ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)އިން އިސްނަގައިގެން އެފްއީގެ ބައެއް ދަރިވަރުންނާއެކު ކެއަރ ސޮސައިޓީގެ ދަރިވަރުންނާ ބައްދަލުކޮށް އެދަރިވަރުންނާއެކު ވަގުތުކޮޅެއް ހޭދަކޮށްފިއެވެ.
އޮކްޓޯބަރ 7 ވަނަ ދުވަހުގެ މެންދުރު 2:00ގައި ފެސާއިން ކެއަރ ސޮސައިޓީއާ ބައްދަލުކޮށްފައިވާއިރު ކެއަރ ސޮސައިޓީގެ ބައެއް ދަރިވަރުން ވަނީ މިބައްދަލުވުމުގައި ބައިވެރިވެފައެވެ.
މި ބައްދަލުވުމަކީ ފެސާގެ ފަރާތުން އިސްނަގައިގެން ނުކުޅެދުންތެރިކަން ހުންނަ ކުދިންނަށް އެހީވުމުގެ މަގުސަދުގައި ބޭއްވި ބައްދަލުވުމެކެވެ. ބައްދަލުވުމުގައި ފެސާއިން ހިންގި އެކި ފަންޑްރެއިޒިންގ އިވެންޓުތަކާއި އެމްއެންޔޫއެސްޔޫއިން ލިބުނު ބަޖެޓުން ހަރަދުކޮށްގެން ކެއަރ ސޮސައިޓީއަށް ވަނީ ކުދިންނަށް ބޭނުން ހިފޭނެ ތަކެތި ހަދިޔާކޮށްފައެވެ. އަދި ކެއަރ ސޮސައިޓީގެ ފަރާތުންވެސް ވަނީ ހަދިޔާއެއްގެ ގޮތުން ކުރެހުމެއް ފެސާއަށް ހަދިޔާކޮށްފައެވެ.
މި ބައްދަލުވުމުގައި ފެސާގެ ރައީސާ މަރިޔަމް ވަޖާހާ ވިދާޅުވީ މުދައްރިސުންގެ ގޮތުގައި ތަމްރީނުވާ ދަރިވަރުން މިފަދަ ކުދިންނަށް ޒިޔާރަތްކޮށް އެކުދިންގެ ހާލަތު ބެލުމަކީ ވަރަށް މުހިންމު ކަމެއް ކަމަށާއި މިފަދަ ކުދިން މުޖުތަމައުން ބާކީ ނުކޮށް އެކުދިންގެ ބައިވެރިވުން ވެސް މުޖުތަމައުގައި ބޭނުންކުރަންޖެހޭ ކަމަށެވެ.
”މިކުދިންގެ ހާލަތު ބަލައި މިކުދިންނަށް މުޖުތަމައުން ފުރުސަތު ހޯދައި ދިނުމަކީ ޓީޗަރުންނަށްވާން ތަމްރީނުވާ ކުދިންނަށް ވަރަށް މުހިންމު ކަމެއް،“ ވަޖާހާ ވިދާޅުވިއެވެ.
މި ބައްދަލުވުމުގައި އެފްއީގެ ދަރިވަރުންނާއި ކެއަރ ސޮސައިޓީގެ ދަރިވަރުން ވަނީ އެކުގައި އެކި ކުޅިވަރުތައްކުޅެ އުފާވެރި ވަގުތުކޮޅެއް އެކުގައި ހޭދަކޮށްފައެވެ. އަދި ކުދިންނަށް ހާއްސަ އައިޓަމެއް ވެސް އެފްއީގެ ދަރިވަރުން ވަނީ ހުށަހަޅައިދީފައެވެ.
ލިޔުނީ: އިބްރާހިމް އުމަރު
މީޑިއާ ކޯރޑިނޭޓަރ، ފެސާ
