”ސުވާސްތި“ އާއެކު ފެސާ އަދި ސިއާގެ ހަރަކާތްތަކުގެ ފުރަތަމަ ހަރަކާތް ނިންމާލައިފި

ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަން (ފެސާ) އަދި ސްޓޫޑެންޓް އިނީޝިއޭޓިވް އޮފް އަރޓްސް (ސިއާ) އާއި ގުޅިގެން ހިންގި ”ސުވާސްތި“ އާއެކު މިއަހަރުގެ ފުރަތަމަ ހަރަކާތް ނިންމާލައިފިއެވެ.

”ސުވާސްތި“ މި ހަރަކާތަކީ ފެސާ އަދި ސިއާ އާއި ގުޅިގެން ފެކަލްޓީތަކަށް އަލަށް ގުޅުނު ދަރިވަރުންނަށް ޚާއްސަކޮށްގެން ދަރިވަރުންނަށް މަރުހަބާ ކިޔައި ގުޅުން ބަދަހި ކުރުމަށް ބޭއްވުނު ހަރަކާތެކެވެ.

20 ފެބުރުވަރީ ވީ އާދިއްތަ ދުވަހުގެ ރޭ ޕީއީ ހޯލްގައި ބޭއްވުނު މި ހަރަކާތުގައި ތަފާތު މަޖާ ކުޅިވަރުތަކުންނާއި ރޭވިފައި ހުރި ހަރަކާތްތަކުން ދަރިވަރުން އެކަކު އަނެކަކަށް ތަޢާރަފްވުމަށް ފުރުޞަތު ލިބިގެން ދިއުންވީ ދަރިވަރުން ވަރަށް ގަޔާވި ކަމަކަށެވެ. ހަމަ މިއާއެކު ދެގޮފީގެ ހިންގާ ކޮމިޓީގެ މެމްބަރުންގެ ތަޢާރަފެއްވެސް ވަނީ ދަރިވަރުންނަށް ދީފައެވެ.

މި ހަރަކާތުގައި ގޭމްތައް ކުޅުމަށްފަހު ޕިއްޒާ ޕާޓީއެއް ބޭއްވުނެވެ. އަދި ”ސުވާސްތި“ ހަރަކާތަށް ކަނޑައެޅުނު ތީމް ކަމުގައިވާ ކަނޑުއަޑީގެ ތީމަށް ޚާއްސަ ކޭކެއްވެސް ވަނީީ ފަޅާފައެވެ. އެއަށްފަހު ކުރިއަށް ގެންގޮސްފައިވަނީ ”ސުވާސްތި“ ހަރަކާތަށް ތައްޔާރުކޮށްފައިވާ ފްރޭމްއާއެކު ފޮޓޯ ނެގުމުގެ ސެޝަނެކެވެ.

މި ހަރަކާތުގައި އެމް.އެން.ޔޫ.އެސް.ޔޫ ގެ ރައީސް ހުސެއިން ޒައިދާއި ހިންގާ ކޮމިޓީގެ އެހެން މެމްބަރުން ވަނީ ބައިވެރިވެވަޑައިގެންފައެވެ. ދަރިވަރުން ބައިވެރިވެފައިވަނީ ނިސްބަތުން މަދުން ކަމުގައި ވީނަމަވެސް ފުރިހަމަކޮށް އުފާވެރި އަދި މަޖާ މާހައުލަކާއެކު މި ހަރަކާތް ނިންމާލިކަމަށްޓަކައި ޒައިދު ވަނީ ފެސާ އަދި ސިއާގެ ހިންގާ ކޮމިޓީއަށް ތަޢުރީފްކޮށް ޝުކުރު އަދާކޮށްފައެވެ.

ފެސާގެ ހިންގާ ކޮމިޓީގެ އުއްމީދަކީ މި އަހަރު ބޭއްވިގެންދާ ހަރަކާތްތަކުގައި ފެކަލްޓީ އޮފް އެޑިއުކޭޝަންގައި ކިޔަވާ ދަރިވަރުންގެ ބައިވެރިވުން އިތުރުކޮށް އެފް.އީ އިން ޤާބިލް އިސްވާރުންތަކެއް އުފެދިގެން އައުމެވެ.