ކުޅުދުއްފުށީ ކެމްޕަހުގައި ޑިޕްލޮމާ އިން ނާރސިންގް ކިޔަވަމުންގެންދާ 56 ވަނަ ބެޗްއިން އިސްނަގައިގެން 7 އޭޕްރީލް 2018 ވީ ހޮނިހިރު ދުވަހުވަނީ ޞިއްޙަތުދުވަހާ ގުޅުވައިގެން ސެމިނަރއެއް ބާއްވާފައެވެ . މި ސެމިނަރ އަކީ އޮފީސް ތަކަށް ޙާއްޞަކޮށް ހިންގުނު ސެމިނަރއެއްކަމުން ، މި ސެމިނަރގައިވަނީ ވަރަށް ގިނަ އޮފީސްތަކުން ބައިވެރިވެފައެވެ. އެގޮތުން، ބައިވެރިވި އޮފީސް ތަކުގެ ތެރޭގައި ބޭންކް އޮފް މޯލްޑިވްސް، ކަސްޓަމްސް، އަފީފުއްދީން ސްކޫލް، ކައުސިލް އިދާރާ، މީރާ، އެމްޖަބްލިއުއެސް.ސީ، ޕީޖީ އޮފީސް، ޕޮލިސް ގެ އިތުރުން އެމްއެންޖީއެފް ހިމެނެއެވެ. މި ސެމިނަރގައި މައިގަނޑު ގޮތެއްގައި ބަލާލާއިފައިވަނީ ”ސްޓްރެސް އެންޑް ބާރންއަވްޓް އިން ވޯރކް އެންވާރަމެންޓް“ އާ ބެހޭގޮތުންނެވެ.
ހޮނިހިރު ދުވަހުގެ ހެނދުނު 10 އަކުން 11:45 އަށް ބޭއްވުނު މި ސެމިނަރއަކީ ކުޅުދުއްފުށީކެމްޕަހުގައި ނާރސިންސް ކިޔަވަމުންދާ ދަރިވަރު އިނާޝާ މޫސާގެ ލީޑަރުކަމުގެ ދަށުގައި ހިންގުނު ސެމިނަރއެއް ކަމުގައިވިޔަސް، މި ސެމިނަރގެ ހުރިހާ ކަމެއް އިންތިޒާމްކުރުމުގައި ކުދިންގެ ފަރާތުން ފެނިގެންދިޔައީ ވަރަށް ލާމަސީލު ނަމޫނާއެއްކަން ފާހަގަކުރަމެވެ. މި ސެމިނަރ ނިމިގެން ދިޔައީ މި ސެމިނަރގެ ހުރިހާ ބައިވެރިންނަށާއި، މި ސެމިނަރއަށް ވެދެއްވި އެއްބާރުލުމަށް ސްޓޫޑިއެންޓް ޔޫނިއަންއަށް ސެޓްޕިކެޓް ހަވާލު ކުރައްވާފައެވެ.
