ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން ( ފެސާ ) ގެ ފަރާތުން އިސްނަގައިގެން ފެކަލްޓީ އޮފް އެޑިއުކޭޝަންގެ ބައެއް ބެޗްތަކުގައި ކިޔަވާ ދަރިވަރުން ކިޔެވުމަށް ތައްޔާރުކުރި ތަފާތު ގޭމުތަކާއި ސެން ކުދިން ކިޔެވުމަށް ބޭނުން ހިފޭނެ ފޮތްތަކާ މީގެ އިތުރުން ކިޔަވައިދިނުމުގައި ބޭނުން ކުރެވޭނެ ތަފާތު އާލާތްތަށް ތާޖުއްދީން ސްކޫލްގެ ސްޕެޝަލް އެޑިއުކޭޝަން (ސެން) ކްލާހަށް ހަދިޔާ ކޮށްފިއެވެ.
ފެސާ އެކްސްކޯގެ ބައެއް މެމްބަރުންނާއި ފެސާ ލީޑަރުންގެ ތެރެއިން ބައެއް ކުދިންނާއެކު އިއްޔެ ބޭއްވި ކުޑަ ރަސްމިއްޔާތެއްގައި މި ތަކެތި ހަވާލްކޮށްދީނީ އެފްއީ ދަރިވަރުންނެވެ. އަދި މިރަސްމިއްޔާތުގައި ތާއްޖުއްދީން ސްކޫލްގެ ސީނިއަރ މެނޭޖްމަންޓް ޓީމުގެ ފަރާތުން ބައެއް ބޭފުޅުން ބައިވެރިވެފައިވާއިރު އެސްކޫލްގެ ފަރާތުން މިގޭމުތަކާ ހަވާލުވެލެއްވީ އެ ސްކޫލްގެ ސެން ޓީޗަރ އައިޝަތު ރައުނާއެވެ.
މި ގޭމުތަކަކީ 2017 ވަނަ އަހަރުގެ ޖެނުއަރީ ބެޗްގައި ކިޔެވުން ފެށި ބެޗެލަރ އޮފް ޓީޗިންގ ސެކަންޑަރީ އާއި ބެޗެލަރ އޮފް އެޑިއުކޭޝަން ޕްރައިމަރީއާއި އަދި 2018 ވަނަ އަހަރުގެ ޖެނުއަރީ ބެޗްގައި ކިޔެވުން ފެށި ބެޗެލަރ އޮފް އެޑިއުކޭޝަން ޕްރައިމަރީ ކުދިން އެކުދިންގެ ބައެއް އެސައިންމެންޓްތަކުގައި ކިޔަވާދިނުމުގެ ވަސީލަތެއްގެ ގޮތުގައި ބޭނުންކުރި އާލާތްތަކެކެވެ.
މި އިވެންޓަށްފަހު ފެސާގެ ރައީސާ މަރިޔަމް ވަޖާހާ ވާހަކަ ދައްކަވަމުން ވިދާޅުވީ ”މިކަހަލަ ޓީޗިން އެއިޑްސްތަށް އަސްލު އުކާނުލާ ދެވަނަ ފަހަރަށް ބޭނުން ކުރެވޭނެ ގޮތަށް ސްކޫލްތަކަށް ހަދިޔާ ކުރުމަކީ ކިޔަވާ ކުދިންނަށް ވެސް ކިޔެވުމުގަ ލިބިގެންދާނެ އިތުރު ތަޖުރިބާއަކަށް ވެގެންދާނެ“ކަމަށެވެ.
އަދި ދަރިވަރުންގެ މިފަދަ އުފެއްދުންތެރި މަސައްކަތްތައް އުކާލުމުގެ ބަދަލުގައި އެތަކެތި ސްކޫލުތަކަށް ހަދިޔާ ކުރުމަކީ އެތަކެތީގެ ބޭނުން ހެޔޮގޮތުގައި ހިފޭނެކަމެއްގެ ގޮތުގައިވެސް މަރިޔަމް ވަޒާހަ ފާހަގަކުރެއްވިއެވެ.
ލިޔުނީ: އިބްރާހިމް އުމަރު
މީޑިއާ ކޯރޑިނޭޓަރ، ފެސާ
