”އެފް.އެޗް.ޓީ.އެސް ވެލްކަމް ނައިޓް“ އަކީ ޝެޓްސްގެ ފަރާތުން އިންތިޒާމުކޮށްގެން، 2019 ވަނަ އަހަރުގެ ދެވަނަ ޓާމަށް އަލަށް އެފް.އެޗް.ޓީ.އެސް އާއި ގުޅުނު ދަރިވަރުންނަށް މަރުހަބާ ކިޔުމުގެ ގޮތުން ބޭއްވުނު ހަރަކާތެކެވެ. މި ހަރަކާތް ބާއްވާފައިވަނީ 7 އޯގަސްޓުވީ ބުދަ ދުވަހުގެ ރޭގައި، އެފް.އެޗް.ޓީ.އެސް ގެ 3 ވަނަ ފަންގިފިލާގައެވެ.
މި ހަރަކާތް ކުރިޔަށް ގެންދިޔައީ ޝެޓްސްގެ އެކްސްކޯ މެންބަރުންގެ އިތުރުން ޝެޓްސް ލީޑާރސްއެވެ. 34 ދަރިވަރުން ބައިވެރިވި މި ހަރަކާތް ވެގެންދިޔައީ، މުނިފޫހިފިލައި، އަލަށް ގުޅުނު ދަރިވަރުންނަށް ”އައިސް ބްރޭކް“ ވި ހަރަކާތަކަށެވެ.
މުނިފޫހިފިލުވުމަށް ކުޅެވުނު ބައެއް ކުދި ކުޅިވަރުތަކުގެ އިތުރުން، އެފް.އެޗް.ޓީ.އެސް ގައި ކިޔަވަމުންދާ ދަރިވަރުންވަނީ، ކޮލެޖާއި ދޭތެރޭގައި އެ ދަރިވަރުންގެ ހުރި އިހުސާސްތަކާއި ޝުޢޫރުތަށް އަލަށް ގުޅުނު ދަރިވަރުންނަށް ކިޔައިދީފައެވެ. މީގެ އިތުރުން، މިހަރަކާތުގެ ތެރެއިން، ޝެޓްސް އަކީ ކޮބައިކަން ވަނީ ކިޔައިދީފައެވެ. އަދި ޝެޓްސް ލީޑަރސް ގުރޫޕާއި ގުޅެން ބޭނުންވާ ދަރިވަރުންނަށް ވަނީ އެ ފުރުސަތުދެވިފައެވެ.
”އެފް.އެޗް.ޓީ.އެސް ވެލްކަމް ނައިޓް“ ކޮންމެ ޓާމެއްގައިވެސް ބޭއްވުމަށް ވަނީ ހަމަޖެހިފައެވެ.
