އޮސްޓްރޭލިއާގެ ޔުނިވާސިޓީ އެއްކަމަށްވާ އުނިވާސިޓީ އޮފް މެލްބަރން ގެ ފަރާތުން ކިޔަވައި ދިނުމުގެ އަމަލީ ތަމްރީނު ހޯދަން ދިވެހިރާއްޖެއަށް ޒިޔާރަތް ކުރަމުން އަންނަ ދަރިވަރުންނާއިއެކު އެފްއީގެ ދަރިވަރުން ވަގުތު ކޮޅެއް ހޭދަ ކޮއްފިއެވެ.
ފެސާއިން އިންތިޒާމް ކޮށްގެން އޮކްޓޫބަރު މަހުގެ 20 ވަނަ ދުވަހު މެންދުރު ފަހު އޮތް މި ބައްދަލުވުމުގައި ބައިވެރި ވެފައިވަނީ އެފްއީގެ ބައެއް ދަރިވަރުންނާއި ފެސާގެ އެކްސްކޯގެ މެންބަރުންނެވެ. މި ބައްދަލުވުމުގައި ސަޤާފީ ކުޅިވަރުތަކުގެ އިތުރުން ސަޤާފީ ކެއުމެއް ވެސް ވަނީ ކުރިއަށް ގެންގޮސްފައެވެ. މީގެ އިތުރުން ކިޔަވައިދިނުމުގެ އަމަލީ މަސައްކަތުގައި ދިވެހިރާއްޖެ އާއި އޮސްޓްރޭލިއާއާ ހުރި ތަފާތު ތަކާ ބެހޭ ގޮތުން ވާހަކަ ދެކެވި ޚިޔާލުވެސް ބަދަލު ކުރެވުނެވެ.
ބައްދަލުވުމުގައި ކުރިއަށްދިޔަ ހަރަކާތްތަކުގެ ތެރޭގައި ދިވެހިންގެ ޘަޤާފީ ކުޅިވަރެއް ކަމަށްވާ އޮއްވަޅުގޮނޑި އެކުދިންނަށް ތަޢާރަފު ކޮށްދީ އެކުޅިވަރު ވަނީ ކުރިއަށް ގެންގޮސްފައެވެ. މި ކުޅިވަރު ވެގެންދިޔައީ އެކުދިންނަށް ވަރަށް އާ އަދި ވަރަށް މަޖާ ކުޅިވަރަކަށެވެ.
މީގެ އިތުރުން އެފްއީ ދަރިވަރުންނާއި މެލްބަރން ޔުނިވަރސިޓީގެ ދަރިވަރުންނާއި އެއްކޮށް ގްރޫޕް ތަކަކަށް ބަހައި ކިޔަވައިދިނުމުގައި ތަމްރީނެއްގެ ގޮތުގައި ބޭނުންކުރާނެ މަސައްކަތެއް ކޮންމެ ގްރޫޕަކުން ވެސް ވަނީ ތައްޔާރު ކޮއްފައެވެ. މި ހަރަކާތުގައި ރާއްޖެއާ އޮސްޓްރޭލިއާގެ ކިޔަވައިދިނުމުގެ ވައްޓަފާޅި އާއި ޚިޔާލު ވަނީ ބޭނުންކުރެވިފައެވެ. އެހެންކަމުން މި ހަރަކާތް ވެގެން ގޮސްފައިވަނީ ދެފަރާތައްވެސް ވަރަށް ފައިދާހުރި ހަރަކާތަކަށެވެ.
އެއަށް ފަހު ދެން ބައްދަލުވުމުގައި ކުރިއަށް ގޮސްފައިވަނީ އެފްއީގެ ދަރިވަރުންގެ ފަރާތުން ތައްޔާރުކޮއްދީފައިވާ ދިވެހި ޘަޤާފީ ކެއުމެކެވެ. ދިވެހި ޘަޤާފީ ރަހަތައް ވެގެންދިޔައީ މެލްބަރން ޔުނިވަރސިޓީގެ ދަރިވަރުންނަށް ވަރަށް އާ އަދި ވަރަށް ކަމުދާ ރަހަތަކަކަށެވެ. މީގެ އިތުރުން ދިވެހި ބޮޑުބެރު ލަވަތަކާއި ޘަޤާފީ ދިރިއުޅުން ދައްކައިދޭ ވީޑިއޯ ތަކެއްވެސް ވަނީ ދައްކާލާފައެވެ.
ބައްދަލުވުން ނިންމުމުގެ ގޮތުން މެލްބަރން ޔުނިވާސިޓީގެ ފަރާތުން އެފްއީގެ ދަރިވަރުންނަށް ވަނީ ޝުކުރު އަދާކޮއްފައެވެ. އެގޮތުން ދިވެހި ރާއްޖޭގެ ޡަޤާފަތުގެ ގިނަ ކަންތައްތަކެއް ދަސްވި ކަމަށާއި، ދިވެހިންނަކީ ވަރަށް ޝައުޤުވެރި ވާފަދަ ދިރިއުޅުމެއް އުޅޭ ބައެއްކަން ވަނީ ފާހަގަ ކޮއްފައެވެ. އަދި ދިވެހި ރަހަތައް ވަރަށް ކަމުދާ ކަމަށާއި އެފްއީގެ ދަރިވަރުންނާއެކު ބައްދަލުވުމުގެ ހަރަކާތް ތަކުގައި މަސައްކަތް ކޮއްލަން ފުރުސަތު ލިބުމުން ވަރަށް ހިތްހަމަ ޖެހޭކަން ވަނީ ފާހަގަ ކޮއްފައެވެ. މި ދަތުރު ނިންމާ މި ކުދިން ފުރުމަށް ހަމަޖެހިފައިވަނީ 24 އޮކޮޓޫބަރ ވާ ބުރާސްފަތި ދުވަހުއެވެ.
ލިޔުނީ: އަލީ އާރިފް
ދަރިވަރެއް، ފެކަލްޓީ އޮފް އެޑިއުކޭޝަން
