ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްނއެންޔޫއެސްޔޫ)އިން އިންތިޒާމް ކޮށްގެން ބާއްވާ އިންޓަރ ފެކަލްޓީ ވޮލީ މުބާރާތުގައި ވާދަކުރާ ފެކަލްޓީ އޮފް އެޑިއުކޭޝަންގެ ދެ ޓީމަށް ވެސް ޖާރޒީ ހަވާލު ކުރުމުގެ ރަސްމިއްޔާތު ބާއްވައިފިއެވެ.
21 އޭޕްރީލްވީ ދުވަހު ހަވީރު 17:00 ގައި އެފްއީ ބީ3 އެކްސް ކްލާސްރޫމްގައި ބޭއްވި މި ރަސްމިއްޔާތު ޝަރަފްވެރި ކޮށްދެއްވީ ސައިރިކްސް ކޮލެޖް ސްޓޫޑެންޓްސް އެސޯސިއޭޝަންގެ ރައީސް މުހައްމަދު ނަބީހުއެވެ. މީގެ އިތުރުން ފެކަލްޓީ އޮފް އެޑިއުކޭޝަންގެ ޑީން، މަރިޔަމް ފިޒާނާ ރަޝީދުގެ އިތުރުން އެމްއެންޔޫއެސްޔޫގެ ނައިބު ރައީސް އަމަލީ، ހަސަން ޝާހުއާއި ހަޒާންދާރު، އަބްދުﷲ ޝަހުނީޒު އަދި މީޑިއާ ކޯރޑިނޭޓަރ މުހައްމަދު ޝާން ވެސް ބައިވެރިވެ ވަޑައިގެންނެވިއެވެ.
މި ރަސްމިއްޔާތުގައި އަންހެން ޓީމުގެ ކުޅުންތެރިންނަށް ޖާރޒީ ހަވާލުކޮށްދެއްވީ އެފްއީގެ ޑީން މަރިޔަމް ފިޒާނާ ރަޝީދުއެވެ. ފިރިހެން ޓީމުގެ ކުޅުންތެރިންނަށް ޝަރަފުވެރި މެހެމާނު، މުހައްމަދު ނަބީހު ޖާރޒީ ހަވާލު ކޮށްދެއްވިއިރު އޮފިޝަލުންނަށް ޖާރޒީ ހަވާލު ކޮށްދެއްވީ ހަސަން ޝާހު، އަބްދުﷲ ޝަހުނީޒު އަދި މުހައްމަދު ޝާންއެވެ.
މި ރަސްމިއްޔާތުގައި ފެކަލްޓީ އޮފް އެޑިއުކޭޝަންގެ ޑީން، މަރިޔަމް ފިޒާނާ ރަޝީދު ވިދާޅުވީ، މިއަހަރު ޗެމްޕިއަންކަން ނަގާ ޓީމަކަށް އެފްއީގެ ފަރާތުން ޓްރޮފީއެއް ދޭން ވިސްނަވާ ކަމަށެވެ. އަދި އެކަމާމެދު ސްޓޫޑެންޓް ޔޫނިއަންއާ މަޝްވަރާ ކުރުމަށްފަހު ގޮތެއް ނިންމަވާނެ ކަމަށް ވެސް ވިދާޅުވިއެވެ.
މި އޭޕްރީލް މަހުގެ 22 އިން 27 އަށް އެފްއީ ޕީއީ ހޯލްގައި ބާއްވާ އިންޓަރ ފެކަލްޓީ ވޮލީ މުބާރާތުގެ ފިރިހެން ޑިވިޝަންގައި 8 ޓީމް ބައިވެރިވާއިރު އަންހެން ޑިވިޝަންގައި 9 ޓީމް ބައިވެރިވެއެވެ.
ލިޔުނީ: އިބްރާހީމް އުމަރު ނަޞީރު،
މީޑިއާ ކޯޑިނޭޓަރ، ފެސާ
