ފެސާއިން މިއަހަރުގެ ކުޑަކުދިންގެ ދުވަސް ތަފާތުކޮށް ފާހަގަކޮށްފި

ކޮވިޑް 19 ގެ ސަބަބުން އައި މަޑުޖެހުމަށްފަހު ފެސާއިން މިއަހަރު ވަނީ ކުޑަކުދިންގެ ދުވަސް ތަފާތުކޮށް ފާހަގަކޮށްފައެވެ.

މިގޮތުން ޖެންޑާ މިނިސްޓްރީގެ ފަރާތުން ކުޑަކުދިންގެ ދުވަސް ފާހަގަކުރުމަށްޓަކައި ހުޅުމާލޭގައި މެއި މަހުގެ 20 ވަނަ ކުރިޔަށްގެންދެވުނު ޢާއިލީ ހަވީރުގައި ފެސާއިން ވަނީ ބައިވެރިވެފައެވެ. މި ޢާއިލީ ހަވީރުގައި ފެސާގެ ސްޓޯލް އިން ވަނީ ކުޑަކުދިންނަށް ވާހަކަފޮތް ކިޔުމާއި ވާހަކަފޮތް ކިޔައިދިނުމުގެ ޙަރަކާތްތަށް ކުރިޔަށްގެންގޮސްފައެވެ. އަދި ސްޓޯލްއަށް ޒިޔާރަތް ކުރި ކުދިންނަށް ވަނީ ހަދިޔާވެސް ދީފައެވެ. ފެސާގެ ސްޓޯލް ތައްޔާރުކޮށް ޙަރަކާތްތައް ކުރިޔަށްގެންދިޔުމުގައި ހިންގާ ކޮމިޓީ މެންބަރުންގެ އިތުރުން އެފް.އީ ގައި ކިޔަވާ ބައެއް ދަރިވަރުން ވަނީ މިކަމުގައި އިސްނަގައި ބައިވެރިވެ އެހީތެރިވެދީފައެވެ. ޖެންޑާ މިނިސްޓްރީގެ ފަރާތުން ފެސާއަށް ފުރުޞަތު ދެއްވުމަކީ ފެސާއަށް ލިބިގެންދިޔަ ކުރިއެރުމެކެވެ.

މީގެ އިތުރުން ކުޑަކުދިންގެ ދުވަސް ފާހަގަކުރުމަށް ފެސާގެ އިސްނެގުމަށް އަމިއްލަ ޖަމިއްޔާއެއް ކަމުގައިވާ މާރސީއާއެކު ”ފިޔަވަތި ޑޮނޭޝަންސް“ ގެ ނަމުގައި ހުޅުމާލޭގައި ކުޑަކުދިންގެ ހިޔާގައި ދިރިއުޅެމުންދާ ކުދިންނަށް ބޭނުންވާ ބައެއް ތަކެތި ހަދިޔާކޮށްދެވުނެވެ. މި ހަރަކާތް ކާމިޔާބުކަމާއެކު ނިންމާލުމުގައި  މާރސީއިން ވަނީ ވަރަށް ބޮޑު އެހީތެރިކަމެއް ވެދީފައެވެ.

މި ހަރަކާތަށް ތަކެތި ހަދިޔާކުރުމަށް ހުޅުވާލެވުނު ދުވަސްކޮޅުގެ ތެރޭގައި ޢާއްމުންގެ ފަރާތުން ދީލަތި އެހީތެރިކަމެއް ލިބިގެންދިޔައެވެ. މާލީ ގޮތުންނާއި ކުދިންނަށް ބޭނުންވާ ތަކެތި ޑޮނޭޝަންގެ ގޮތުގައި ލިބިގެންދިޔައެވެ. މި ހަރަކާތަށް ޑޮނޭޓްކޮށް އެހީތެރިވެދެއްވި ހުރިހާ ފަރާތްތަކަށް ފެސާގެ ފަރާތުން ވަރަށް ބޮޑަށް ޝުކުރު އަދާކުރަމެވެ.

މި ހަރަކާތުގެ ތެރެއިން ކުދިންނަށް ބޭނުންވާ ތަކެއްޗަކީ ކޮބައިތޯ ބެލުމަށްފަހު މާލީ ގޮތުން ލިބުނު އެހީ ބޭނުންކޮށްގެން އެތަކެތި ފޯރުކޮށްދެވުނެވެ. އޭގެތެރޭގައި ކިޔަވާކުދިންނަށް ބޭނުންވާ ސާމާނާ ( ފަންސުރު، ގަލަން، ފޮތް، ވާހަކަފޮތް، ކުލަފަންސުރު،ކުރެހުމަށް ބޭނުންކުރާ ތަކެތި) ހިމެނެއެވެ. މާރސީ އިން ވެސް ވަނީ މި ޑޮނޭޝަންއަށް ޚާއްސަ މާލީ އެހީތެރިކަމެއް ފޯރުކޮށްދީފައެވެ.

ތަކެތި ހަވާލުކުރުން ކުރިއަށް ދިޔައީ ފެސާއިންނާއި މާރސީގެ މަޝްވަރާތަކުގެ މަތިން މެއި މަހުގެ 22 ވަނަ ދުވަހެވެ. ތަކެތި ޕެކްކޮށް ފިޔަވަތި ޔުނިޓްއަށް ގެންގޮސްދިނުމުގައި ފެސާ އަދި މާރސީއާ ގުޅިގެން ހަރަކާތްތެރިވެފައިވެއެވެ.

”ފިޔަވަތި ޑޮނޭޝަން“ ފަދަ އެހީތެރިކަމުގެ އަތެއް މުޖްތަމަޢުގެ މުހިއްމު ބަޔަކަށް ފޯރުކޮށްދެވުމަކީ ރަނގަޅު އާދަތައް ޒުވާނުންގެ ކިބައިން ދިރުވާ އާލާކުރުމަށް ލިބިގެންދިޔަ ހިތްވަރެއްކަމުގައި ފެސާއިން ޤަބޫލުކުރެއެވެ. އަދި މާރސީ ފަދަ ޖަމިއްޔާއަކާއެކު މަސައްކަތްކުރުމުގެ ފުރުޞަތު ލިބުމަކީ ގުޅިގެން މަސައްކަތްކުރުމަށް ލިބުނު ތަޖްރިބާއެކެވެ.

މި ޙަރަކާތް ފުރިހަމަކަމާއެކު ނިންމާލެވުނީ މާރސީގެ ވަރަށް ބޮޑު އެހީތެރިކަމަކާ އެކުއެވެ. މިކަމަށްޓަކައި މާރސީ ޖަމިއްޔާއަށް ފެސާގެ ނަމުގައި އިޚްލާޞްތެރި ހިތަކުން ޝުކުރު އަދާކުރަމެވެ.

ފެސާގެ އުއްމީދަކީ މިފަދަ ޙަރަކާތްތައް ކާމިޔާބުކަމާއެކު ކުރިޔަށްގެންދެވުމެވެ.