި އަހަރަށް ކަނޑައެޅިފައިވާ ޝިޢާރަކީ “ ކަނެކްޓް ޓު އާރތް“ އެވެ.
ފެސާ އާއި އެސްޓާ ގުޅިގެން ބޭއްވި މިހަރަކާތުގައި ސެންޓަރ ފޮރ ފައުންޑޭޝަން ސްޓަޑީޒްގެ ޑީން ޑރ.ޑީޑީ (ޑީޑީ ސަރ) ބައިވެރިވެވަޑައިގެންނެވިއެވެ. އަދި ޑެޕިއުޓީ ވައިސް ޗާންސެލަރ ޝާހީން މިސް އަދި ޑީން އޮފް ސްޓޫޑަންޓް ނާދިޔާ މިސް ބައިވެރިވެވަޑައިގެންނެވިއެވެ. މީގެ އިތުރުން އެމް.އެން.ޔޫ.އެސް.ޔޫގެ ކުރީގެ ރައީސް އަދި 2018 ވަނަ އަހަރުގެ ދަރިވަރުން ތަމްސީލުކުރާ ކައުންސިލް މެންބަރު އަލީ ރަޝީދު އަދި އެމް.އެން.ޔޫ.އެސް.ޔޫގެ މެންބަރުންނާއި ގޮފިތަކުގެ ހިންގާކޮމިޓީގެ މެންބަރުންގެ އިތުރުން އެކިއެކި ފެކަލްޓީތަކުގެ ދަރިވަރުންވެސް ބައިވެރިވިއެވެ. ”އާރތް އަވަރ“ގެ މިހަރަކާތުގައި ސެންޓަރ ފޮރ ފައުންޑޭޝަން ސްޓަޑީޒްގެ ޑީން، ޑީޑީ ސަރ ދަރިވަރުންނާ މުޚާތަބުކޮށް ވާހަކަފުޅު ދައްކަވާފައިވެއެވެ. ޑީޑީ ސަރ ގެ ވާހަކަފުޅުގައި ބޭނުން ނުކުރާ ކަރަންޓު މަދުކުރުމަށް ދަރިވަރުންނަށް ނަސޭހަތްތެރިވިއެވެ. ޑީޑީ ސަރގެ އިތުރުން ޑީން އޮފް ސްޓޫޑަންޓްސް ނާދިޔާ މިސް އާއި ޑެޕިއުޓީ ވައިސް ޗާންސެލަރ ޝާހީން މިސް ވާހަކަފުޅު ދައްކަވާފައިވެއެވެ. ނާދިޔާ މިސް އަދި ޝާހީން މިސްގެ ވާހަކަފުޅުގައިވެސް ބޭކާރު ކަރަންޓު މަދުކުރުމަށް ނަސޭހަތްތެރިވިއެވެ. މީގެ އިތުރުން އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް އަދި ހަޒާންދާރު އަބްދުއްﷲ ޝަހުނީޒް އަދި ކައުންސިލް މެންބަރު އަލީ ރަޝީދުވެސް ވާހަކަފުޅު ދައްކަވާފައިވެއެވެ.
މި ހަރަކާތުގައި އިންޖިނިއަރިންގ، ސައިންސް އެންޑް ޓެކްނޮލޮޖީ އެސޯސިއޭޝަންގެ ފަރާތުން އަރތް އަވަރ އާއި ބެހޭގޮތުން މައުލޫމާތު ދެއްވާފައިވެއެވެ. މި މައުލޫމާތުތައް، މި ހަރަކާތުގެ ބައިވެރިންނަށް ހިއްސާ ކުރައްވާފައިވަނީ އެސްޓާގެ ނައިބުރައިސް (ޢިލްމީ) އަދި ހަޒާންދާރެވެ.
މި ހަރަކާތް ނިންމާލުމުގެ ކުރިން ސޮސައިޓީ އޮފް ޝަރީއާ އެންޑް ލޯ ގެ ރައީސް ނަޝީދު އަބްދުއްﷲ އަދި ހަޒާންދާރު ސަމީހު ވަނީ އެސް.އެސް.އެލްގެ ފަރާތުން ފޮޓޯ ކޮމްޕެޓިޝަންއެއް ހުޅުވާލި ވާހަކަ އިއުލާން ކޮށްފައެވެ. މި ފޮޓޯ ކޮމްޕެޓިޝަންގެ ތީމްއަކީ ”ނޭޗަރ“ އެވެ. ކާމިޔާބުކަމާއިއެކު ނިންމާލި މި ހަރަކާތުގައި ފެސާގެ ރައީސާ މަރިޔަމް ވަޖާހާ އަދި އެސްޓާގެ ރައީސް ހުސައިން މުހައްމަދު ވަނީ ބައިވެރިވި ފަރާތްތަކަށް ޝުކުރު ދަންނަވާފައެވެ.
