ބޮޑު އީދާ ދިމާކޮށް ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)އިން ބޭއްވި އިންސްޓަގްރާމް ފޮޓޯ ކޮންޓެސްޓްގެ އެއްވަނަ އެމްއެންޔޫބީއެސްގެ ދަރިވަރު، އީފާ އިބްރާހިމް ހާސިލު ކޮށްފިއެވެ.
ބޮޑު އީދު ފާހަގަ ކުރުމަށް ހިންގި ހަރަކާތްތައް ފޮޓޯގެ ޒަރިއްޔާއިން ހިއްސާކޮށްގެން އިނާމެއް ހޯދުމުގެ ފުރުސަތު ލިބުނު މި ފޮޓޯ ކޮންޓެސްޓަށް އީފާ ހުށަހަޅާފައިވަނީ ކުލަ ޖެހުމުގެ ތެރެއިން ނަގާފައިވާ ފޮޓޯއެކެވެ. އީދު މަޖާ ފޮޓޯ ނެގުމުގެ މުބާރާތަށް މާރކްސް ދިނީ އެކަމަށް ހާއްސަކޮށްފައިވާ ޖަޖުންގެ ޓީމަކުންނެވެ.
އަހަރުތެރޭ ފެސާއިން ބޭއްވި ދެވަނަ އިންސްޓަގްރާމް ޗެލެންޖާ ގުޅޭގޮތުން ފެސާގެ ނައިބު ރައީސް (އަމަލީ) އާކިފާ ރަޝީދު ވިދާޅުވީ، މިފަދަ މުބާރާތްތައް ހުޅުވާލުމުން ދަރިވަރުންގެ ހުރި ހުނަރު ފެނިގެންދާ ކަމަށާއި އޭގެ ސަބަބުން ދަރިވަރުންނަށް ކުރިއަށްދާން އެހީތެރިކަން ލިބޭ ކަމަށެވެ.
”އަސްލު މިފަދަ ޗެލެންޖެއް ހުޅުވާލީމަ މި އެނގެނީ ކުދިންގެ ހުރި ޓެލެންޓްސް. މިގޮތަށް އެއްޗަކަށް ފޮޓޯ ލައިގެން ވެސް ކުދިންނަށް ހަމަ ކުރިއަށްދާން ފުރުސަތު ލިބިގެން ދާނެ،“ އާކިފާ ވިދާޅުވިއެވެ.
މީގެ ކުރިން ފެސާއިން ވަނީ މިއަހަރުގެ ރޯދަމަހާ ދިމާކޮށްވެސް ފޮޓޯނެގުމުގެ މުބާރާތެއް ބާއްވާފައެވެ.
ލިޔުނީ: އިބްރާހިމް އުމަރު،
މީޑިއާ ކޯރޑިނޭޓަރ، ފެސާ
