ޝެޓްސް ލީޑާރސް ޓްރިޕްގެ ބައިވެރިން ލ.ގަމުގެ ބައެއް ގެސްޓް ހައުސްތަކަށް ޒިޔާރަތްކޮށްފިއެވެ. ޝެޓްސް އިން ޒިޔާރަތްކޮށްފައިވަނީ ރިވެރީސް ޑައިވިންގް ވިލެޖް އާއި އަމްރާ ޕެލެސް އަށެވެ. 16 ޖުލައި ވީ އަންގާރަ ދުވަހު ކުރިޔަށް ގެންދިޔަ މި ހަރަކާތުގައި ޝެޓްސް ލީޑާރސް ޓްރިޕްގެ 14 ބައިވެރިން ވަނީ ބައިވެރިވެފައެވެ.
ޝެޓްސް ލީޑާރސް ޓްރިޕްގެ ހަރަކާތެއްގެ ގޮތުގައި ގެސްޓް ހައުސްތަކަށް ޒިޔާރަތްކުރުމުގެ އެންމެ ބޮޑު އެއް ބޭނުމަކީ، ލ.ގަމުގައި ލޯކަލް ޓޫރިސަމް ކުރަމުންދާ ގޮތް ބަލައި ދިރާސާ ކުރުމެވެ. ހަމަ އެހެންމެ، މި ހަރަކާތް ވެގެންދިޔައީ ފަތުރުވެރިކަމުގެ ދާއިރާއިން ކިޔަވާ ދަރިވަރުންނަށް ލިބުނު އިތުރު ތަޖުރިބާއަކަށެވެ.
މި ހަރަކާތް ކާމިޔާބު ހަރަކާތަކަށް ވެގެންދިޔައީ ރިވެރީސް އާއި އަމްރާ ޕެލެސް ގެ މެނޭޖްމެންޓްގެ ފުރިހަމަ އެއްބާރުލުމާއެކުގައިވެ. 2 ގެސްޓް ހައުސްއިން ވެސް ވަނީ ބައިވެރިންނަށް ”ޓުއަރ“ އެއްގެ އިތުރުން މަސައްކަތްތަށް ކުރަމުންދާގޮތް ދައްކާލާފައެވެ. އަދި ރިވެރީސް އާއި ގުޅިފައިވާ ޑައިވް ސެންޓަރ ކަމަށްވާ އެމްޕެރަރ މޯލްޑިވްސް ބަލައިލުމުގެ ފުރުސަތުވެސް ބައިވެރިންނަށް ވަނީ ލިބިފައެވެ.
ޝެޓްސް ލީޑާރސް ޓްރިޕްގެ މައިގަނޑު މަޤްޞަދަކީ، ފެކަލްޓީ އޮފް ހޮސްޕިޓަލިޓީ އެންޑް ޓުއަރިސަމް ސްޓަޑީޒްގެ ގިނަ އަދަދެއްގެ ދަރިވަރުންނަށް، ރާއްޖެތެރޭގައި ހުރި ލޯކަލް ޓުއަރިސަމްގެ މަންޒިލްތަކަށް ޒިޔާރަތްކޮށް، ގެސްޓް ހައުސްތަކާއި ރިސޯރްޓުތަކުގެ މަސައްކަތު މާހައުލު ތަޖުރިބާކުރުމުގެ ފުރުސަތު މަގުފަހިކޮށްދިނުމެވެ.
