އެހެން އަހަރުތަކުގެ ރޯދަމަސްތަކޭ އެއްފަދައިން މި އަހަރުގެ ރޯދަމަހުވެސް ފެސާ އިން ވަނީ ޚާއްސަ ބައިތަކެއް ގެނެސްދީފައެވެ.
މި ރަމަޟާން މަހުވެސް ފެސާގެ ފޭސްބުކް އަދި އިންސްޓަގްރާމް ޕޭޖުން ކޮންމެ ދުވަހަކުވެސް ވަރަށް ޚާއްސަ ބައިތަކެއް ގެނެސްދެވުނެވެ.
ކުރީ އަހަރުތަކެކޭ އެއްފަދައިން ކޮންމެ ދުވަހަކުވެސް ”ދުވަހުގެ ނަސޭޙަތް 1443″ގެ ގޮތުގައި ޚާއްސަ ބަސްކޮޅެއް ގެނެސްދެވުނެވެ. މިދިޔަ އަަހަރާ ޚިލާފަށް މިއަހަރު ދުވަހުގެ ނަސޭޙަތް ގެނެސްދެވިފައިވާނީ އިނގިރޭސި ބަހުންނެވެ.
”ފެސާ ބަދިގެ“ އަކީ ރަމަޟާން މަހަށް ޚާއްސަކޮށްގެން ފެސާއިން އަބަދުވެސް ގެނެސްދެމުން އަންނަ ބަޔެކެވެ. މި ބައި ގެނެސްދެވިފައިވަނީ ދެގޮތަކަށެވެ. އެއީ “ ކިޗަން ޓިޕްސް“ އަދި “ ކުކިންގް ޓިޕްސް“ އެވެ. “ ކިޗަން ޓިޕްސް“ ޚާއްސަވަނީ ބަދިގޭގައި ކައްކަން އުޅޭއިރު ދިމާވާ ތަފާތު ކަންކަމަށް ހައްލެއް ހޯދުމަށް ނުވަތަ ކަމެއް ދިމާވުމުން ދުރުހެލިކުރުމަށް ދެވޭ ޓިޕްއެއްގެ ގޮތުގައެވެ. ”ކުކިންގް ޓިޕްސް“ އަކީ ކެއްކުމެއް ނުވަތަ ތައްޔާރުކޮށްލާ ކާއެއްޗެއް ނުވަތަ ބުއިމެއް ފުރިހަމަ ވެގެންދާނެ ގޮތްތަކާއި ބެހޭގޮތުން ދެވޭ އާ މަޢުލޫމާތަކެވެ.
ހަފްތާ ބަންދަށް ޚާއްސަކޮށްގެން މި އަހަރުވެސް ”ޕީސް އޮފް ތަދައްބަރް“ ގެ ދެވަނަ ސީޒަން ވަނީ މި އަހަރުވެސް ގެނެސްދީފައެވެ. ރަމަޟާން މަހަކީ ކީރިތި ޤުރުއާން ބާާވައިލައްވަން ފެށުނު މައްސަރުކަމުގައި ވީއިރު ޤުރުއާނާ މެދު ވިސްނާ އޭގެ މާނަ އާއި މެދު ފިކުރު ކުރުމުގެ ގޮތުން ކޮންމެ ފޮތަކުން ފާހަގަކޮށްލެވޭ ކަންކަން ކޮންމެ ހުކުރު ދުވަހަކު ގެނެސްދެވުނެވެ. ހޮނިހިރު ދުވަހު ކީރިތި ޤުރުއާންގެ އާޔަތެއްގެ މާނަޔާއެކު އެ އާޔަތުން ޙާސިލްކުރެވިދާނެ ފިލާވަޅުތަކަށް ނަޒަރު ހިންގުމުގެ ގޮތުން “ ޕީސް އޮފް ތަދައްބަރް – ރިފްލެކްޝަންސް“ ގެ ގޮތުގައި ގެނެސްދެވުނެވެ.
މި ރަމަޟާން މަހަށްވެސް ޚާއްސަ ބައިތަކެއް ގެނެސްދީފައިވަނީ ސޯޝަލް މީޑިއާ ޕްލެޓްފޯމްތަކުގައި ހޭދަކުރައްވާ ވަގުތުކޮޅަކީ ވެސް މަޢުލޫމާތަށް އިތުރު މުއްސަނދިކަމެއް ގެނުވައި ޤުރުއާނާ މެދު ވިސްނާ ފިކުރުކުރުމަށް ފުރުޞަތު ފެސާގެ ފަރާތުން ފަހިކޮށްދިނުމަށެވެ.
މި އަހަރުގެ ރަމަޟާން މަހުގެ ބަރަކާތް އެންމެ އެދެވޭ ގޮތުގައި ހިފުމަށް މަގެއް ތަނަވަސްކޮށްދެވުނު ކަމަށް އުއްމީދުކުރަމެވެ.
