ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އެމް.އެން.ޔޫ ކުޅުދުއްފުށީ ކެމްޕަހުގައި ޤާއިމުކޮށްފައިވާ ގޮފި، ގުރުޒުގެ އައު ހިންގާ ކޮމިޓީ އިފްތިތާހުކޮށްފިއެވެ.
ގުރުޒުގެ ހިންގާ ކޮމިޓީ އިފްތިތާހުކޮށްފައިވަނީ މިކަމަށް ޚާއްސަކޮށް މާރިޗު 10ވީ ހުކުރުދުވަހު ހެނދުނު ކުޅުދުއްފުށީ ކެމްޕަހުގައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތު ޝަރަފުވެރިކޮށްދެއްވާފައިވަނީ ކުޅުދުއްފުށީ ކެމްޕަހުގެ މެނޭޖަރ ޑރ. މުޙައްމަދު ޢުމަރެވެ. ރަސްމިއްޔާތުގައި ވާހަކަފުޅު ދައްކަވަމުން ޑރ. ޢުމަރު ފާހަގަކުރެއްވި ގޮތުގައި ދަރިވަރުންގެ ޔޫނިއަންއާ ގުޅިގެން ތަފާތު ހަރަކާތްތައް ގުރުޒުން އިންތިޒާމުކުރާނެ ކަމަށް އުއްމީދުކުރައްވާކަމަށެވެ.
މި ރަސްމިއްޔާތުގައި ދަރިވަރުންގެ ޔޫނިއަންގެ ފަރާތުން ހަދާފައިވާ ޚާއްސަ ވީޑިއޯ ރިޕޯޓެއް އަޅުވާފައިވާއިރު، ގުރުޒުގެ އައު ރައީސް، އަލީ ނަބާހުވެސް ވަނީ ވާހަކަ ދައްކަވާފައެވެ. ނަބާހުގެ ވާހަކައިގައި ގުރުޒުގެ މި ދައުރުގެ އެންމެ ބޮޑު އަމާޒަކީ ޔުނިވަރސިޓީ ހަޔާތަކީ އުފާވެރި ދުވަސްވަރެއްކަމަށް ދަރިވަރުންނަށް ހެދުމާއި، ދަރިވަރުންގެ އެކިއެކި ހުނަރުތައް ކުރިއެރުވުން ކަމަށް ފާހަގަ ކުރެއްވިއެވެ.
މިފަހަރު މި އިފްތިތާހު ކުރެވުނީ ގުރުޒުގެ 5 ވަނަ ދައުރެވެ. ގުރުޒު އުފެދިފައިވަނީ 2018 ވަނަ އަހަރެވެ.
