ދުނިޔޭގެ ކާބޯތަކެތީގެ ދުވަސް ފާހަގަ ކުރުމަށް ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން(ފެސާ)އިން އިސްނަގައިގެން ދަރިވަރުންނާއި ލެކްޗަރާއިން އެކުގައި ހަރަކާތެއް ބާއްވައިފިއެވެ.
މި ހަރަކާތް ބާއްވާފައިވަނީ 13 އޮކްޓޯބަރުގައި ފެކަލްޓީ އޮފް އެޑިއުކޭޝަންގެ ކްލާސްރޫމް ބީ 3 އެކްސްގައިއެވެ. މެންދުރު އެކެއްޖެހިއިރު ބޭއްވި މި ހަރަކާތުގައި ފެސާ އެކްސްކޯ މެމްބަރުންނާއި ފެކަލްޓީ އޮފް އެޑިއުކޭޝަންގެ ބައެއް ދަރިވަރުންނާއި ޑީން، މަރިޔަމް ފިޒާނާ ރަޝީދުގެ އިތުރުން ފެކަލްޓީގެ ބައެއް ލެކްޗަރާއިން ވަނީ ބައިވެރިވެފައެވެ. މީގެ އިތުރުން އޮސްޓްރޭލިއާގެ މެލްބަން ޔުނިވަރސިޓީއިން ރާއްޖޭގައި ތައުލީމީ ދާއިރާގެ ތަމްރީނެއް ހަދަމުން އަންނަ ބައެއް ދަރިވަރުން ވެސް ވަނީ ބައިވެރިވެފައެވެ.
މި ހަރަކާތް ފެށިގެން ދިޔައީ ދަރިވަރުންނާއި ލެކްޗަރާއިން ގްރޫޕްތަކަށް ބެހުމަށްފަހުގައެވެ. އެގޮތުން ހަތަރު ގުރޫޕެއް ހެދުމަށްފަހު ކޮންމެ ގުރޫޕަކުން ވަނީ ވަކި މޭވާއެއް ނަގާފައެވެ. އަދި އެ މޭވާއިން ލިބޭ ސިއްހީ ފައިދާތައް ހިމަނައިގެން ޕޯސްޓަރެއް ހެދުމަށް ކޮންމެ ގުރޫޕަކަށް ހަވާލު ކުރެވުނެވެ. އަދި އެއަށްފަހު ކޮންމެ ގުރޫޕަކަށް ވެސް އެ ގުރޫޕުން ހެދި ޕޯސްޓަރު ހުށަހެޅުމުގެ ފުރުސަތު ލިބުނެވެ. ކޮންމެ ގުރޫޕަކުން ޕޯސްޓރު ހުށަހެޅުމަށްފަހު އެންމެ މޮޅު ގުރޫޕުވެސް ވަނީ ހޮވާފައެވެ. މާރްކސް ދިނުމުގައި ބައިވެރިވީ ފެސާގެ އެކްސްކޯގެ ބައެއް މެމްބަރުންނެވެ.
އެއަށްފަހު ދުވަހުގެ ޝިއާރާ ގުޅުވައިގެން ދަރިވަރުން ގެނެސްފައިވާ މޭވާއަށް ދަރިވަރުންނާއި ލެކްޗަރާއިން ވަނީ އިންސާފު ކޮށްފައެވެ. އަދި ދަރިވަރުންނާއި ލެކޗަރާއިން ވަނީ އެކުގައި އުފާވެރި ވަގުތުކޮޅެއް ހޭދަކޮށްފައެވެ.
މި ހަރަކާތާ ގުޅޭގޮތުން ފެސާގެ ރައީސާ، މަރިޔަމް ވަޖާހާ ވިދާޅުވީ މިފަދަ ހަރަކާތެއްގެ ސަބަބުން ދަރިވަރުންނާއި ލެކްޗަރާއިންގެ ދެމެދުގައި އޮންނަ ގުޅުން ބަދަހި ވެގެންދާނެ ކަމަށެވެ. ހަމަ އެއާއެކު ދަރިވަރުންގެ މައުލޫމާތު މުއްސަނދި ވެގެންދިޔަކަން ވެސް ރައީސާ ފާހަގަ ކުރެއްވިއެވެ.
”ލެކްޗަރާސްއާ ކުދިންގެ ގުޅުން ބަދަހިވާނެ މިފަދަ ހަރަކާތްތައް ގިނައިން ހިންގީމަ. އަދި މައުލޫމާތު ވެސް މުއްސަނދިވާނެ. ވަރަށް ހިތްހަމަޖެހޭ މި ހަރަކާތް ކުރިއަށްދިޔަ ގޮތާމެދު،“ ވަޖާހާ ވިދާޅުވިއެވެ.
ދުނިޔޭގެ ކާބޯތަކެތީގެ ދުވަހަކީ ކޮންމެ އަހަރެއްގެ ވެސް އޮކްޓޯބަރު މަހުގެ ތޭރަ ވަނަ ދުވަހެވެ.
ލިޔުނީ: އިބްރާހިމް އުމަރު
މީޑިއާ ކޯރޑިނޭޓަރ، ފެސާ
