ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ)ގެ މިއަހަރުގެ ފުރަތަަމަ މޫވީ ނައިޓް 40 އަށްވުރެ ގިނަ ބައިވެރިންނާއެކ، ކާމިޔާބު ކަމާއެކު ނިންމާލައިފިއެވެ.
މެއި 30 ވީ ބުރާސްފަތި ދުވަހުގެ ރޭ 20:00 ގައި އެފް.އީ އޮޑިޓޯރިއަމްގައި ބޭއްވިގެން ދިޔަ މި މޫވީ ނައިޓްގައި އަޅުވާފައިވަނީ 2009 ވަނަ އަހަރު ނެރެފައިވާ ރާޖް ކުމާރު ހިރާނީގެ ”3 އިޑިއަޓްސް“އެވެ. މި ފިލްމަކީ ކޮމެޑީ އަދި ލޯބީގެ ފިލްމަކަށް ވާއިރު ހުނުމުގެ އަޑުން މުޅި އޯޑިއަންސް ވަނީ ގުގުމާލާފައެވެ. ނަމަވެސް މި ފިލްމުގައި ހިމެނޭ އަސަރުގަދަ ސީން ތަކުގައި މުޅި އޯޑިއަންސް ހަމަ ހިމޭންވެ ބައިވެރިންގެ ލޮލުން ކަރުނަ އޮހޮރާލިކަން ފާހަގަކޮށްލެވެއެވެ.
މިއީ ކުރީގެ ހިންދީ ފިލްމެއް ކަމުގައި ވިޔަސް އަލުން ނުބަލާ ދޫކޮށްލާ ވަރުގެ ފިލްމެއް ނޫން ކަމަށް މޫވީ ނައިޓުގެ ބައިވެރިން ފާހަގަކުރެއެވެ.
މޫވީ ނައިޓްގެ ޓިކެޓު 10 ރުފިޔާއަށް ވިއްކާފައިވާއިރު އޮންލައިންކޮށް ޓިކެޓު ގަތުމުގެ ފުރުސަތުވެސް އޮތީ ހުޅުވާލާފައެވެ.
މޫވީ ނައިޓް ކުރިއަށް ދިޔަ ވަގުތު ކެންޓީނުގެ ޚިދުމަތްތައް ވަނީ ފޯރުކޮށްދީފައެވެ. އެގޮތުން ފެނާއި، ގްރިލްޑް ސޮސެޖުގެ އިތުރުން ޕޮޕް ކޯން ވަނީ ވިއްކާފައެވެ.
މި ހަރަކާތުގެ މަގްސަދަކީ ދަރިވަރުންނަށް އެކުވެރިންނާއެކު ވަގުތުކޮޅެއް ހޭދަ ކޮށްލުމުގެ ފުރުސަތު ފަހިކޮށްދިނުމުގެ އިތުރުން ފެސާއިން ކުރިޔަށް ރާވާފައި ހުރި ހަރަކާތްތަކަށް ފައިސާ ހޯދުމެވެ.
ފެސާއިން އިތުރު ފަންޑްރައިޒިން ހަރަކާތްތައް ކުރިއަށް ގެންދިޔުމަށް ނިންމާފައިވާއިރު މިފަދަ އިވެންޓްތައް ކާމިޔާބު ކަމާއިއެކު ކުރިއަށް ގެންދިޔުމުގެ މޭސްތިރިންނަކީ ހީވާގި އިސްވާރުންކަން ފާހަގަ ކޮށްލެވެއެވެ.
