ފެކަލްޓީ އޮފް އެޑިއުކޭޝަނަށް މި ސެމިސްޓަރގައި އަލަށް ގުޅުނު ދަރިވަރުންނަށް ބޭއްވި ”ފެސާ ވެލްކަމް ނައިޓް 2024“ ކާމިޔާބުކަމާއެކު ނިންމާލައިފިއެވެ.
ވެލްކަމް ނައިޓް ބާއްވާފައިވަނީ 15 ފެބުރުވަރީ ވީ ބުރާސްފަތި ދުވަހުގެރޭ އެފް.އީ ޕީ.އީ ހޯލްގައެވެ.
ތިރީހަކަށް ކުދިން ބައިވެރިވި މިހަރަކާތުގައި އެކި ކަހަލަ މަޖާ ކުޅިވަރުތައް ކުރިޔަށް ގެންގޮސްފައިވެއެވެ.
ފެކަލްޓީ އޮފް އެޑިޔުކޭޝަން (އެފް.އީ)ގެ ޑީން ނާދިޔާ އަހްމަދު މި ހަރަކާތުގައި ބައިވެރިވެގެންދިޔުމަކީ މި ހަރަކާތް ހާއްސަ ވެގެންދިޔަ ސަބަބެވެވެ.
އިވެންޓް ފެށިގެން ދިޔައީ ފެސާގެ އަލަށް އައްޔަން ކުރެވުނު ހިންގާ ކޮމިޓީގެ ތަޢާރަފްވުމަކަށް ފަހުގައެވެ. އަދި އެއަށްފަހު އަލަށް ގުޅުނު ދަރިވަރުންނާ މުޚާޠަބުކޮށް (އެފް.އީ)ގެ ޑީން ނާދިޔާ މިސް ވަނީ ވާހަކަފުޅު ދައްކަވައިފައެވެ.
ޑީން ވިދާޅުވި ގޮތުގައި ފެސާ އަކީ ދަރިވަރުންގެ ހުނަރުތައް އިތުރަށް ކުރިއަރުވާ، ގިނަ ހަރަކާތްތަކެއްގައި ބައިވެރިވުމުގެ ފުރުސަތު ފަހިކޮށްދިޭނެ ވިންގެއް ކަމަށެވެ. އަދި ހަމައެހެންމެ ނިމިދިޔަ ދައުރުގައި ފެސާއިން ހޯދާފައިވާ ކާމިޔާބީތައް ފާހަގަކޮށް، އެ ކާމިޔާބީތައް ފެސާއަށް ހޯދައިދިނުމުގައި ފެސާގެ އެންމެ ކުރީސަފުގައި ތިއްބެވި އިސްވާރުންގެ މަސައްކަތް ފާހަގަ ކޮށް އެކަމަށް ޑީން ތަރުހީބު ދެއްވިއެވެ. ފެސާއަށް އަލަށް ގުޅުނު ދަރިވަރުންގެ ފަރާތުން ޑީން އެދިލެއްވީ މި ފެށޭ ދައުރުގައި މި ކާމިޔާބީތައް ދިފާޢުކޮށް ފެސާއަށް ރީތިނަން ހޯދައިދޭން ދަރިވަރުންގެ އެއްބާރުލުން ދެއްވުމަށެވެ. އަދި މީގެއިތުރުން ދަރިވަރުން އިތުރު ހަރަކާތްތަކަށް ދޭ ސަމާލުކަން ކިޔެވުމަށްވެސް ދިނުމަށް ޑީން އިލްތިމާސްކުރިއެވެ.
ފެސާގެ ނިމިދިޔަ ދައުރުގެ ރައީސް ނާބިތު އަހްމަދު ވެސް ވަނީ ދަރިވަރުންނަށް މަރުހަބާ ދަންނަވާ، ވާހަކަދައްކަވާފައެވެ. އަލަށް ގުޅުނު ދަރިވަރުންނާ މުޚާތަބުކޮށް ރައީސް ވިދާޅުވެފައިވަނީ ފެސާއިން ހިންގާ ހަރަކާތްތަކުގައި ހުރިހާ ދަރިވަރުންވެސް ވީވަރަކުން ބައިވެރިވެ އެހީތެރިކަން ފޯރުކޮށްދިނުމަށެވެ. އަދި ހަމައެހެންމެ އެދަރިވަރުން ކުރިޔަށް އޮތް ތަނުގައި ގިނަ ހަރަކާތްތަކަކުން ފެންނާނެ ކަމަށް އުއްމީދުކުރާކަމަށް ރައީސް ވިދާޅުވިއެވެ. ފެސާގެ މިހާރުގެ މީޑިއާ ކޯޑިނޭޓަރު ރާޔާ މުހައްމަދު ޝާހިދު ވެސް ވަނީ ފެސާ އަށް އަލަށް ގުޅުނު ދަރިވަރުންނަށް މަރުހަބާ ދަންނަވާ، ފެސާއާބެހޭގޮތުން މައުލޫމާތު ހިއްސާ ކުރައްވާފައެވެ. އަދި މީގެ އިތުރުން ވެލްކަމް ނައިޓު ހޯސްޓު ކޮށްދެއްވާފައިވަނީ ވެސް މީޑިއާ ކޯޑިނޭޓަރ ރާޔާއެވެ.
ވެލްކަމް ނައިޓްގެ ތެރޭގައި ވަނީ 17 ފެބުރުވަރީވާ ހޮނިހިރު ދުވަހު ފެސާއިން ދިއުމަށް ހަމަޖެހިފައިވާ ”ފެސާ ޓްރިޕް“ ގައި ބައިވެރިވުމަށް ފުރުސަތު ހުޅުވާލައިފައެވެ. އަދި ފެސާގެ ލީޑާރސް ގްރޫޕަށް ގުޅެން ބޭނުންވާ ކުދިން ނަން ނޯޓު ކުރެވިފައެވެ. އަދި ހަމައެހެންމެ ދަރިވަރުންގެ މެދުގައި ގުޅުން ބަދަހިވެގެން ދިޔަ މަޖާ ތަފާތު އެކި ކުޅިވަރުތައް މި ހަރަވާތުގައި ކުޅެވިގެންދިޔައެވެ.
މި ހަރަކާތުގެ މަގްސަދަކީ އަލަށް ގުޅުނު ދަރިވަރުންނަށް އުފާވެރި މާހައުލެއްގައި ގުޅުން ބަދަހިކޮށް، މަޖާކޮށްލާ އެކުވެރިކަން އާލާކުރުމުގެ ފުރުސަތު ދިނުމެވެ.
ވެލްކަމް ނައިޓް މިހާ ފުރިހަމައަށް ބޭއްވިގެން ދިޔަ ކަމަށްޓަކައި އަލަށް އައްޔަން ކުރެވުނު ރައީސް އަހްމަދު އީމާން ވަނީ ލީޑަރުންނަށް ޙައްޤު ޝުކުރު އަދާކޮށްފައެވެ.
