މިއަހަރުގެ ގައުމީ ދުވަސް ފާހަގަ ކުރުމަށް ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ)އިން އިންތިޒާމްކޮށްގެން ބޭއްވި މަޒުމޫނު ލިޔުމުގެ މުބާރާތުގެ އެއްވަނަ ފެކަލްޓީ އޮފް އެޑިއުކޭޝަންގެ ދަރިވަރު، އައިމިނަތު ސަޖުހާ ހޯދައިފިއެވެ.
މިމުބާރާތުގެ އެއްވަނައަށްދާ ފަރާތަކަށް ވަނީ އަގުހުރި އިނާމެއް ކަނޑައެޅިފައެވެ. މި އިނާމު ސަޖުހާއަށް ހަވާލުކޮށްދެއްވީ އެމްއެންޔޫއެސްޔޫގެ ނައިބު ރައީސް (އަމަލީ) އާދަމް ރުޝްދީއެވެ.
ގައުމިއްޔަތު ތީމަކަށް ކަނޑައެޅި މިމުބާރާތަށް މަޒުމޫނު ހުށަހެޅުމަށް ހުޅުވާލީ މި އަހަރުގެ ގައުމީ ދުވަހުން ފެށިގެން 2 ނޮވެމްބަރުގެ ނިޔަލަށެވެ. މި މުބާރާތަށް ސަޖުހާ ހުށަހެޅި މަޒުމޫނުގެ ނަމަކީ ”ދިވެހި ސަޤާފަތް“ އެވެ.
މި މުބާރާތަށް ހުށަހެޅި މަޒުމޫނުތަކަށް މާރކްސް ދެއްވީ ފެކަލްޓީ އޮފް އެޑިއުކޭޝަންގެ ލެކްޗަރާއިންގެ ޕެނަލްއަކުންނެވެ.
މިފަދަ މުބާރާތެއް ހުޅުވާލުމުގެ މަގުސަދަކީ ދަރިވަރުންގެ މެދުގައި ގައުމީ ރޫހު އާލާކޮށް ދިވެހި ބަހަށް ދަރިވަރުން ހިތްޖައްސުވުމެވެ. ންަމަވެސް މިފަދަ މުބާރާޓްތަކަށް ލިބޭ ތަރުހީބު އަދިވެސް ކުޑަކަން ވަޖާހާ ފާހަގަ ކުރެއްވިއެވެ.
މި މުބާރާތުގައި ސަޖުހާ ލިޔުނު މަޒުމޫނު އެމްއެންޔޫއެސްޔޫގެ ވެބްސައިޓްގައި ޝާއިއު ކުރުމަށް ވަނީ ހަމަޖެހިފައެވެ.
ލިޔުނީ: އިބްރާޙިމް އުމަރު
މީޑިއާ ކޯރޑިނޭޓަރ، ފެސާ
