ސޮސައިޓީ ފޯރ ހޮސްޕިޓަލިޓީ އެންޑް ޓޫރިޒަމް ސްޓަޑީޒް (ޝެޓްސް) އިން ”އެމް.އެން.ޔޫ.އެސް.ޔޫ ޓްރެޝް ޗެލެންޖް“ ފުރިހަމަކޮށްފިއެވެ. މި ”ޗެލެންޖް“ އަކީ ދުނިޔޭގެ ތިމާވެށީގެ ދުވަހާއި ދުނިޔޭގެ ކަނޑުގެ ދުވަސް ފާހަގަ ކުރުމުގެ ގޮތުން، އެމް.އެން.ޔޫ.އެސް.ޔޫ ގެ އަހުރަ ގޮފިން އިސްނަގައިގެން، 8 ޖޫން 2019 ގައި ފެށި ކަމެކެވެ. މީގެ މައިގަނޑު މަޤްޞަދަކީ، ދަރިވަރުންގެ މެދުގައި ތިމާވެއްޓަށް އޮންނަ ލޯތްބާއި އިޚްތިރާމް އިތުރުކުރުވުމެވެ. ލ.ގަމުގެ ގޮނޑުދޮށުގެ ސަރަހައްދެއް ސާފުކުރުމަށްފަހު، އަހުރައިން ވަނީ އެފް.އެޗް.ޓީ.އެސް ގެ ދަރިވަރުން ތަމްސީލުކުރާ ގޮފި، ޝެޓްސް އަށް މި ”ޗެލެންޖް“ ފުރިހަމަކުރުމަށް ދަޢުވަތުދީފައެވެ.
ޝެޓްސް އިން މި ”ޗެލެންޖް“ ފުރިހަމަ ކޮށްފައިވަނީ 26 އޮކްޓޯބަރ ވީ ހޮނިހިރު ދުވަހު، ވިލިނގިލީގައެވެ. މި ސާފުކުރުމުގައި 9 ޝެޓްސް ލީޑަރުންނާއި 3 ”އެކްސްކޯ“ މެމްބަރުން ވަނީ ބައިވެރިވެފައެވެ. ސާފުކުރުމަށްފަހު އެއްކުރެވުނު ކުނިތަށް ވަނީ ”ސޭވް ދި ބީޗް މޯލްޑިވްސް“ އާއި ހަވާލުކުރެވިފައެވެ. އެއީ ޕްލާސްޓިކު ފަދަ ތަކެތި ”ރިސައިކަލް“ ކުރުމަށް ފޮނުވުމަށެވެ.
ޝެޓްސް އިން ވިލިނގިލީގެ ސަރަހައްދެއް ސާފުކުރުމަށްފަހު ވަނީ ސިއާ އަދި ފެސާ އަށް މި ”ޗެލެންޖު“ ކުރިޔަށް ގެންދިޔުމަށް ދަޢުވަތުދީފައެވެ. ސިއާ އަކީ ފެކަލްޓީ އޮފް އާޓްސްގެ ދަރިވަރުން ތަމްސީލު ކުރާ ގޮތްޕެވެ. އަދި ފެސާ އަކީ ފެކަލްޓީ އޮފް އެޑިޔުކޭޝަންގެ ދަރިވަރުން ތަމްސީލުކުރާ ގޮތްޕެވެ. މިއީ ތިމާވެށި ހިމާޔަތް ކުރުމަށް ސިލްސިލާކޮށް ކުރިޔަށްދާނެ ހަރަކާތެކެވެ.
ލިޔުނީ: ހުސައިން ޒައިދު
ނައިބު ރައީސް (ޢަމަލީ)، ޝެޓްސް
