ބްރިޓިޝް އިން ރާއްޖެއަށް ކަނޑައަޅާފައި ހުންނަ ބްރިޓިޝް އެމްބެސަޑަރ، ކެރޮން ރޮހްސްލާ އާއި ޝެޓްސް އިން ބައްދަލު ކޮށްފިއެވެ.
ޝެޓްސް އިން ބްރިޓިޝް އެމްބެސަޑަރ، ކެރޮން ރޮހްސްލާ އާއި ބައްދަލު ކޮށްފައިވަނީ 26 ނޮވެމްބަރ ވީ އަންގާރަ ދުވަހު، މެރާކީ ކޮފީ ރޯސްޓާސްގައެވެ.
މި ބައްދަލުވުމުގައި މައިގަނޑު ގޮތެއްގައި ބްރިޓިޝް އެމްބެސަޑަރ އާއި ހިއްސާ ކުރެވިފައިވަނީ، 2019 ވަނަ އަހަރުން ފެށިގެން ޝެޓްސް އިން އިސްނަގައިގެން ކުރިއަށް ގެންދާ ”އެފް.އެޗް.ޓީ.އެސް އެގެއިންސްޓް ސިންގަލް ޔޫސް ޕްލާސްޓިކް“ ކެމްޕެއިން އާއި ބެހޭގޮތުންނެވެ. އެގޮތުން މި ކެމްޕެއިން ގެ ދަށުން ޝެޓްސް އިން މިހާތަނަށް އަޅާފައިވާ އެކި ފިޔަވަޅުތަކާއި، ކުރިއަށް ގެންގޮސްފައިވާ ހަރަކާތްތަށް ހިއްސާ ކުރެވި މަޝްވަރާ ކުރެވިފައިވެއެވެ.
އޭގެ އިތުރުން 2020 ވަނަ އަހަރަށް ލަފާކޮށް މި ކެމްޕެއިންގެ ދަށުން ޝެޓްސް އިން ޙާސިލް ކުރަން އަމާޒް ހިފާފައިވާ އެކި އެކި ލަނޑު ދަނޑިތަކާއި ގުޅޭގޮތުން ވާހަކަ ދެކެވުނެވެ. އެގޮތުން ބްރިޓިޝް އެމްބަސީ އާއި ގުޅިގެން، ތިމާވެއްޓާއި ގުޅުން ހުރި ހަރަކާތްތަކެއް 2020 ވަނަ އަހަރު ކުރިއަށް ގެންދިއުމާއި ގުޅޭގޮތުން ވަނީ ޙިޔާލު ބަދަލު ކުރެވިފައެވެ. އަދި ޝެޓްސް އަށް އެމްބަސީގެ ފަރާތުން ފުރިހަމަ އެއްބާރުލުން ދޭނެ ކަމަށް ކެރޮން ވަނީ މި ބައްދަލުވުމުގައި ވިދާޅުވެފައެވެ.
މި ބައްދަލުވުމުގައި ކެރޮން ވަނީ ޝެޓްސް އިން ޕްލާސްޓިކް އާއި ދެކޮޅަށް ކުރިއަށް ގެންދާ ކެމްޕެއިން އަށް ތަޢުރީފްކޮށް، ޝެޓްސް އިން ކުރަމުން ގެންދާ މަސައްކަތަށް ހިއްވަރު ދެއްވާފައެވެ. އަދި ކެރޮން ވެސް ޕްލާސްޓިކް އާއި ދެކޮޅަށް މަސައްކަތް ކުރައްވާ ކަމާއި، އެމްބަސީ އިން ކްލައިމެޓް ޗޭންޖް އާއި ގުޅުންހުރި ގިނަ ޕްރޮޖެކްޓްތަކެއް ކުރިއަށް އޮތް ދުވަސްތަކުގައި ކުރިއަށް ގެންދަން ހުރިކަން ފާހަގަ ކޮށްފައިވެއެވެ.
ކެރޮން އަކީ ބްރިޓިޝް އިން ރާއްޖެއަށް ކަނޑައަޅާފައިވާ ބްރިޓިޝް އެމްބެސަޑަރ އެވެ. ކެރޮން އެމްބެސަޑަރ ކަމާއި ހަވާލުވެފައި ވަނީ 2019 ވަނަ އަހަރުގެ އޮކްޓޯބަރ މަހުގައެވެ.
ލިޔުނީ: މުހައްމަދު ޙުސެއިން
އެފް.އެޗް.ޓީ.އެސް ގެ ދަރިވަރު.
