ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަނުން އެ ޔޫނިއަންގެ ބެލެނިވެރިކަމުގެ ދަށުގައިވާ ފެކަލްޓީ އޮފް އެޑިއުކޭޝަން ސްޓޫޑޭންޓްސް އެސޯސިއޭޝަން (ފެސާ)ގެ ހިންގާ ކޮމެޓީއާ ބައްދަލުކޮށްފިއެވެ.
28 ސެޕްޓެމްބަރުގެ ހަވީރު 16:00ގައި ބައްދަލުވުން ބާއްވާފައިވަނީ އެމްއެންޔޫއެސްޔޫގެ އޮފީހުގައެވެ. ބައްދަލުވުމުގައި ފެސާ އެކްސްކޯގައި ހިމެނޭ ހުރިހާ މެމްބަރުންވެސް ބައިވެރިވިއެވެ. އެމްއެންޔޫއެސްޔޫގެ ފަރާތުން ރައީސް، މުހައްމަދު ޝާންއާއި ނައިބު ރައީސް އަމަލީ، އާދަމް ރުޝްދީއާާއި ގޮފިތަކާ ހަވާލުވެހުންނެވި ނައިބު ރައީސް، އަލީ ޝަމްއޫންގެ އިތުރުން ސެކެޓްރީ އަނާ އަހުމަދު ވެސް ވަނީ ބައިވެރިވެފައެވެ. މީގެ އިތުރުން އެމްއެންޔޫއެސްޔޫގެ އެޑްވައިޒަރީ ބޯޑުގައި ހިމެނޭ އެމްއެންޔޫއެސްޔޫގެ ކުރީގެ ރައީސް، އަރުޝަދު އަޝްރަފްއާއި ހުސެއިން އަލީ ވެސް މި ބައްދަލުވުމުގައި ބައިވެރިވިއެވެ.
މި ބައްދަލުވުމުގައި ފެސާއިން ހިންގާާފައިވާ ހަރަކާތްތަކުގެ މައުލޫމާތު ވަނީ
މެމްބަރުންނާ ހިއްސާކޮށްފައެވެ. އަދި ކުރިއަށް ރާވާފައިވާ ހަރަކާތްތަކުގެ
މައުލޫމާތުވެސް މެމްބަރުންނާ ހިއްސާކޮށްފައިވެއެވެ. މީގެ އިތުރުން އެމްއެންޔޫއެސްޔޫއަށް
ފާހަގަ ކުރެވުނު ކަންކަމާ ގުޅޭގޮތުން ވެސް ވަނީ ވާހަކަ ދައްކާފައެވެ.
ގާތްގަނޑަކަށް ގަޑިއެއްހާއިރަށް ދެމިގެންދިޔަ މި ބައްދަލުވުމަކީ އެމްއެންޔޫއެސްޔޫއިން
ފެސާއާއެކު މިއަހަރު ބޭއްވި ފުރަތަމަ ބައްދަލުވުމެވެ. މިފަދަ ބައްދަލުވުމެއް
ބޭއްވުމުން ރަނގަޅު ކުރަންޖެހޭ ކަންކަން އެނގި ކުރިއަށްދާން ފަސޭހަ ވެގެން
ދިޔަކަން ފެސާގެ ހިންގާ ކޮމެޓީގެ މެމްބަރުން ފާހަގަކުރިއެވެ.
އެގޮތުން ބައްދަލުވުމަށްފަހު ފެސާގެ ރައީސާ މަރިޔަމް ވަޖާހާ ވިދާޅުވީ މިފަދަ ބައްދަލުވުމެއްގެ ސަބަބުން ހުރި މައްސަލަތައް އެނގި ކަންކަން ނިންމަން ފަސޭހަ ވެގެންދާ ކަމަށެވެ. އަދި މިފަދަ ބައްދަލުވުންތައް ކުރިއަށް އޮތްތަނުގައި އިތުރުވާނެ ކަމަށް އުންމީދު ކުރައްވާ ކަމަށްވެސް ވާޖާހާ ވިދާޅުވިއެވެ.
”މިފަދަ ބައްދަލުވުމަކުން ވަރަށް ފަސޭހަ ވެގެންދޭ ހުރި މައްސަލަތައް ހައްލުކުރަން މަޝްވަރާ ކުރަން. ކުރިއަށް އޮތްތަނުގައި ރަނގަޅު ކުރަން ޖެހޭ ކަންކަން ވެސް އެނގޭ. އެހެންވީމަ މިފަދަ ބައްދަލުވުންތައް ބޭއްވުން އަސްލު ވަރަށް މުހިންމު،“ ވަޖާހާ ވިދާޅުވިއެވެ.
އެމްއެންޔޫއެސްޔޫގެ ހަތްވަނަ ދައުރު ކުރިއަށްދާއިރު ފެސާއަކީ އެމްއެންޔޫއެސްޔޫގެ އެންމެ ދުވަސްވީ އެއް ގޮފިއެވެ.
ލިޔުނީ: އިބްރާހިމް އުމަރު،
މީޑިއާ ކޯރޑިނޭޓަރ، ފެސާ
