”ފެސެލް ވެލްކަމް ނައިޓް“ ހުކުރުދުވަހުގެރޭ ބާއްވަނީ

ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) އާއި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް) އާއި ގުޅިގެން “ ފެސެލް ވެލްކަމް ނައިޓް“ ހުކުރުދުވަހުގެރޭ ބޭއްވުމަށް ވަނީ ނިންމާފައެވެ.

މިއީ ޚާއްސަ ގޮތެއްގައި ފެކަލްޓީ އޮފް އެޑިއުކޭޝަން (އެފް.އީ) އާއި ފެކަލްޓީ އޮފް ޝަރީޢާ އެންޑް ލޯ ( އެފް.އެސް.އެލް) އަށް މިއަހަރުގެ ދެވަނަ ސެމިސްޓަރ އަށް އަލަށް ގުޅުނު ދަރިވަރުންނަށް މަރުހަބާ ކިޔުމަށްޓަކައި ބޭއްވިގެންދާ ހަރަކާތެއް ކަމުގައިވިޔަސް މި ދެ ފެކަލްޓީގައި މިހާރުވެސް ކިޔަވަމުންދާ ހުރިހާ ދަރިވަރުންވެސް މި ހަރަކާތުގައި ބައިވެރިވުމަށް ފެސާ އަދި އެސް.އެސް.އެލް ގެ އެކްސްކޯއިން ދަޢުވަތު އަރުވަމެވެ.

”ފެސެލް ވެލްކަމް ނައިޓް“ މި ނަންދެވުނީ އެފް.އީ އަދި އެފް.އެސް.އެލް އާއެކު ކުރިޔަށްގެންދެެވޭ ހަރަކާތަަކަށްވުމުން ފެސާ އަދި އެސް.އެސް.އެލް އަށް ނިސްބަތްކޮށް ދެވިފައިވާ ނަމެކެވެ.

މި ހަރަކާތް ބޭއްވުމަށް ހަމަޖެހިފައިވަނީ ޤައުމީ ޔުނިވަރސިޓީގެ ސެންޓްރަލްގެ، އޭ ބްލޮކްގެ، 3 ވަނަ ފަންގިފިލާގެ ހޯލް (14 އަދި 15) ގައެވެ. ”ފެސެލް ވެލްކަމް ނައިޓް“ ބޭއްވިގެންދަނީ 26 އޯގަސްޓް ވީ ހުކުރުދުވަހުގެ ރޭ 20:15 ގައެވެ.

”ފެސެލް ވެލްކަމް ނައިޓް“ ގެ މަޤުސަދަކީ ފެކަލްޓީ އޮފް އެޑިއުކޭޝަން (އެފް.އީ) އާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ގައި ކިޔަވާ ދަރިވަރުންގެ މެދުގައި އުފާވެރި މާހައުލެއްގެ ތެރެއިން ގުޅުން ބަދަހިކޮށް އާ އެކުވެރިންތަކެއް ލިބިގެން ދިޔުމެވެ. އަދި މި ނައިޓްގައި ކުރިޔަށްގެންދިޔުމަށް ރޭވިފައި ހުރި ތަފާތު ގޭމްސްތަކާއި ހަރަކާތްތަކުން ކުދިންނަށް އިސްނެގުން ފަދަ ތަފާތު ބޭނުންތެރި ހުނަރުތައް ދަސްވުމެވެ.

މި ގޭމްސްތަކުގެ އިތުރުން ޚާއްސަ ކަންތައްތަކެއް ވަނީ ”ފެސެލް ވެލްކަމް ނައިޓް“ ގައި ދަރިވަރުންނަށް ރޭވިފައެވެ.

ފެސާ އަދި އެސް.އެސް.އެލް ގެ އުއްމީދަކީ ”ފެސެލް ވެލްކަމް ނައިޓް“ އަށް ވީހާވެސް ގިނަ ދަރިވަރުން އައުމެވެ.

ފެސާއިން ވެލްކަމް ނައިޓް މިދިޔަ ސެމިސްޓަރގައި ”ސުވާސްތީ“ ގެ ނަމުގައި ސިއާ އާއި ގުޅިގެން ވަރަށް ކާމިޔާބުކަމާއެކު ބޭއްވިގެންދިޔައެވެ. އަދި މަރުހަބާ ކިޔުމުގެ ހަރަކާތް ”ގާލާ ނައިޓް“ އެސް.އެސް.އެލް އިންވެސް ވަނީ އެސްޓާ އާއި ބީ.އެސް.އެސް.އޭ އެކު ތަފާތުކޮށް މިދިޔަ ސެމިސްޓަރގަައި ކުރިޔަށްގެންގޮސްފައެވެ.

މިއީ ކޮންމެ ސެމިސްޓަރގެ ވެސް ޔުނިވާސިޓީއަށް އަލަށް ގުޅޭ ދަރިވަރުންނަށް ޚާއްސަކޮށްގެން އެމް.އެން.ޔޫ.އެސް.ޔޫގެ ގޮފިތަކުން އިސްނަގައިގެން ބާއްވަމުން އަންނަ ހަރަކާތެކެވެ.