ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) އިން ފެކަލްޓީ އޮފް އެޑިއުކޭޝަން (އެފް.އީ)ގެ ލެކްޗަރަރ އިންނަށް މުދައްރިސުންގެ ދުވަސް ފާހަގަކޮށްދީފިއެވެ.
މި އިވެންޓް ކުރިޔަށް ގެންގޮސްފައިވަނީ 11 ވީ ބުދަ ދުވަހުގެ ހަވީރު އެފް.އީ އޮޑިޓޯރިއަމްގައެވެ. މި އިވެންޓުގައި ލެކްޗަރައިންގެ އިތުރުން ފެސާގެ ލީޑަރުންވެސް ވަނީ ބައިވެރިވެފައެވެ.
ޤުރުއާނުގެ ބަރަކާތުން ހަފްލާ ފެށީ ފެސާގެ އިންތިޚާބީ ސެކްރެޓަރީ އަޙްމަދު އީމާންއެވެ. އެއަށްފަހު ފެސާގެ ރައީސް، މުޙައްމަދު ނާބިތު އަޙްމަދު ވަނީ ހުރިހާ ބައިވެރިންނާ މުޚާތަބުކުރައްވާފައެވެ. ނާބިތުގެ ވާހަކައިގައި ވަނީ ހުރިހާ ލެކްޗަރަރއިންނަށާއި މުދައްރިސުންނަށް ވެގެން ޔުނިވަރސިޓީއިން ނުކުންނާނެ ދަރިވަރުންނަށް އުފާވެރި މުދައްރިސުންގެ ދުވަހަކަށް އެދިފައެވެ.
ވާހަކަތަކަށްފަހު ދެން އޮތީ ކުޅިވަރެވެ. އެގޮތުން ”ސެލެބްރިޓީ ހެޓްސް“ އާއި ”ކެރިއޯކީ“ އަދި ”މައިމިންގ“ ވެސް ވަނީ ކުޅެފައެވެ. ހަފްލާ ނިންމާލުމުގެ ކުރިން ވަޑައިގެން ތިއްބެވި ލެކްޗަރަރސް އަށް ވަނީ ހަދިޔާއެއްވެސް ދެވިފައެވެ. އެއަށްފަހު ގްރޫޕް ފޮޓޯ ނެގުމާއި ”ބްރައުނީ ޓަވަރ“ ފެޅުން ކުރިޔަށް ދިޔައެވެ. ހަފްލާ ނިމިގެން ދިޔައީ ބައިވެރިންނަށް ތައްޔާރު ކުރެވިފައިވާ ސަޔަކުންނެވެ.
މިދިޔަ އަހަރުވެސް ފެސާއިން ވަނީ މުދައްރިސުންގެ ދުވަސް ކުލަގަދަކޮށް ފާހަގަކޮށްދީފައެވެ. ފެސާގެ އުއްމީދަކީ ކުރިޔަށް އޮތް އަހަރުތަކުގައި މިޔަށް ވުރެ ބޮޑު އަދި ކުލަގަދަ ކޮށް މުދައްރިސުންގެ ދުވަސް ފާހަގަކުރުމެވެ.
