ފެކަލްޓީ އޮފް އެޑިއުކޭޝަނަށް މި ސެމިސްޓަރގައި އަލަށް ގުޅުނު ދަރިވަރުންނަށް ބޭއްވި ”ފެސާ ވެލްކަމް ނައިޓް 2024“ ކާމިޔާބުކަމާއެކު ނިންމާލައިފިއެވެ.
ވެލްކަމް ނައިޓް ބާއްވާފައިވަނީ 22 ފެބުރުވަރީ ވީ ބުރާސްފަތި ދުވަހުގެރޭ އެފް.އީ ޕީ.އީ ހޯލުގައެވެ.
ވިިއްސަކަށް ކުދިން ބައިވެރިވި މިހަރަކާތުގައި އެކި ކަހަލަ މަޖާ ކުޅިވަރުތައް ކުރިޔަށް ގެންގޮސްފައިވެއެވެ.
ފެކަލްޓީ އޮފް އެޑިޔުކޭޝަން (އެފް.އީ)ގެ ޑީން ނާދިޔާ އަހްމަދު މި ހަރަކާތުގައި ބައިވެރިވެގެންދިޔުމަކީ މި ހަރަކާތް ހާއްސަ ވެގެންދިޔަ ސަބަބެވެވެ.
އިވެންޓް ފެށިގެން ދިޔައީ ފެސާގެ މިދައުރުގެ ހިންގާ ކޮމިޓީގެ ތަޢާރަފްވުމަކަށް ފަހުގައެވެ. އަދި އެއަށްފަހު އަލަށް ގުޅުނު ދަރިވަރުންނާ މުޚާޠަބުކޮށް (އެފް.އީ)ގެ ޑީން ނާދިޔާ މިސް ވަނީ ވާހަކަފުޅު ދައްކަވައިފައެވެ.
ޑީން ވިދާޅުވި ގޮތުގައި ފެސާ އަކީ ދަރިވަރުންގެ ހުނަރުތައް އިތުރަށް ކުރިއަރުވާ، ގިނަ ހަރަކާތްތަކެއްގައި ބައިވެރިވުމުގެ ފުރުސަތު ފަހިކޮށްދިޭނެ ވިންގެއް ކަމަށެވެ. އަދި ހަމައެހެންމެ ނިމިދިޔަ ދައުރުގައި ފެސާއިން ހޯދާފައިވާ ކާމިޔާބީތައް ފާހަގަކޮށް، އެ ކާމިޔާބީތައް ފެސާއަށް ހޯދައިދިނުމުގައި ފެސާގެ އެންމެ ކުރީސަފުގައި ތިބި އިސްވާރުންގެ މަސައްކަތް ފާހަގަކޮށް އެކަމަށް ޑީން ތަރުހީބު ދެއްވިއެވެ. ފެސާއަށް އަލަށް ގުޅުނު ދަރިވަރުންގެ ފަރާތުން ޑީން އެދިލެއްވީ މި ޓަރމުގައިވެސް މި ކާމިޔާބީތައް ދިފާޢުކޮށް ފެސާއަށް ރީތިނަން ހޯދައިދޭން ދަރިވަރުންގެ އެއްބާރުލުން ދިނުމަށެވެ. އަދި މީގެއިތުރުން ދަރިވަރުން އިތުރު ހަރަކާތްތަކަށް ދޭ ސަމާލުކަން ކިޔެވުމަށްވެސް ދިނުމަށް ޑީން އިލްތިމާސްކުރިއެވެ.
ދިވެހިރާއްޖޭގެ ގައުމީ ޔުނިވާސިޓީ ސްޓޫޑެންޓް ޔޫނިއަން (އެމް.އެން.ޔޫ.އެސް.ޔޫ) ގެ ހިންގާ ކޮމިޓީގެ މެންބަރުން ވެސް ވަނީ މި ހަރަކާތުގައި ބައިވެރިވެ، ފެސާއަށް އަލަށް ގުޅުނު އިސްވާރުންނަށް މަރުހަބާ ކިޔާފައެވެ.
ވެލްކަމް ނައިޓްގެ ތެރޭގައި ވަނީ 17 ފެބުރުވަރީވާ ހޮނިހިރު ދުވަހު ފެސާއިން ދިއުމަށް ހަމަޖެހިފައިވާ ”ފެސާ ޓްރިޕް“ ގައި ބައިވެރިވުމަށް ފުރުސަތު ހުޅުވާލައިފައެވެ. އަދި ފެސާގެ ލީޑާރސް ގްރޫޕަށް ގުޅެން ބޭނުންވާ ކުދިން ނަން ނޯޓު ކުރެވިފައެވެ. އަދި ހަމައެހެންމެ ދަރިވަރުންގެ މެދުގައި ގުޅުން ބަދަހިވެގެން ދިޔަ މަޖާ ތަފާތު އެކި ކުޅިވަރުތައް މި ހަރަކާތުގައި ކުޅެވިގެންދިޔައެވެ.
މި ހަރަކާތުގެ މަގްސަދަކީ އަލަށް ގުޅުނު ދަރިވަރުންނަށް އުފާވެރި މާހައުލެއްގައި ގުޅުން ބަދަހިކޮށް، މަޖާކޮށްލާ އެކުވެރިކަން އާލާކުރުމުގެ ފުރުސަތު ދިނުމެވެ.
ވެލްކަމް ނައިޓް ނިންމާލެވިފައިވަނީ އެމް.އެން.ޔޫ.އެސް.ޔޫ ބޮޑުބެރު ގުރޫޕް ގެ ފުރިހަމަ ހުަށަހެޅުންތަކަކާއެކުގައެވެ.
