ޝެޓްސް ލީޑާސް ޓްރިޕްގެ ހަރަކާތެއްގެ ގޮތުގައި، އިހައްދޫ ސްކޫލްގެ ދަރިވަރުންނަށް ހޭލުންތެރިކުރުމުގެ ޕްރޮގްރާމެއް ބާއްވައިފިއެވެ.
ލާމު އަތޮޅު ގަމުގައި ހުންނަ އިހައްދޫ ސްކޫލުގައި ޝެޓްސް އިން ހޭލުންތެރިކުރުމުގެ ޕްރޮގްރާމެއް ބޭއްވީ 16 ޖުލައި ވީ އަންގާރަ ދުވަހުގައެވެ. އިހައްދޫ ސްކޫލުން ވަނީ ޝެޓްސް އަށް ވަރަށް ހޫނު މަރުހަބާ އެއް ކިޔާފައެވެ. މި ޕްރޮގްރާމްގައި އިހައްދޫ ސްކޫލްގެ ގްރޭޑް 9 އަދި 10 ގެ ބީޓެކް އަދި ޓީޓީ ކިޔަވާ ކުދިންތަކުގެ ތެރެއިން 16 ކުދިން ވަނީ ބައިވެރިވެފައްވެ. މި ޕްރޮގްރާމް ކުރިޔަށް ގެންގޮސްފައިވަނީ ޝެޓްސް ލީޑާސް ޓްރިޕްގައި ބައިވެރިވި ޝެޓްސް ގެ 5 މެންބަރުންގެ އިތުރުން 9 ލީޑަރުންނެވެ.
ޕްރޮގްރާމް ފެށުމުގެ ކުރިން ސްކޫލްގެ ޕްރިންސިޕަލް ވަނީ ޝެޓްސް ލީޑާސް ޓްރިޕްގެ ބައިވެރިންނާއި މުހާތަބުކުރައްވާ ވާހަކަ ދައްކަވާފައެވެ. އެގޮތުން، އިހައްދޫ ސްކޫލާއި، ލާމު އަތޮޅާއި ބެހޭގޮތުން ވަރަށް އަގުހުރި މަޢުލޫމާތު ތަކެއް ވަނީ ދެއްވާފައެވެ.
މި ޕްރޮގްރާމްގެ މައިގަނޑު އަމާޒަކީ ފަތުރުވެރިކަމުގެ ދާއިރާއިން ދިވެހި ރާއްޖޭގައި ހުރި ރަނުގެ ފުރުސަތުތަށް ދަރިވަރުންނަށް ކިޔައިދީ،ދަރިވަރުން މި ދާއިރާއަށް ވަނުމަށް ޝަޢުޤުވެރިކުރުވުމެވެ. އެގޮތުން، ފަތުރުވެރިކަމުގެ ދާއިރާގައި މަސައްކަތް ކުރަމުންދާ އެފް.އެޗް.ޓީ.އެސް ގެ 2 ދަރިވަރުން ކަމުގައިވާ، މުހައްމަދު ހުސައިން އާއި އަލީ އަހުސަން ވަނީ މި 2 ދަރިވަރުންގެ އަމިއްލަ ތަޖުރިބާ ކުދިންނާއި ޙިއްސާ ކޮށްފައެވެ.
އިހައްދޫ ސްކޫލްގައި ކުރިޔަށް ގެންދިޔަ މި ޕްރޮގްރާމަކީ، ޝެޓްސް އިން މި އަހަރު ބޭއްވި މިފަދަ ދެވަނަ ޕްރޮގްރާމެވެ. މީގެ ކުރިން ޝެޓްސް އިން ވަނީ ހިރިޔާ ސްކޫލްގެ އެތިކްސް ކްލަބްގެ ކުދިންނަށް ޙާއްސަ ސެޝަނެއް ނަގައިދީފައެވެ. ޝެޓްސްގެ އެންމެ ބޮޑު އެއް އަމާޒަކީ،ފަތުރުވެރިކަމުގެ ދާއިރާއަށް ޝައުޤުވެރިވާ ކުދިން އިތުރުކުރުމެވެ.
މި ޕްރޮގްރާމް ކާމިޔާބު ކަމާއިއެކު ކުރިޔަށް ގެންގޮސްފައިވަނީ އިހައްދޫ ސްކޫލްގެ މެނޭޖްމެންޓާއި ދަރިވަރުންގެ ފުރިހަމަ އެއްބާރުލުމާއެކުގައިވެ. ވަކިން ޙާއްސަކޮށް، ސްކޫލްގެ ޕްރިންސިޕަލް، މުހައްމަދު ނަޒީލް އާއި ލީޑިންގ ޓީޗަރ ފާތިމަތު ޝިބާނާ ގެ އެއްބާރުލުން ފާހަގަކޮށްލެވެއެވެ. ހަމައެހެންމެ ޝެޓްސް ގެ ހީވާގި އިސްވާރުންގެ މިންނެތް މަސައްކަތް ފާހަގަ ކޮށްލެވެއެވެ.
ލިޔުނީ: އާއިޝަތު ޝަމްލާ
މީޑިއާ ކޯޑިނޭޓަރ، ޝެޓްސް، އެމް.އެން.ޔޫ.އެސް.ޔޫ
