ފެސާ އިޝާރާތް މުބާރާތުގެ ޗެމްޕިއަންކަން ނިއަރެސް އިން ހޯދައިފި

ބައިނަލްއަޤްވާމީ މާދަރީ ބަހުގެ ދުވަހާ ގުޅިގެން ކާމިޔާބުކަމާއެކު ފެސާއިން އިންޓަރ ފެކަލްޓީ އިޝާރާތް މުބާރާތް ކުރިއަށްގެންގޮސް ނިންމާލައިފިއެވެ.

ހުކުރު ދުވަހުގެ ރޭ 8:15 ގައި ފެށިގެންދިޔަ މުބާރާތް ބާއްވާފައިވަނީ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައެވެ. މުބާރާތް ޝަރަފްވެރިކޮށްދެއްވާފައިވަނީ ދިވެހިބަހުގެ އެކަޑެމީގެ ކުރީގެ ރައީސް، އަޝްރަފް ޢަލީއެވެ.

މި މުބާރާތުގައި 6 ފެކަލްޓީއަކުން ބައިވެރިވިއިރު، ކޮންމެ ފެކަލްޓީއެއްގެ ޓީމުގައި 5 ދަރިވަރުން ވަނީ ބައިވެރިވެފައެވެ.

މުބާރާތް ފެށުމުގެ ކުރިން މެޗްތަކުގައި ވާދަކުރަންޖެހޭ ޓީމްތައް ކަނޑައެޅުމަށްޓަކައި ކޮންމެ ޓީމެއްގެ މެނޭޖަރުން ފަނޑިޔާރުންގެ މޭޒުން ގުރުއަތުލުމެއް ނެގިއެވެ. މި މުބާރާތުގެ ފަނޑިޔާރުކަން ކޮށްދެއްވާފައިވަނީ ފެކަލްޓީ އޮފް އެޑިއުކޭޝަންގެ ދަރިވަރުން ކަމުގައިވާ، ފާތިމަތު ސަނާ، މާއިޝާ ޢަބްދުލް ޤާދިރު އަދި ޖައުދާ ޖަލީލްއެވެ.

ގުރުއަތުން ފުރަތަމަ މެޗްގައި ވާދަކުރަންޖެހުނީ ”ޝެޓްސް“ އާއި ”އެސް.އެސް.އެލް“ އާއެވެ. ދެވަނަ މެޗްގައި ”ނިއަރެސް“ އާއި ”ބީ.އެސް.އެސްއޭ“ ވާދަކުރިއިރު ތިންވަނަ މެޗުގައި ވާދަކޮށްފައިވަނީ ”ތަރަހަ“ އާއި ”ހީލަރސް“ އެވެ.

އިޝާރާތް މުބާރާތުގެ ޤަވާއިދުގައިވާ ގޮތުގެ މަތިން މުބާރާތް ކުރިއަށް ގެންގޮސްފައިވަނީ 3 ބުރަކަށް ބަހާލައިގެންނެވެ. ފުރަތަމަ ބުރުގައި ކޮންމެ ޓީމެއްގެ، ކޮންމެ ދަރިވަރަކަށް އިޝާރާތް ކުރުމަށް ފުރުޞަތު ދިނުމަށްފަހު ޓީމުން ދިމާކުރަންޖެހުނެވެ. ދެވަނަ ބުރުގައި ކޮންމެ ޓީމަކުންވެސް ކަނޑައަޅާފައިވާ ވަކި ކުއްޖެއް އައިސް، 5 މިނެޓް ތެރޭގައި އިޝާރާތުން ދެއްކުނު އެންމެ ގިނަ ބަހެއް އިޝާރާތުން ދައްކަންޖެހެއެވެ. ތިންވަނަ ބުރުގައި ޓީމުން ކަނޑައަޅާފައިވާ ވަކި ކުއްޖެއް އައިސް އިޝާރާތްކުރުމުން ޖަވާބު ދިމާކުރީ ކަނޑައެޅިފައިވާ ކުއްޖެކެވެ.

އިޝާރާތުން ދައްކަން ޖެހުނު ބަސްތަކުގެ ތެރޭގައި އަދަބީ ބަސްތަކާއި، އާއްމުކޮށް ބޭނުންކޮށްނޫޅޭ ބަސްތަކާއި ބަސްކޯޅިތައް ހިމެނުނެވެ.

ފޯރިގަދަކޮށް ކުރިއަށްގެންދެވުނު މި މުބާރާތުގެ ބައިވެރިން އަދި ބެލުންތެރިންވެސް ގަޔާވި މި މުބާރާތަށް ވަނީ ބޮޑު ތަރުހީބެއް ލިބިފައެވެ.

މި މުބާރާތުގެ ފައިނަލް ބުރަށް ދިޔައީ އެންމެ މަތިން މާކްސް ލިބުން ދެ ޓީމްކަމުގައިވާ،  ހީލަރސް އާއި ނިއަރެސްއެވެ. އެހެން ބުރުތަކާ ތަފާތުކޮށް މި ބުރުގައި އޮތީ ޓީމްގެ ކަނޑައެޅިފައިވާ ދެ ބައިވެރިން އައުމަށްފަހު، އެކަކު ހެޑްސެޓް އަޅުވާފައި އަޑު ނީވޭގޮތަށް ހެދުމަށްފަހު، އަނެއް ބައިވެރިޔާ ވައި އަޑުން ބަސްތައް ބުނެދިނުމެވެ.

ވާދަވެރި ފައިނަލަށްފަހު، ނަތީޖާއިން އެންމެ ޕޮއިންޓެއްގެ ތަފާތުން މުބާރާތް ކާމިޔާބުކުރީ ސްކޫލް އޮފް ނަރސިންގެ ގޮފި، ނިއަރެސްއެވެ.

މުބާރާތް ނިމުމުން ޝަރަފްވެރި މެހެމާން، އަޝްރަފް ޢަލީ ވަނީ ވާހަކަދައްކަވާފައެވެ. އަޝްރަފް ވިދާޅުވިގޮތުގައި ބަހެއް ދިރިދެމެހެއްޓުމުގެ އަސާސު ބިނާވެގެންދަނީ އެބަހެއްގެ އަހުލުވެރިންގެ މަސައްކަތްތަކުގެ މައްޗަށްކަމަށެވެ. ތަރައްޤީކުރުމުގެ ވިސްނުމުގައި އަމިއްލަވަންތަކަން ނަގަހައްޓަން މަސައްކަތް ކުރަންޖެހޭނެކަން ވަނީ ފާހަގަކޮށްފައެވެ.

މުބާރާތަށް އިތުރު ފުރިހަމަކަމެއް ގެނައުމަށްޓަކައި އެއް ގިންތިއެއް އިތުރުކުރުމަށް ވަނީ ލަފާދެއްވާފައެވެ. އެއީ ބަސް ދެއްކުމަށްފަހު މާނަ ބުނެދިނުމަށެވެ. އަދި އޯޑިއެންސްގެ ބައިވެރިވުން ބޮޑުކުރުމަށް ސުވާލުތައް އަމާޒުކުރުމަށް ހިތްވަރުދިނެވެ.

މުބާރާތް ވަރަށް ފުރިހަމަކޮށް އިންތިޒާމްކޮށް ކުރިޔަށްގެންގޮސްފައިވުމުން ފެކަލްޓީ އޮފް އެޑިއުކޭޝަންގެ ޑީންއަށާއި، ފެސާ ހިންގާ ކޮމިޓީއަށް ތަޢުރީފްކޮށް އަޝްރަފް ޢަލީ ވަނީ ޝުކުރު އަދާކޮށްފައެވެ.

މުބާރާތުގެ ބައިވެރިވި ހުރިހާ ޓީމެއްގެ މެމްބަރުންނަށް އެރޭ ވަނީ ހަނދާނީ ލިޔުން ހަވާލްކޮށްފައެވެ. މި ހަނދާނީ ލިޔުންތައް ޓީމްތަކަށް ހަވާލުކޮށްދެއްވީ ފެކަލްޓީ އޮފް އެޑިއުކޭޝަންގެ ޑީން، ޑރ. ވަސީމާ ފިކުރީ އެވެ. އަދި މުބާރާތް ކާމިޔާބުކުރި ޓީމްކަމުގައިވާ ”ނިއަރެސް“ އަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވީ ޝަރަފްވެރި މެހެމާން، އަޝްރަފް ޢަލީ އެވެ.

މުބާރާތް ހުށަހަޅައިދީފައިވަނީ ފެސާގެ ނައިބު ރައީސް (އިތުރު ޙަރަކާތް) މަރްޔަމް މަޢީޝާ އަޙްމަދާއި، ނައިބު ރައީސް (ޢިލްމީ) މަރްޔަމް ޝަބާއެވެ. އަދި މި މުބާރާތް ވަނީ ފެސާގެ ފޭސްބުކް ޕޭޖްއިން ލައިވްކޮށްފައެވެ.

ފެސާގެ ރައީސް، އާމިނަތު ރައުފާ ބުނެފައިވަނީ ކާމިޔާބުކަމާއެކު އަހަރުގެ ފުރަތަމަ ބޮޑު ޙަރަކާތެއް ނިންމާލެވުނީތީ ވަރަށް އުފާވާކަމަށެވެ. ހިންގާ ކޮމިޓީގެ އިތުރުން މި ހަރަކާތަށް އެހީތެރިވެދީފައިވާ ހުރިހާ ފަރާތްތަކަށް ވަނީ ޝުކުރުއަދާކޮށްފައެވެ.