ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން އިންތިޒާމްކޮށްގެން ބާއްވާ އިންޓަރ ފެކަލްޓީ ވޮލީ މުބާރާތުގައި ވާދަކުރާ ފެކަލްޓީއޮފް އެޑިއުކޭޝަންގެ ދެ ޑިވިޝަންގެ ޓީމު ތަކަށް ޖާޒީ ހަވާލު ކޮށްދެއްވައިފިއެވެ.
އަންހެން ޑިވިޝަންގައި ވާދަކުރާ އެފް.އީގެ ޓީމަށް ޖާޒީ ހަވާލު ކުރައްވައިފައި ވަނީ އެމް.އެން.ޔޫ ކައުންސިލް މެންބަރ އަލްފާޞިލް އިބްރާހިމް ޣާނިމް ޝާހިދެވެ. އަދި ފިރިހެން ޑިވިޝަންގައި ވާދަކުރާ ޓީމަށް ޖާޒީ ހަވާލުކޮށްފައިވަނީ އެމް.އެން.ޔޫ އެސް.ޔޫގެ އެޑްވައިޒަރީ ބޯޑުގެ މެންބަރ މިދުއާމް ސައުދެވެ. އަދި މި ރަސްމިއްޔާތުގައި ވަނީ ދެޓީމްގެ ކޯޗުންނާއި އޮފިޝަލުންނަށްވެސް ޖާޒީ ހަވާލު ކޮށްފައެވެ.
އަދި ޚާއްސަ އައިޓަމެއްގެ ގޮތުގައި މި ރަސްމިއްޔާތުގައިވަނީ، ދަރިވަރުންނާ ބަހައްޓަވާ ގާތް ކަމާއި ކަންތައްތަކުގައި ދަރިވަރުންނަށް ދެއްވާ އެއްބާރުލުން ފާހަގަ ކޮށް ފެކަލްޓީއޮފް އެޑިއުކޭޝަންގެ ޑީން ފިޒާ މިސް އަށް ޚާއްސަ ޖާޒީއެއް އަރުވައިފައެވެ.
އެޑްވައިޒަރީ ބޯޑުގެ މެންބަރު މިދުއާމްގެ ވާހަކަފުޅު ދެއްކެވުމުގައި ފާހަގަ ކުރައްވާފައިވަނީ، އެފްއީ އަކީ އެއްޒަމާނެއްގައި ކިޔެމުގައިވެސް އަދި ކުޅިވަރުގައިވެސް އެހެން ފެކަލްޓީ ތަކުން ނަމޫނާއަކަށް ބަލައިގަންނަ ފެކަލްޓީ އެއްކަމާއި މިހާރު އެފްއީގައި އޮތް ޓީމަކީ އެފްއީ އަލުން އެހިސާބަށް ގެންދެވޭނެ ޓީމެއްކަމުގައެވެ.
އަދި ދެޓީމްގެ ދެ ކެޕްޓަނުންގެ ވާހަކަ ދެއްކެވުމުގައި ފާހަގަ ކޮށްފައިވަނީ، ފަރިތަކުރުންތައް ފެށިއިރާއި އަޅާބަލާއިރު ޓީމްތަކުގެ ކުޅުން ވަރަށް ބޮޑަށް ރަނގަޅުވެފައިވާކަމަށެވެ. އަދި ކޮންމެ ނަތީޖާއެއް ލިބުނަސްވެސް އަޚުލާޤީ ގޮތުން އެހެން ޓީމްތަކަށް ނަމޫނާ ދެއްކުމަށް ކެޕްޓަނުންގެ ވާހަކަތަކުގައިފާހަގަ ކޮއްފައިވެއެވެ. އަދި ހިތްވަރާއި އަޒުމާއިއެކު މަސައްކަތް ކޮއްފިނަމަ ތަށްޓާ ހަމައަށް ދެވޭނެ ކަންވެސް ވަނީ ފާހަގަ ކޮއްފައެވެ.
ލިޔުނީ: ޢަލީ ޢާރިފް
މީޑިއާ ކޯޑިނޭޓަރ، ފެސާ
