ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)ގެ ހަރަކާތްތައް ކުރިއަށް ގެންދިއުމަށް އައު ހިތްވަރެއް ލިބިއްޖެއެވެ. ސަބަބަކީ ފެސާގެ ހަރަކާތްތަކަށް އެއްބާރުލުންދީ އެހީތެރިކަންދޭ ލީޑަރުންތަކެއް އިތުރުވެގެން ދިއުމެވެ.
ލީޑަރުންގެ އެއްބައިވަންތަކަން އިތުރުކޮށް ގުޅުން ބަދަހި ކުރުމަށް މިއަދުވެސް މިވަނީ ތަފާތު ހަރަކާތެއް ކުރިއަށް ގެނގޮސްފައެެވެ. އެގޮތުން މިއަދު ހަވީރު 4:00 އިން 6:00 އަށް ރަސްފަންނުގައި ލީޑަރުން އިސްނަގައިގެން ތަފާތު ހަރަކާތްތަކާއެކު ހާއްސަ ސަޔެއް ވަނީ ތައްޔާޜު ކޮށްފައެވެ. ސަޔަށް ތަކެތި ތައްޔާރު ކުރީ ވެސް ލީޑަރުންނެވެ.
މިފަދަ އެއްބައިވަންތަކަމެއް ލީޑަރުންގެ ކިބައިން ފެނިގެން ދިއުމަކީ އުފާވާ، ކުރިއަށްދާން ހިތްވަރު ލިބޭކަމެއްކަން ފެސާގެ ރައީސާ މަރިޔަމް ވަޖާހާވެސް ވަނީ ފާހަގަ ކުރައްވާފައެވެ. އެގޮތުން ލީޑަރުންގެ މެދުގައި އޮތް އެކުވެރިކަމުގެ ސަބަބުން ފެސާގެ ހަރަކާތްތައް ހިންގުމަށް ފަސޭހަ ވެގެން ދާނެކަން ވެސް ވަޖާހާ ފާހަގަ ކުރެއްވިއެވެ.
”ލިޑާރސް މިގޮތަށް އެއްބައިވަންތަކޮށް ފެނުނީމަ ވަރަށް އުފާވޭ އަސްލު. ހިތްވަރު ހަމަ އާ ވެގެންދޭ ފެސާގެ ހަރަކާތްތައް ހިންގުމަށް. މިގޮތަށް މިކުދިންގެ މަސައްކަތް ކުރިއަށް އޮތް ތަނުގައިވެސް ފެނިގެންދާނެ ކަމަށް އުންމީދު ކުރަން،“ ވަޖާހާ ވިދާޅުވިއެވެ.
ލީޑަރުން ފާހަގަކުރި ގޮތުގައި އިސްނަގައި މަސައްކަތް ކުރަން ހިތްވަރު ލިބުނީ ފެސާގެ އެކްސްކޯ މެމްބަރުންގެ ހީވާގި މަސައްކަތް ފެނިއެވެ. ބުރަކޮށް އުޅެމުންވެސް ކަންކަން ރާވައި ހިންގަން އެކްސްކޯ މެމްބަރުން ކުރާ ހިތްވަރަކީ ނަމޫނާއެއްކަން ލީޑަރުން ފާހަގަ ކުރިއެވެ.
”ލީޑަރޝިޕް ނަގަން އެންމެ މޯޓިވޭޓްވީ ފެސާގެ އެކްސްކޯ މެމްބާރސް ކުރާ ހިތްވަރު ފެނިފަ. ކިތަންމެ ބިޒީކޮށް އުޅެމުންވެސް މަސައްކަތް ފުރިހަމަ ކުރަން އެ އޮންނަ ޑެޑިކޭޝަން ފެނިގެން ދާނެ،“ ފެސާއާ ވާހަކަ ދެއްކި ލީޑަރަކު ކިޔައިދިނެވެ.
ފެސާ ލީޑަރުންގެ ޓީމުގައި ހިމެނޭ ގިނަ ކުދިންނަކީ މިއަހަރުގެ ޖެނުއަރީ އަދި ޖޫން އިންޓޭކްގައި ފެކަލްޓީ އޮފް އެޑިއުކޭޝަނާ ގުޅުނު ވަރަށް އުންމީދީ މޫނުތަކެކެވެ.. އަދި އިސްނަގައި މަސައްކަތް ކުރުމުގައި ނަމޫނާ ދައްކަމުންދާ ދަރިވަރުންތަކެކެވެ.
އުންމީދަކީ ލީޑަރުން ތިޔަކުރާ ހިތްވަރާއެކު ކުރިއަށްގޮސް މުސްތަގުބަލުގައި ފެސާގެ ހުންގާނުން ތިޔަ ލީޑަރުން ފެނިގެން ދިއުމެވެ. ތިޔަ ލީޑަރުން ތިކުރާ ހިތްވަރަށް ސާބަހެވެ. ފަށްފަށުން ޝުކުރިއްޔާއެވެ.
ލިޔުނީ: އިބްރާހިމް އުމަރު
މީޑިއާ ކޯރޑިނޭޓަރ، ފެސާ
