ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ)ގެ އިސްވާރުން އެހީ ޖަމިއްޔާއިން ކުރިޔަށް ގެންދިޔަ ”އެހީ އިފްތާރު“ ޕްރޮގްރާމްގައި ބައިވެރިވެއްޖެއެވެ.
”އެހީ އިފްތާރު“ ޕްރޮގްރާމަކީ އެހީ ޖަމިއްޔާ އިން އިސްނަގައިގެން ކޮންމެ އަހަރެއްގެ ރަމަޟާންމަހު ރާއްޖޭގެ އެކިކަންކޮޅުތަކުގަޔާއި މާލޭގެ އެކި މިސްކިތްތަކުގައި ރޯދަ ވީއްލުން އިންތިޒާމު ކުރުމަށް ހިންގާ ޕްރޮގްރާމެކެވެ. އަދި މި ޕްރޮގްރާމަކީ އާންމުނަށް ފައިސާގެ އެހީތެރިކަމާއި، އަމަލީ ގޮތުން މި މަސައްކަތުގައި ބައިވެރިވާ ބޭނުންވާ ފަރާތްތަކަށް އެފުރުސަތު ވެސް ހުޅުވާލައިގެން ކުރިއަށްގެންދާ ހަރަކާތެއްކަން ފާހަގަކޮށްލެވެއެވެ.
އެހީ ޖަމީއްޔާއިން ކުރިއަށް ގެންދިޔަ މި ޕްރޮގްރާމް ގައި ސުފުރާ އެޅުމުގެ އަމަލީ މަސައްކަތުގައި ފެސާގެ ފިރިހެން އިސްވާރުން ވަނީ އެހީތެރިކަން ފޯރުކޮށްދީފައެވެ.
ކޮންމެ ދުވަހެއްގެ 5:30 ގައި މާލޭގެ އެކިއެކި މިސްކިތްތަކުގައި މި ޕްރޮގްރާމް ކުރިޔަށް ގެންގޮސްފައިވާއިރު ފެސާގެ އިސްވާރުން ވަނީ މަސްޖިދުލް ފުރުޤާނުގައި ސުފުރާ އެޅުމުގެ މަސައްކަތުގައި ބައިވެރިވެފައެވެ.
މި ހަރަކާތުގައި ފެސާއިން ބައިވެރިވުމުގެ މައިގަނޑު މަޤްޞަދަކީ އެހީ ޖަމިއްޔާއިން އިސްނަގައިގެން ކުރިއަށްގެންދިޔަ މި ޕްރޮގްރާމްގައި ފެސާގެ ފިރިހެން އިސްވާރުންގެ ފަރާތުން އެހީތެރިކަން ފޯރުކޮށްދިނުމެވެ. މިފަދަ އިޖްތިމާއީ ހަރަކާތްތަކުގައި ބައިވެރިވުމުގެ ފުރުސަތުތައް އިސްވާރުންނަށް ފަހިކޮށްދިނުމެވެ.
ކުރިއަށް އޮތްތާގައި މިފަދަ ޙަރަކާތް ތަކުގައިވެސް ފެސާއަށް ނިސްބަތްވާ އެންމެހާ އިސްވާރުންގެ އެއްބާރުލުން ލިބޭނެކަމަށް ފެސާއިން އުންމީދު ކުރެއެވެ.
