ޓީޗަރުންގެ ދުވަސް ފާހަގަ ކުރުމުގެ ގޮތުން ކޮންމެ އަހަރަކުވެސް ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ) އިން އިންތިޒާމް ކޮށްގެން ބާއްވާ ހަވާސް ޝޯ މިފަހަރުވެސް ވަރަށް ފޯރިގަދަ ތަފާތު ރަހަތަކާއެކު ނިންމާލައިފިއެވެ.
ފެކަލްޓީ އޮފް އެޑިއުކޭޝަންގެ ޑީން މަރިޔަމް ފިޒާނާ ރަޝީދު ބައިވެރިވެ ވަޑައިގެންނެވި މި ޝޯ ކުރިޔަށް ދިޔައީ 27 އޮކްޓޫބަރ 2019 ވަނަ ދުވަހުގެ ރޭ 20:00 ގައެވެ. އަދި އެމްއެންޔޫއެސްޔޫގެ ހިންގާ ކޮމެޓީގެ މެމްބަރުންނާއި އެމްއެންޔޫ ކައުންސިލްގައި ދަރިވަރުން ތަމްސީލްކުރާ މެމްބަރުންނާއި އެފްއީގެ ލެކްޗަރާއިން ވެސް މިޝޯ ބަލާލުމުގައި ބައިވެރިވިއެވެ.
މި ފަހަރަކީ ވަކި ތީމަކަށް ހާއްސަކޮށްގެން ހަވާސް ޝޯ ބޭއްވި ފުރަތަމަ ފަހަރެވެ. އެގޮތުން މިއަހަރުގެ ޝޯގެ ތީމެއްގެ ގޮތުގައި ކަނޑައެޅީ ރެޓްރޯއެވެ. ޝޯ ފެށިގެން ދިޔައީ ޓީޗަރުންގެ ދުވަހުގެ ހާއްސަ ލަވައިންނެވެ. ލަވައިގެ ޅެމާއި ކޮރިއޯގްރަފީ ހަދާފައިވަނީ އެފްއީގެ ދަރިވަރުންނެވެ. ލަވައިގެ ރެކޯރޑިން ހަދާފައިވަނި ޓޮނިކް ލައިވް ސްޓޫޑިއޯއިންނެވެ.
އެހެން އަހަރުތަކޭ ވެސް އެއްގޮތަށް މި ޝޯގައި އެފްއީ ދަރިވަރުންގެ ތަފާތު ހުނަރުތައް ވަނީ ދައްކާލާފައެވެ. އެގޮތުން އެފްއީ ދަރިވަރުންގެ ލަވަސެޓްތަކާއި ޑްރާމާތައް ވަނީ ދައްކާލާފައެވެ. އަދި އެފްއީގެ ފިރިހެން ކުދިންގެ ހާއްސަ އައިޓަމް، ”ބަދިގެ ބްރޯސް“ މިފަހަރުވެސް ވަނީ ގެނެސްދީފައެވެ. އަދި އެފްއީ އަންހެން ފުޓްސަލް ޓީމުގެ އައިޓަމެއް ވެސް ވަނީ ދައްކާލާފައެވެ. ހަމައެއާއެކު އަހަރުތަކެއްގެ މެދުކެނޑުމަކަށްފަހު އެފްއީ ލެކްޗަރާއިންގެ ހާއްސަ އައިޓަމެއް ވެސް މިފަހަރުގެ ޝޯއިން ވަނީ ފެނިގެން ގޮސްފައެވެ. މީގެ އިތުރުން އެމްއެންޔޫގެ އެހެން ބައެއް ފެކަލްޓީތަކުން ވެސް ވަނީ ޝޯގައި ބައިވެރިވެފައެވެ. އެގޮތުން އެމްއެންޔޫ ބީއެސްގެ ބޮޑުބެރު އައިޓަމެއްގެ އިތުރުން އެފްއެޗްޓީއެސްގެ ލަވަސެޓެއް ވެސް ޝޯގައި ވަނީ ފެނިގެން ގޮސްފައެވެ.
ޝޯގައި ވާހަކަ ދައްކަވަމުން ފެކަލްޓީ އޮފް އެޑިއުކޭޝަންގެ ޑީން، މަރިޔަމް ފިޒާނާ ރަޝީދު ވިދާޅުވީ އެފްއީ އަކީ ހާއްސަ ފެކަލްޓީއެއް ކަމަށާއި އެފްއީ ހާއްސަވަނީ އެހެން ހުރިހާ ފެކަލްޓީތަކުގެ ކުދިންނާ ވެސް ގުޅިގެން އެފްއީގެ ދަރިވަރުން މަސައްކަތް ކުރާތީ ކަމަށެވެ. މީގެ އިތުރުން ފެސާގެ ރައީސާ މަރިޔަމް ވަޖާހާ ވިދާޅުވީ މިފަދަ ޝޯއެއްގެ ސަބަބުން ދަރިވަރުންގެ މެދުގައި ގުޅުން ބަދަހިވެ އެކުދިންގެ ހުނަރު ދައްކާލަން ފުރުސަތުތަށް ލިބިގެންދާކަމަށެވެ. އަދި މިފަދަ ޝޯއެއް ބޭއްވުމުގައި އެމްއެންޔޫއެސްޔޫއާއި އެފްއީގެ އިތުރުން ދަރިވަރުންގެ ފަރާތުން ލިބޭ އެއްބާރުލުމަށް ވަނީ ޝުކުރު އަދާކުރައްވާފައެވެ.
”މިފަދަ ޝޯއެއްގެ ތެރެއިން ދަރިވަރުންގެ ހުނަރު ދައްކާލުމުގެ އިތުރުން ދަރިވަރުންގެ މެދުގައި ގުޅުން ވެސް ބަދަހިވޭ. އެއީ ވަރަށް އުފާކުރާ ކަމެއް އަސްލު،“ ވަޖާހާ ވިދާޅުވިއެވެ.
ހަވާސް ޝޯއަކީ 2014 ވަނަ އަހަރުން ފެށިގެން އެފްއީގައި ބާއްވަމުން އަންނަ ޝޯއެކެވެ.
ލިޔުނީ: އިބްރާހިމް އުމަރު
މީޑިއާ ކޯރޑިނޭޓަރ، ފެސާ
