ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ، ސޮސައިޓީ ފޯރ ހޮސްޕިޓަލިޓީ އެންޑް ޓުއަރިޒަމް ސްޓަޑީޒް (ޝެޓްސް) އިން އިންތިޒާމުކޮށްގެން ބާއްވާ ”ޝެޓްސް ލީޑާރްސް ޓްރިޕް“ މިފަހަރު ދަނީ ލާމަށެވެ.
ޝެޓްސް ލީޑާރސް ޓްރިޕަކީ، ކޮންމެ އަހަރަކު އެއްފަހަރު ދިޔުމަށް ހަމަޖެހިފައިވާ ޓްރިޕެކެވެ. މި ޓްރިޕްގެ މައިގަނޑު މަޤްޞަދަކީ، ފެކަލްޓީ އޮފް ހޮސްޕިޓަލިޓީ އެންޑް ޓުއަރިޒަމް ސްޓަޑީޒްގެ ގިނަ އަދަދެއްގެ ދަރިވަރުންނަށް، ރާއްޖެތެރޭގައި ހުރި ލޯކަލް ޓުއަރިޒަމްގެ މަންޒިލްތަކަށް ޒިޔާރަތްކޮށް، ގެސްޓް ހައުސްތަކާއި ރިސޯޓުތަކުގެ މަސައްކަތު މާހައުލު ތަޖުރިބާކުރުމުގެ ފުރުސަތު މަގުފަހިކޮށްދިނުމެވެ.
މިއަހަރުގެ ލީޑާރސް ޓްރިޕްގައި ޖުމްލަ 14 ދަރިވަރުންނާއި 1 ސީނިއާ ލެކްޗަރަރ ބައިވެރިވާނެއެވެ. ބައިވެރިން ފުރުމަށް ހަމަޖެހިފައިވަނީ 15 ޖުލައި 2019 ވާ ހޯމަ ދުވަހުއެވެ. 6 ދުވަހަށް ދެމިގެންދާ މި ދަތުރުގައި، ބައިވެރިން މަޑުކުރުމަށް ހަމަޖެހިފައިވަނީ ލ.ގަމުގައެވެ.
މިފަހަރުގެ ޓްރިޕްގައި ލ.ގަމުގެ 5 ގެސްޓް ހައުސްގެ އިތުރުން ސިކްސް ސެންސެސް ލާމަށް ދިއުމަށް ވަނީ ހަމަޖެހިފައެވެ. މީގެ އިތުރުން، ސްކޫލް ކުދިންނަށް އަމާޒުކޮށްގެން ހޭލުންތެރިކުރުމުގެ ޕްރޮގްރާމެއް ބޭއްވުމަށް ވަނީ ހަމަޖެހިފައެވެ. އަދި މީގެ އިތުރުންވެސް ގިނަގުނަ ޢިޖްތިމާޢީ ޙަރަކާތްތަކެއް މި ޓްރިޕްގެތެރޭގައި ހިމެނޭނެއެވެ.
”ޝެޓްސް ލީޑާރސް ޓްރިޕް“ މި ސިލްސިލާގެ ދަށުން ދާ ފުރަތަމަ ރަށަކީ ލ.ގަމެވެ.
