ދުނިޔޭގެ ސިއްޙަތު ދުވަހުގެ މުނާސަބަތުގައި އެޕްރިލް 14 ވަނަ ދުވަހުގެރޭ ފެކަލްޓީ އޮފް ހެލްތް ސައިންސަސް އަދި ހެލްތް ޕްރޮޓެކްޝަން އޭޖެންސީ ގުޅިގެން ފެކަލްޓީ އޮފް ހެލްތު ސައިންސަސްގައި ބޭއްވި ފޯރަމްގައި ހީލާރސް އިން ވަނީ އިބުރަތްތެރި ދެ ޑްރާމާ ހުށަހަޅައި ދީފައެވެ. ކޮންމެ އަހަރެއްގައިވެސް ދުނިޔޭގެ ސިއްޙަތު ދުވަސް ފާހަގަ ކުރަނީ އެޕްރިލް މަހުގެ 7 ވަނަ ދުވަހުއެވެ. އަދި މިއަހަރުގެ ޝިއާރަކީ އިބްތިދާއީ ސިއްޙީ ފަރުވާއެވެ.
ފޯރަމް ފަށާފައިވަނީ ހީލާރސް ގެ އެއް އައިޓްމް އިންނެވެ. މި އައިޓަމްގައި ދައްކުވައިދީފައިވަނީ ކުރީޒަމާނުގައި ބަލިމަޑުކަން ފެތުރުމުން ދިވެހިން ކަންކުރަމުންއައި ގޮތުގެ ކުޑަ ޑްރާމާއެކެވެ. މި ފޯރަމްގައި ފެކަލްޓީ އޮފް ހެލްތް ސައިންސަސްގެ ޑީން އަދި މިނިސްޓަރ އޮފް ހެލްތު ވާހަކަ ދައްކަވާފައިވެއެވެ. އަދި ފެކަލްޓީ އޮފް ހެލްތް ސައިންސަސްގެ ފަރާތުން 45 އަހަރު އިބްތިދާއީ ސިއްޙީ ފަރުވާއަށް ކޮށްދެއްވި ހިދުމަތްތަކަށް ބިނާކޮށް ރިޕޯޓެއް ގެނެސްދީފައިވެއެވެ. ހެލްތް މިނިސްޓަރ ގެ ވާހަކަ ފުޅުގައި އިބްތިދާއީ ސިއްޙީ ފަރުވާގެ މުހިންމުކަން ވަނީ ފާހަގަކުރައްވާފައެވެ. މީގެ އިތުރުން ޑރ. އަބްދުލް ސައްތާރު ޔޫސުފް ދެއްކެވި ވާހަކަ ފުޅުގައި އެންމެ ފުރަތަމަ ރާއްޖެއަށް މި ފަރުވާ ތަޢާރަފް ވިއިރު ކުރަން ޖެހުނު ބުރަ މަސައްކަތްތައް ވަނީ ހިއްސާ ކޮއްދީފައެވެ. އަދި އެއްވެސް ގޮތަކަށް މި ފަރުވާއަކީ ދަށު ފަންތީގެ ފަރުވާއެއްކަމަށް ނުބެލުމަށް ހުރިހާ ބޭފުޅުންނަށް ވަނީ ގޮވާލާފައެވެ.
ރާއްޖޭގައި އެތަކެއް އަހަރުތަކެއް ވަންދެން އިބްތިދާއީ ސިއްޙީ ފަރުވާ އަށް ޚިދުމަތްކޮށްދިން 6 ބޭފުޅުންގެ ވާހަކަވެސް މި ފޯރަމްގައި ވަނީ ހިއްސާ ކޮއްފައެވެ. އަދި މި ފެކަލްޓީގެ އެންމެ ފުރަތަމަ އިސްވެރިއެއް ކަމަށްވާ ޑރ. އައިމިނަތު ޖަމީލް ގެ ވާހަކައިގައި ގައިންގަޔަށް ނާރާބަލިތަކުން ރައްކާތެރިވުމާއި އިބްތިދާއީ ސިއްޙީ ފަރުވާއާއި ހުރިގުޅުން ފާހަގަ ކޮށްފައިވެއެވެ.
ހީލާރސްގެ ދެވަނަ ޑްރާމާގައި ދައްކުވައިދީފާވަނީ މިހާރު އެންމެ އާންމުކޮށް ފެތުރެމުންދާ ޑެންގޫ ފަދަ މަދިރީގެ ސަބަބުން ޖެހޭ ބަލިތަކުން ރައްކާތެރިވުމަށް އިބްތިދާއީ ސިއްޙީފަރުވާދޭ ފަރާތްތަކާއި ގުޅިގެންނާއި އެމިހެއްގެ ފަރުދީޒިންމާއަދާކުރުމުގެ މުހިންމުކަމެވެ. އަދި މި ޑްރާމާގައި އެންޓިބައޮޓިކް-ރެސިސްޓެން އާއި ބެހޭގޮތުން މަޢުލޫމާތުވެސް ގެނެސްދީފައިވެއެވެ.
ޑަބްލިއު. އެޗް. އޯގެ ފަރާތުން ރާއްޖެއަށް ކަނޑައަޅާފައިވާ ވަޒީރު އަލްފާޟިލް އަހްމަދު ނަސިރް ވަނީ އިބްތިދާއީ ސިއްޙީފަރުވާގެ ނިޒާމް ރާއްޖޭގައި އިތުރަށް ހަރުދަނާ ކުރުމަށް ހެލްތު މިނިސްޓަރ އަށް ގޮވާލާފައެވެ.
ލިޔުނީ: ސަފާނާ ޙަސަން
މީޑިއާ ކޯޑިނޭޓަރ، ހީލާރސް
