”އެފް.އެޗް.ޓީ.އެސް އެގެއިންސްޓް ސިންގަލް ޔޫސް ޕްލާސްޓިކް“ އައު ހަރުފަތަކަށް ޖައްސާލައިފިއެވެ. މި ކެމްޕެއިން އައު ހަރުފަތަކަށް ޖެއްސުމަށްޓަކައި ޝެޓްސް އިން ވަނީ ޕާރލޭ މޯލްޑިވްސް އާއި ގުޅިގެން އެމް.އެން.ޔޫގައި ޚާއްސަ ގޯނިތަކެއް ބަހައްޓައިފައެވެ. ޕާރލޭ އަކީ ޕްލާސްޓިކްގެ ސަބަބުން ތިމާވެއްޓަށް ކުރާ ނޭދެވޭ އަސަރުތައް ނައްތާލައި، ތިމާވެއްޓާ ގުޅި ލާމެހިފައިވާ ނޫ އިޤތިޞާދެއް ގާއިމްކުރުމައްޓަކައި ސަރުކާރުގެ އެކި މުއައްސަސާ ތަކާއި، އެކި ޖަމިއްޔާ ތަކާއި، ސްކޫލް ތަކާއި، ގްލޯބަލް އެމްބެސެޑާރ ނެޓްވޯކް ފަދަ ފަރާތްތަކާ ގުޅިގެން މަސައްކަތް ކުރަމުން އަންނަ ބައެކެވެ.
ޕާރލޭގެ އޭހީ އާއިއެކު، 21 އޮކްޓޯބަރ ވީ ހޯމަދުވަހު މި ގޯނިތަށް ބެހެއްޓިފައިވަނީ އެމް.އެން.ޔޫ ސެންޓްރަލްގެ ދެ ސަރަހައްދެއްގައެވެ. އެއީ، އެފް.އެޗް.ޓީ.އެސް ބެންޗު ސަރަހައްދުގައާއި ކެންޓީން ސަރަހައްދުގައެވެ. މި ގޯނިތަކަކީ، އެއް ފަހަރު ބޭނުން ކޮށްފައި އުކާލެވޭ ޒާތުގެ ޕްލާސްޓިކް އެޅުމަށް ޚާއްޞަ ގޯނިތަކެކެވެ. މިގޮތަށް އެއްކުރާ ޕްލާސްޓިކް ފުޅި ފަދަ ތަކެތި އުކާލުމުގެ ބަދަލުގައި ޕާރލޭ އިން އެ ޕްލާސްޓިކް ”ރީސައިކަލް“ ކުރަނީއެވެ.
ޕާލޭ އިން ގޯނިތަށް ބެހެއްޓުމުގެ ކުރިން ވަނީ ވަރަށް ހާއްސަ ސެޝަނެއް ސީ.އެފް.އެސް އޮޑިޓޯރިއަމްގައި ކުރިޔަށް ގެންގޮސްފައެވެ. އެމް.އެން.ޔޫ ކުދިންނަށް ހުޅުވާލައިގެން ކުރިއަށް ގެންދިޔަ މި ސެޝަނުގައި، ޕްލާސްޓިކް ގެ ސަބަބުން ދުނިޔެއަށް ކުރަމުންދާ ގެއްލުމާއި، ކަނޑުގެ ދިރުންތައް ނެތިގެންދާ ކަމާއި، އަދި މި ނޫންވެސް ޕާރލޭ އިން ކުރަމުން އަންނަ ތަފާތު ދިރާސާތަކާ ބެހޭ މައުލޫމާތު ދީފައިވެއެވެ. ހަމައެއާއެކު، ޕާރލޭ އިން ރާއްޖޭގެ އެކި ކަންކޮޅުތަކުގައި ހިންގާ ޕްރޮގްރާމް ތަކުގެ މައުލޫމާތުވެސް ވަނީ ހިއްސާކޮށްފައެވެ. އެގޮތުން ބަލާއިރު، ސްކޫލް ތަކާއި ގުޅިގެން ދަރިވަރުންނަށް ބާއްވާ ފަރުކޮއެ ޕްރޮގްރާމްތަކާއި، ކައުންސިލް ތަކާއި ގުޅިގެން ޕްލާސްޓިކް ފުޅި އެއްކުރުމުގެ ޕްރޮޖެކްޓްތައް ހިމެނެއެވެ.
މި ސެޝަންގައި ޕްލާސްޓިކް ނައްތާލެވޭނެ ގޮތްތަކަކީ ކޮބައިތޯއާއި ވަކި ވަކި ފަރުދުންނަށް ޕްލާސްޓިކް ބޭނުން ކުރުން މަދުކުރުމަށް ކުރެވިދާނެ ކަންތައްތަކުގެ ވަހަކަ ވަނީ ދެކެވިފައެވެ. އަދި ކުރިޔަށްއޮތް ތާނގައި އެމް.އެން.ޔޫ އާއި އެކު ޕްރޮޖެކްޓެއްގައި މަސައްކަތް ކުރަން އުންމީދު ކުރާ ކަމަށާއި މިއީ ރަނގަޅު ފެށުމެއް ކަމަށް ޕާރލޭ ގެ މެމްބަރު ޝާހީނާ ވިދާޅުވެފައިވެއެވެ.
ޝެޓްސްގެ އަމާޒަކީ މި ކެމްޕެއިން އިތުރަށް ފުޅާކޮށް، މުޅި އެމް.އެން.ޔޫ ގައި ”ސިންގަލް ޔޫސް ޕްލާސްޓިކް“ ބޭނުންކުރާވަރާއި، އުކާލެވޭވަރު މަދުކުރުމެވެ. ކުރިޔަށް އޮތް ތާނގައިވެސް، މި ކެމްޕެއިންގެ ދަށުން ތަފާތު ގިނަ ހަރަކާތް ހިންގުމަށް ވަނީ ހަމަޖެހިފައެވެ.
ލިޔުނީ: ހުސައިން ޒައިދު
ނައިބު ރައީސް (އަމަލީ)، ޝެޓްސް
