ފެކަލްޓީ އޮފް އެޑިއުކޭޝަންއަށް 2019 ވަނަ އަހަރު ގުޅުނު އައު ދަރިވަރުންނާއި، ހުރިހާ ބެޗްތަކުގެ ލީޑަރުންނާއެކު ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)އިން ބައްދަލުކޮށްފިއެވެ.
މިބައްދަލުވުން ބާއްވާފައިވަނީ ފެކަލްޓީ އޮފް އެޑިއުކޭޝަންގެ ބީ2-12 ކްލާސްރޫމްގައި އޭޕްރީލް މަހުގެ 30 ވަނަ ދުވަހުއެވެ. މި ބައްދަލުވުމުގައި ފެސާގެ ހިންގާ ކޮމެޓީގެ ހުރިހާ މެމްބަރުން ވަނީ ބައިވެރިވެފައެވެ.
އައު ދަރިވަރުންނާ ބައްދަލުކޮށް ފެސާއިން ވަނީ ކުދިންގެ ހުރި ދަތިތައް އޮޅުންފިލުވައި ފެސާފެ ތައާރަފެއް ކުދިންނަށް ދީފައެވެ. އެގޮތުން ފެސާއަކީ ކޮބައިކަމާއި ފެސާގެ މަގުސަދާއި ލަނޑުދަނޑިތައް ވަނީ ކުދިންނާ ހިއްސާކޮށްފައެވެ.
ފެސާގެ ވޭތުވެދިޔަ އަހަރުގެ ހިންގާ ކޮމެޓީގެ މެމްބަރުންނާއި މި އަހަރުގެ ހިންގާ ކޮމެޓީގެ މެމްބަރުންގެ ކުރު ތައާރަފަކާއި ވޭތުވެދިޔަ އަހަރު ހިންގި ހަރަކާތްތަކުގެ ތަފްސީލްވެސް ކުދިންނާ ވަނީ ހިއްސާކޮށްފައެވެ.
މީގެ އިތުރުން މިއަހަރަށް ފެސާއިން ހިންގުމަށް ރާވާފައިވާ ހަރަކާތްތައް ވެސް ދަރިވަރުންނަށް ވަނީ ކިޔާދީފައެވެ. އަދި ދަރިވަރުންގެ ހިޔާލު މިހަރަކާތްތައް ހިންގުމަށް ވަނީ ހޯދާފައެވެ.
ފެސާގެ ތައާރަފަކާއެކު ފެސާއިން ހިންގުނު ހަރަކާތްތަކާއި ރާވާފައިވާ ކަންކަމުގެ ކުރު ޕްރެޒެންޓޭޝަނެއް ހުށަހަޅައިދިނީ ފެސާގެ ނައިބު ރައީސް (އިލްމީ) އަރުޝަމް މުހައްމަދުއެވެ.
ފެސާއިން މި އަހަރު ބޭއްވި ”އޯޓިޒަމް އެވެއާނެސް“ ކުރެހުމުގެ މުބާރާތުގެ އެއްވަނައަށްދިޔަ ފަރާތައް ވެސް މި ބައްދަލުވުމުގައިވަނީ ފައިސާގެ އިނާމު ހަވާލުކޮށްފައެވެ.
ލިޔުނީ: އިބްރާހީމް ޢުމަރު ނަޞީރު،
މީޑިއާ ކޯޑިނޭޓަރ، ފެސާ، އެމް.އެން.ޔޫ.އެސް.ޔޫ
