ފޭރާމެއްގެ ފުރިހަމަކަން ނުވަތަ ދެރަކަން ކަނޑައަޅާނީ އެ ފޭރާމެއް ވިޔެފައިވާ ރޮއްޖެއްގެ ފެންވަރަކުންނެވެ. ހަމަ އެގޮތަށް ޤައުމެއްގެ އިޖުތިމާއީ ފޭރާމުގެ ހަރުދަނާކަން ނުވަތަ ދޯހަޅިކަން ކަނޑައަޅާނީ އެ ފޭރާން ވިޔެފައިވާ ރޮދި ކަމުގައިވާ ޤައުމުގެ ޒުވާނުންގެ ފެންވަރުންނެވެ. ތަޢުލީމީ ފެންވަރާއި ތަރުބިއްޔަތުގެ ފެންވަރުންނެވެ. މިކުދިންގެ މި ފެންވަރުތައް ރަނަގަޅު ކުރުމުގެ ޒިންމާ އަދާ ކުރައްވަމުން އެ ގެންދަވާ އަތްކަންތެރިންނަކީ މުދައްރިސުންނެވެ. ޤައުމުގެ އިޖުތިމާއީ ފޭރާން ހަރުދަނާ ކުރުމުގެ ބުރަ މަސްއޫލިއްޔާތު އަދާކުރައްވަމުން އެ ގެންދަވަނީ އެދުރުންނެވެ. އެހެންކަމުން ބައިނަލްއަޤުވާމީ ގޮތުން މިއަދު ފާހަގަ ކުރަމުން މި ގެންދާ މުދައްރިސުންގެ ދުވަހުގެ ތަހުނިޔާއާއި މުބާރިކްބާދީ ހުރިހާ މުދައްރިސުންނަށް އަރިސް ކުރަމެވެ.
ކޮންމެ އަހަރެއްގެވެސް އޮކްޓޯބަރ މަހުގެ 5 ވަނަ ދުވަސް ފާހަގަ ކުރަމުން މި ގެންދަނީ ބައިނަލްއަޤުވާމީ މުދައްރިސުންގެ ދުވަހުގެ ގޮތުގައައެވެ. މިގޮތަށް މި ދުވަސް ފާހަގަ ކުރެވެމުން އަންނައިރު އަޅުގަނޑުމެން ވިސްނައިލަން ޖެހޭ ކަމަކީ މިގޮތަށް ފާހަގަ ކުރެވޭ ދުވަހެއްގައި ގަތާލެވޭ ބަހުގެ ހާރަކުން މުދައްރިސުން އަހަރު ދުވަހު ވީ ޤުރުބާނީގެ އަގު ވަޒަން ކުރެވޭނެތޯއެވެ؟ އަމިއްލަ ދިރިއުޅުމަށްވުރެ ވަޒީފާގެ މަސްއޫލިއްޔާތުތައް އިސްކޮށް ދަރިވަރުންގެ ހައްޤުގައު ހޭދަ ކުރެވުނު ވަގުތުތަކުގެ އަގު އެންމެ ދުވަހަކުން އަދާކުރެވޭނެތޯއެވެ؟ ނުކުރެވޭނެ ނޫންތޯއެވެ؟ އޭގެ އަގު ވަޒަން ކުރެވޭ މިންވަރު ކަނޑައަޅާނީ އުނގަންނައިދެވުނު ޢިލްމެއްގެ ސަބަބުން ފަރުދުންގެ ހަރުދަނާކަން އިތުރުވަމުން އަންނަ މިންވަރުންނެވެ. އެހެނީ ޤައުމު ހިންގުމަށް މަޤާމު ތަކަކަށް ބަޔަކު އައްޔަން ކުރެވިފައި ތިބި ކަމުގައި ވިޔަސް ޤައުމުގެ ހަގީގީ އާރުކާޓީންނަކީ އެދުރުންނެވެ.
ހަނގުރާމަވެރިއަކު ހަނގުރާމައިގެ މައިދާނަށް ނުކުންނާނީ ކަނޑި ތަކާއި ކުރިމަތިލާން ޖެހޭނެކަން ދަނެ ހުރެއެވެ. މަސްވެރިން ކަނޑުމައްޗަށް ނުކުންނާނީވެސް ކޮޅިގަނޑުގަނޑާއި ކުރިމަތިލާން ޖެހޭނެކަން ދަނެގެންނެވެ. ހަމަ އެފަދައިން މުދައްރިސުންވެސް މަސައްކަތުގެ މައިދާނަށް ނުކުންނަނީ ދިމާވެދާނެ އެންމެހައި ގޮންޖެހުންތަކާއި ކުރިމަތި ލުމުގެ ފުރިހަމަ ހިތްވަރާއެކުގައެވެ. މިކަމުގެ އެންމެ ރަނގަޅު ހެތްކަކަށް ވާނީ މިއަހަރު ކޯވިޑް19 އާއި ގުޅިގެން ކުރިމަތިވި ފުރަބަންދުގައި މުދައްރިސުން ދެއްކެވި ނަމޫނާއެވެ. އަމިއްލަ ދިރިއުޅުމުގެ އެކިއެކި ގޮންޖެހުންތަކާއެކުވެސް ކިޔަވައިދިނުމުގެ މަސްއޫލިއްޔާތު އެންމެ ފުރިހަމަ އަށް އެބޭފުޅުން ވަނީ އަދާ ކުރައްވާފައެވެ. މިއަހަރުގެ މުދައްރިސުންގެ ދުވަހުގެ ޝިއާރެއްގެ ގޮތުގައި ޔުނެސްކޯ އިން ހަމަ ޖައްސާފައި ވަނީ ”ޓީޗާސް: ލީޑްސް އިން ކްރައިސިސް، ރި އިމޭޖިނިންގް ދަ ފިއުޗާ“. މުދައްރިސުންނަކީ ކުރިމަގުގެ ތަސައްވުރަށް ވިސްނައި، ދިމާވާ ކޮންމެ ހާލަތެއްގައިވެސް އިސްނަގައި ލީޑް ކުރަމުން އަންނަ ފަހުލަވާނުން ތަކެކެވެ.
މަތީގައި ބަޔާން ކުރެވުނު ހުރިހާ ވާހަކަތަކެއްވެސް ހެކި ދެނީ ޤައުމު ބިނާ ކުރުމުގެ އެންމެ މުހިންމު ދައުރެއް އަދާ ކުރާ ބަޔަކީ މުދައްރިސުން ކަމެވެ. ދިމާވާ ހުރިހާ ގޮންޖެހުންތަކަށް އިންސާފު ކުރަމުން އެބޭފުޅުން އަދާ ކުރައްވަމުން އެ ގެންދަވަނީ ޤައުމީ މަސައްކަތެއް ކަމެވެ. އަމިއްލަ ދަރިން ކަމުގައި ނުވިނަމަވެސް މައިވަންތަ ކަމުގެ ލޯތްބާއި ކުލުނާ އެކު ތައުލީމީ ދަންމަރުގެ އަލި ހަޔާތުގައި ގަދަ ކޮށްދެއްވަމުން އެ ގެންދަވަނީ އެބޭފުޅުންނެވެ. ޤައުމުގެ ނަވުގެ ހުންގާނުގައި ހިފަން ތިބި މާލިމީންނަށް ނެވިކަން އުނގަންނަވައިދެއްވަން ތިއްބެވި އާރުކާޓީންނަކީ އެދުރުންނެވެ. އަދިވެސް އެއްފަހަރު ފާހަގަ ކުރެވެމުންދާ އެދުރުންގެ ދުވަހުގެ ތަހުނިޔާ އެންމެހައި އެދުރުންނަށް އަރިސްކުރަން!
ލިޔުނީ: ޢަލީ އާރިފް،
މީޑިއާ ކޯޑިނޭޓަރ، ފެސާ، އެމް.އެން.ޔޫ.އެސް.ޔޫ
