ޤަޢުމީ ދުވަހުގެ މުނާސަބަތުގައި އެފް.އެޗް.ޓީ.އެސް އާއި އައި.އެޗް.ޖީ ކަނޑޫމާ އެކުވެރިކަމުގެ ވޮލީ މެޗެއްކުޅެފިއެވެ.
ކަނޑޫމާގެ މެނޭޖްމެންޓާއި ޝެޓްސް އިން އިންތިޒާމުކޮށްގެން 29 އޮކްޓޯބަރ ވީ އަންގާރަދުވަހު މި މެޗު ކުޅެފައިވަނީ ކަނޑޫމާ ރިސޯޓުގައި އޮންނަ ވޮލީ ކޯޓުގައެވެ. އެފް.އެޗް.ޓީ.އެސްގެ ވޮލީ ޓީމް ކަނޑޫމާއަށް ދިޔުމަށް ފުރާފައިވަނީ މެންދުރު 13:00ގައެވެ. މި ޓީމަކީ 2019 ވަނައަހަރުގެ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯލް ޓޯރނަމެންޓުގެ ފިރިހެން ޑިވިޛަންގެ ޗެމްޕިއަން ޓީމެވެ.
ކަނޑޫމާއަށްކުރި މިދަތުރުގައި ވޮލީ ޓީމުގެ 9 ކުޅުންތެރިންނާއި 2 ޝެޓްސް އެކްސްކޯ މެމްބަރުންނާއި ލެކްޗަރަރ އެއްގެ އިތުރުން، ހޮޓެލް އޭޝިޔާ، ކަލިނަރީ ޗެލެންޖްގެ ”ޔަންގް ޝެފް“ ކެޓެގަރީގައި ވާދަކުރި އެފް.އެޗް.ޓީ.އެސްގެ 7 ދަރިވަރުން ވަނީ ބައިވެރިވެފައެވެ. ކަނޑޫމާއިންވަނީ މިދަތުރުގެ ބައިވެރިންނަށް ވަރަށް ހޫނު މަރުހަބާއެއް ކިޔާފައެވެ.
މެޗުގެ ކުޅުން ފެށިފައިވަނީ 16:00 ގައެވެ. ފޯރިގަދަ ކުޅުމެއް ފެނިގެން ދިޔަ މިމެޗުގެ ފުރަތަމަ ސެޓު 20-25 ގެ ނަތީޖާއަކުން ކާމިޔާބުކުރީ ކަނޑޫމާއިންނެވެ. އެފް.އެޗް.ޓީ.އެސް އިން ވަނީ ކުޅުން ރަނގަޅުކޮށް، 25-21 ގެ ނަތީޖާއަކުން ދެވަނަ ސެޓު ކާމިޔާބުކޮށްފައެވެ. ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ކަނޑޫމާއިންވަނީ މެޗުގެ 3 ވަނަ ސެޓު 26-24 ގެ ނަތީޖާއަކުން ކާމިޔާބުކޮށްފައެވެ. އަދި 15-25 ގެ ނަތީޖާއަކުން ފަހު ސެޓު ނެގުމާއިއެކު، ކަނޑޫމާއިން ވަނީ މިމެޗު ކާމިޔާބުކޮށްފައެވެ.
މެޗަށްފަހު، އެފް.އެޗް.ޓީ.އެސް ޓީމުގެ ކެޕްޓަން، މުޙައްމަދު ޙުސައިން ބުނި ގޮތުގައި ގިނަ ދުވަސްތަކަކަށްފަހު ޓީމާއިއެކު މެޗެއް ކުޅެން ލިބުމަކީ ލިބުނު ވަރަށް ބޮޑު ހިތްހަމަޖެހުމެކެވެ. ”އަސްލު ވަރަށް އުފާވޭ މިހައި ގިނަ ދުވަސްކޮށްފައި ޓީމާއިއެކު މެޗެއް ކުޅެލެވުނީމަ. މި ފުރުސަތު މަގުފަހުކޮށްދިން ކަމަށްޓަކައި ޝެޓްސް އަށް އަދި ކަނޑޫމާގެ މެނޭޖްމެންޓަށް ވަރަށް ބޮޑަށް ޝުކުރު“ ޓީމުގެ ކެޕްޓަން ބުންޏެވެ.
މެޗުނިމުމަށްފަހު ޝެޓްސް އާއި ކަނޑޫމާގެ މެދުގައި އޮންނަ ގުޅުން ބަދަހި ކުރުމުގެ ގޮތުން ޝެޓްސް އިންވަނީ ޚާއްޞަ ހަދިޔާއެއް ކަނޑޫމާއަށް ދީފައެވެ. ޝެޓްސް ފަރާތުން މި ހަދިޔާ ދިނީ ޓީމުގެ ކެޕްޓަން، މުޙައްމަދު ޙުސައިނެވެ. އަދި ކަނޑޫމާ ފަރާތުން ހަވާލުވީ ހެރީ އެވެ. އެއަށްފަހު ހޮޓެލް އޭޝިޔާ، ކަލިނަރީ ޗެލެންޖްގެ ”ޔަންގް ޝެފް“ ކެޓެގަރީގައި ވާދަކުރި އެފް.އެޗް.ޓީ.އެސްގެ 7 ދަރިވަރުންނަށް ވަނީ ”ވޯލޑް ޝެފް“ ގެ ޕިން ހަވާލު ކުރެވިފައެވެ. އޭގެ ތެރޭގައި އެފް.އެޗް.ޓީ.އެސް ވޮލީ ޓީމުގެ ކުޅުންތެރިޔާ، އަބްސަމް އާދަމްވެސް ހިމެނެއެވެ.
ލިޔުނީ: ޙުސައިން ޒައިދު
ނައިބު ރައީސް(ޢަމަލީ)، ޝެޓްސް
