ދިވެހި ރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަން (އެމް.އެން.އެސް.ޔޫ) އިން ބާއްވާ ދެވަނަ ބޮޑު މުބާރާތް ”އެމް.އެން.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2021 “ ގެ އަންހެން ޑިވޝަންގެ ގްރޫޕް ސްޓޭޖްގެ މެޗްތައް ކުޅުމަށްފަހު ސެމީ ފައިނަލްއިން، ފެކަލްޓީ އޮފް އެޑިއުކޭޝަން (އެފް.އީ) ޖާގަ ކަށަވަރުކޮށްފައިވަނީ، ހޮނިހިރު ދުވަހުގެ ހަވީރު އެމް.އެން.ޔޫ އެފް.އީ ޕީއީ ހޯލްގައި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އާއެކު ކުޅެވުނު ގްރޫޕް ސްޓޭޖްގެ ފަހު މެޗްގެ 2 ސެޓްވެސް ފަސޭހަކަމާއެކު ކާމިޔާބުކޮށްގެންނެވެ.
މި މެޗްގެ މޮޅު ކުޅުންތެރިޔާއަކަށް ހޮވުނީ އެފް.އީ ގެ ކުޅުންތެރިޔާ ޖާޒީ ނަންބަރު 7 ، ޝިރާނީ އަބްދުﷲ އެވެ. މެޗް ނިންމުމަށްފަހު އުފާވެރިކަމުގެ އިޙްސާސްތައް ފާޅުކުރަމުން ޝިރާނީ ބުނެފައިވަނީ ކުޅުމާ މެދު ހިތްހަމަޖެހޭ ކަމަށާއި ސެމީ ފައިނަލްގައި މޮޅު ކުޅުމެއް ދައްކާނެކަމަށެވެ.
”އެފް.އީ ގެ ކޯޗްކަމާ ހަވާލުވެ ކޯޗްކަން ކުރާތާ ދެވަނަ އަހަރު މިއީ.ފުރަތަމަ އަހަރުގެ ޓީމަށްވުރެ މިފަހަރުގެ ޓީމް އަލްހަމްދުﷲ، ވަރަށް ބޮޑުތަންވެސް ރަނގަޅު.“ މެޗަށްފަހު ސެމީ ފައިނަލްއަށް ދަތުރުކުރުމުން ފެކަލްޓީ އޮފް އެޑިއުކޭޝަން ސްޓޫޑަންޓް އެސޯސިއޭޝަން (ފެސާ) އަށް ދެއްވި އިންޓަވިއުގައި އެފް.އީ ޓީމްގެ ކޯޗް، އަބްދުލް ހަސީބް ބުންޏެވެ.
މި މުބާރާތް ޓީމްއާއެކު ފެށީވެސް ގްރޫޕް ސްޓޭޖްގެ މެޗްތަައް ފަހަނައަޅައި ސެމީ ކުޅެ އަދި ފައިނަލްވެސް ކުޅުމުގެ ފޮނި އުއްމީދާއެކު ކަމަށް ކޯޗް ހަސީބް ބުންޏެވެ. ފިޔަވަޅަކަށްފަހު ފިޔަވަޅެއް އަޅައި ކުރިއަރައިދިޔުމަށް ބޭނުންވާކަމަށާއި މުބާރާތުގެ ސެމީފައިނަލަށް އާދެވުނީތީ ވަރަށް އުފާކުރާކަމަށް ކޯޗް ބުންޏެވެ.
”ކޯޗް ޓީމްގެ ހުރިހާ ކުޅުންތެރިންގެ ގާތުގައި ބުނަމުން އައީ މިފަހަރު ޓީމުގައި ފެންވަރު އެބަހުރި، ރަނގަޅަށް ކޯޗް ބުނެދިން ގޮތަށް ކުޅެފިނަމަ ގްރޫޕް ސްޓޭޖް ނިންމުމަށްފަހު އެއަށްވުރެ މައްޗަށް ދެވޭނެވަރުގެ ފެންވަރު ހުރި ޓީމެއް މިއީ.“ ކޯޗް ހަސީބް ބުންޏެވެ.
ޖުމްލަ ގޮތެއްގައި އެފް.އީ ގެ ޓީމާ މެދު ދެކޭގޮތް ހާމަަކޮށް ކޯޗް ބުނީ ފަރިތަކުރަން ލިބުނު ދުވަސްކޮޅާ އަދި ކުޅުންތެރިން ފަރިތަކުރުންތަކަށް ދީފައިވާ އަހައްމިއްޔަތުކަމަށް ބަލައި ޓީމް ޓީމެއްގެ ގޮތުގައި ފެންނަނީ ވަރަށް ރަނގަޅަށެވެ.
”ވަކި ކުޅުންތެރިން މޮޅުނުވެދާނެ އެކަމަކު މުޅި ޓީމް ކޯޓަށް އަރާ ކުޅެނީ ވަރަށް މޮޅަށް. އަޅުގަނޑުމެންގެ ޓީމުގައި ހިމެނެނީ ހަމައެކަނި މި މުބާރާތުގައި ކުޅެފައިވާ ކުދިންެ. އެފް.އީ ގެ ޓީމަކީ ވަރުގަދަ ޓީމެއް.“ ކޯޗް ހަސީބް ބުންޏެވެ.
ކޯޗްގެ އުއްމީދަކީ އެފް.އީ ފައިނަލްގައި ކުޅެ، ޑްރީމް ޓީމްގައި އެފް.އީ ގެ ނަންކިޔައި އެފް.އީ ގެ ކުޅުންތެރިއެއް ހުރުމެވެ.
ވޮލީބޯޅައިގެ މެޗެއްގައި ސެޓަރަކަށް މެޗްގެ މޮޅު ކުޅުންތެރިއެއްްގެ ގޮތުގައި ހޮވުމަކީ ވަރަށް މަދުން ނޫނީ ނުވާ ކަމެކެވެ. މި ޝަރަފް ވަނީ އެފް.އީ ގެ ޖާޒީ ނަންބަރު 9 ، ފާތިމަތް މަޒީނާ ހޯދާފައެވެ. އޭނާއަށް މި ޝަރަފް ގްރޫޕް ސްޓޭޖްގެ ފުރަތަމަ މެޗްގައި ހޯދި މޮޅާއެކު ވަނީ ލިބިފައެވެ. މަޒީނާ ބުނެފައިވަނީ މިއީ ކުޅިވަރެއްގައި މޮޅު ކުޅުންތެރިއެއްގެ މަޤާމް އެންމެ ފުރަތަމަ ލިބުނު ފަހަރު ކަމަށެވެ. އެހެންކަމުން ވަރަށް އުފާ ކުރާކަމަށާއި ޤަބޫލުކުރަންވެސް ދަތިވިކަމަށް މަޒީނާ ބުންޏެވެ.
މި ފަހަރު މެޗްތަކުގައި އެފް.އީ އަށް ތަރުހީބު ދިނުމަށް އެފް.އީ ގެ ދަރިވަރުން އައިސްފައިވަނީ މަދުންނެވެ. މުބާރާތް ކާމިޔާބުކުރުމަށް ސަޕޯޓަރުންގެ ހިތްވަރާއި ތަރުހީބަކީ ވަރަށް މުހިއްމު ބާރެކެވެ. މުބާރާތް ބޭވިފައި މިވާ ދުވަސްކޮޅަކީ އެފް.އީ ގެ ގިނަ ދަރިވަރުން ޓީޗިން ޕްރެކްޓިސް ހަދަމުންދާ ބުރަ ދުވަސްކޮޅަކަށްވީ ނަމަވެސް މުޅި އެފް.އީ ޓީމްގެެ އުއްމީދަކީ އަދި އެދުމަކީ، ސެމީ ފައިނަލް އަށް އެފް.އީގެ ޓީމަށް ތަރުހީބު ދިނުމަށްޓަކައި އައުމެވެ.
ސެމީ ފައިނަލް މެޗް ކުޅުމަށް ހަމަޖެހިފައިވަނީ އަންގާރަ ދުވަހުގެ ރޭ، ގްރޫޕް ބީ ގެ އެއްވަނަ ޓީމް ސުކޫލް އޮފް ނާރސިންގްއާ އެކުއެވެ.
