ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި ސޮސައިޓީ އޮފް ޝަރީޢާ އެންޑް ލޯ އިން 1442 ވަނަ އަހަރުގެ ރަމަޟާން މަހަށް ޙާއްޞަކޮށްގެން ބާއްވާ މުބާރާތުގައި ފެކަލްޓީ އޮފް އެޑިއުކޭޝަން (އެފް.އީ)އިން ބައިވެރިވެއްޖެއެވެ.
ޖުމްލަ 69 ދަރިވަރުންގެ ބައިވެރިވުމާއެކު ކުރިއަށްގެންދާ މި މުބާރާތް ހިގަމުންދަނީދިވެހިރާއްޖޭގެ ޤައުމީ ޔުނިވަރސިޓީގެ އޮޑިޓޯރިޔަމްގައެވެ. ކޯވިޑް 19 ގެ މި ދަނޑިވަޅުގައި ޔުނިވަރސިޓީގެ 2021 ގެ ފުރަތަމަ ސެމިސްޓަރގެ ކިޔެވުން އޮންލައިންކޮށް ގެންދިޔުމަށް ހަމަޖެހިފައިއޮތުމުން ގިނަ ދަރިވަރުން ރަށުގައި ތިބުމުން ގިނަ ބައިވެރިންނަށް ފުރުޞަތު ދިނުމަށްޓަކައި މުބާާރަތުގައި އޮންލައިން ކިޔެވުމަށް ވެސް ވަނީ ހަމަޖެހިފައެވެ. އެގޮތުން އޮންލައިންކޮށް ކިޔެވުން ކުރިއަށްގެންދިޔުމަށް ހަމަޖެހިފައިވަނީ އޭޕްރީލް 11 ވާ އާދީއްތަ ދުވަހުގައެވެ.
އެފް.އީ އިން މި މުބާރާތުގައި ބައިވެރިވެފައިވަނީ 12 ދަރިވަރުންނެވެ. މިހާތަނަށް ބޭއްވުނު ދެ ސެޝަނުގައި ވެސް އެފް.އީ ގެ ދަރިވަރުން ވަނީ ކިޔަވުން ފުރިހަަމަކޮށްފައެވެ. ހުކުރު ދުވަހު ހަވީރުގެ ދަންފަޅީގައި އަދި ރޭގަނޑުގެ ދަންފަޅީގައި އެފް.އީގެ ދަރިވަރުން ވަނީ ކިޔަވާފައެވެ. އާދީއްތަ ދުވަހު މުބާރާތުގައި އޮންލައިންކޮށް ކިޔަވާ ދަންފަޅީގައި ވެސް އެފް.އީ ގެ ދަރިވަރުން ކިޔަވާނެއެވެ. މިފަދަ މުބާރާތަކަށް އެފް.އީގެ ދަރިވަރުން ރަމްޒުކުރުމަށް ބައިވެރިވި ހުރިހާ ދަރިވަރުންނަށް ޝުކުރު ދަންނަވަމެވެ.
މި މުބާރާތުގެ ހުރިހާ ބައިވެރިންނަށް ހަނދާނީ ލިޔުމަކާއެކު މުސްޙަފެއް ދެވުނެއެވެ. މުޅި މުބާރާތުން ބަލަައިގެން ކިޔެވުމުގެ ގޮފިންނާއި ނުބަލައި ކިޔެވުމުގެ ގޮފިން އެކި ވަނަތަށް ހޮވުމަށް ވަނީ ހަމަޖެހިފައެވެ. އަދި އެންމެ މޮޅު 3 ފެކަލްޓީ ހޮވުމަށް ވެސް ވަނީ ހަމަޖެހިފައެވެ.
