ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަނުން ކޮންމެ އަހަރަކުވެސް ބާއްވާ އިންޓަރ ފެކަލްޓީ ވޮލީ މުބާރާތުގައި ބައިވެރިވާ ފެކަލްޓީ އޮފް އެޑިއުކޭޝަންގެ 2 ޓީމުގެވެސް އަމާޒަކީ ހުރިހާ ޓީމުތައް ބަލިކޮށް ޗެންޕިއަންކަން ހޯދުން ކަމަށ 2ް ޓީމުގެ ކޯޗުން ވިދާޅުވެއްޖެ އެވެ.
ފެކަލްޓީ އޮފް އެޑިއުކޭޝަންގެ އަންހެން ޓީމުގެ ކޯޗު، އަހުމަދު ޝާނީޒު ވިދާޅުވީ ޓީމުގައި ގިނައީ އަލަށް ވޮލީ ކުޅޭ ކުދިން ނަމަވެސް ފަރިތަކުރަން ލިބުނު ކުޑަ ދުވަސްކޮޅުގައި ބައިވެރިންގެ ފަރާތުން ބޮޑެތި ކުރިއެރުންތައް ފެނިގެން ގޮސްފައިވާ ކަމަށެވެ. އަދި އަމާޒަކީ ހުރިހާ ޓީމެއް ބަލިކޮށް ޗެމްޕިއަންކަން ނެގުން ކަމަށް ކޯޗު ވިދާޅުވިއެވެ.
”ކުޑަ ދުވަސްކޮޅެއް ތެރޭވެސް ހުރިހާ ކުޅުންތެރިންވެސް ވަރަށް ބޮޑަށް
އިމްޕްރޫވް ކޮށްފި. ޓާގެޓަކީ ހުރިހާ ޓީމުތައް ބަލިކޮށް ޗެމްޕިއަންކަން
ނެގުން.“ ޝާނީޒު ވިދާޅުވިއެވެ.
ފިރިހެން ޓީމުގެ ކޯޗު އަހުމަދު ރީހާން ވިދާޅުވީ ޓީމަށް ދިމާވި އެންމެ ބޮޑު އެއް ގޮންޖެހުމަކީ ފަރިތަކުރަން ލިބުނު މަދު ވަގުތާއި ފަރިތަކުރާނެ ކޯޓު ލިބުމުގެ ދަތިކަން ކަމަށެވެ. އަދި ގިނަ ކުދިން އަލަށް ބައިވެރިވި ނަމަވެސް ބޮޑެތި ކުރިއެރުންތަކެއް ފެނިފައިވާ ކަމަށާއި އެހެންކަމުން އަމާޒަކީ ޗެމްޕިއަންކަން ހޯދުން ކަމަށް ރީހާން ވެސް ވިދާޅުވިއެވެ،
”މިފަހަރު ޓީމުގައި ގިނައީ އާ ކުދިން. ނަމަވެސް ކުޅުންތެރިންގެ އެއްބާރުލުމާއެކު ވަރަށް ބޮޑުތަން އިމްޕްރޫވް ވެއްޖެ. އެހެން ކަމުން ޓާގެޓަކީ ޗެމްޕިއަންކަން ހޯދުން،“ ރީހާން ވިދާޅުވިއެވެ.
ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)ގެ ނައިބު ރައީސް އަމަލީ، އާކިފާ ރަޝީދު ވިދާޅުވީ އުންމީދަކީ ދެ ޓީމުންވެސް ”ޑިސިޕްލިންޑް“ ކުޅުމެއް ދެއްކުން ކަމަށެވެ. އަދި ކޯޗުންގެ އަމާޒަށް ވާސިލްވުމަށް ކުޅުންތެރިން ގަދައަޅައި މަސައްކަތް ކުރާނެ ކަމަށް އުންމީދު ކުރައްވާ ކަމަށް ވެސް އާކިފާ ވިދާޅުވިއެވެ.
މި އޭޕްރީލް މަހުގެ 22 އިން 27 އަށް އޮންނަ އިންޓަރ ފެކަލްޓީ ވޮލީ މުބާރާތުގައި އެފްއީގެ 2 ޓީމް ވާދަ ކުރާއިރު އެފްއީއަކީ ވޭތުވެދިޔަ އަހަރުތަކުގައި މުބާރާތުގައި ބޮޑެތި ކާމިޔާބީތައް ހޯދާފައިވާ ފެކަލްޓީއެކެވެ.
ލިޔުނީ: އިބްރާހީމް ޢުމަރު ނަޞީރު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
