ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމް ކޮށްގެން ބާއްވާ 2ވަނަ އަށް އެންމެ ބޮޑު މުބާރާތް ކަމަށްވާ، އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަށް ތައްޔާރުވުމަށް ގިނަ ފެކަލްޓީ ތަކަކުން ފަރިތަކުރަމުން ގެންދާ ވޮލީ ކޯޓް، ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ގެ ވޮލީ ޓީމުގެ ކުޅުންތެރިން ސާފުކޮށްފިއެވެ.
29 ފެބްރުއަރީ ވީ ހޮނިހިރު ދުވަހުގެ ހަވީރު އެފް.އެޗް.ޓީ.އެސް ގެ އަންހެން އަދި ފިރިހެން ވޮލީ ޓީމުގެ ކުޅުންތެރިން ވަނީ މުބާރާތަށް ފަރިތަކުރަމުން ގެންދާ ދަނޑު އެއްކޮށް ސާފު ކޮށްފައެވެ. މި ހަރަކާތުގައި ޖުމްލަ ބައިވެރިވެފައިވަނީ 15 ކުޅުންތެރިންނާއި، ފިރިހެން ޓީމުގެ ކޯޗް، އާރިޒް މުޙައްމަދެވެ. އެފް.އެޗް.ޓީ.އެސް ގެ ފިރިހެން ވޮލީ ޓީމުގެ މިފަހަރުގެ އަމާޒަކީ ތަށި ދިފާޢު ކުރުމެވެ. އަދި އެފް.އެޗް.ޓީ.އެސް ގެ އަންހެން ޓީމު މި އަހަރު ނިކުންނާނީ ޓީމް ގެ ކޯޗް ސުޙާނާ އަޙްމަދުގެ އިރުޝާދުގެ ދަށުން، އައު އުންމީދަކާއި އެކު މުބާރާތުގެ އަންހެން ޑިވިޝަނުގެ ތަށި ފުރަތަމަ ފަހަރަށް ހޯދުމުގެ އަޒުމުގައެވެ.
”އެފް.އެޗް.ޓީ.އެސް އެގެއިންސްޓް ސިންގަލް ޔޫސް ޕްލާސްޓިކް“، މި ޝިއާރުގެ ދަށުން އެފް.އެޗް.ޓީ.އެސް ގައި ޤާއިމް ކޮށްފައިވާ އެމް.އެން.ޔޫ.އެސް.ޔޫ ގެ ގޮފި، ސޮސައިޓީ ފޯ ހޮސްޕިޓަލިޓީ އެންޑް ޓޫރިޒަމް ސްޓަޑީޒް (ޝެޓްސް) އިން 2019 ވަނަ އަހަރު ފެއްޓި މަސައްކަތަކީ ވަރަށް ވެސް ފުރިހަމަ މަސައްކަތެއްކަން އެމް.އެން.ޔޫ.އެސް.ޔޫ ގެ 8 ވަނަ ދައުރުގެ ރައީސް، ޢަލީ ޝަމްޢޫން ވަނީ ފާހަގަ ކުރައްވާފައެވެ. އެފް.އެޗް.ޓީ.އެސް އަކީ ހުރިހާ ގޮތަކުންވެސް ނަމޫނާ ފެކަލްޓީ އެއްކަން ފެކަލްޓީ ގެ ދަރިވަރުން ދަނީ އަބަދުވެސް ސާބިތުކޮށްދެމުންނެވެ. އެގޮތުން އެފް.އެޗް.ޓީ.އެސް ގެ ގޮފި ޝެޓްސްއިން ވަނީ ނިމިދިޔަ ދައުރުގައި ބްރިތިޝް އެމްބެސެޑަރ ގެ އިތުރުން ޕްލާސްޓިކާއި ދެކޮޅަށް މަސައްކަތްކުރާ ގިނަ ފަރާތްތަކަކާއި އެކު ބައްދަލު ކުރައްވާފައެވެ.
ޙަބަރު ލިޔުނީ:
އެފް.އެޗް.ޓީ.އެސް ގެ ދަރިވަރު،
މޫސާ ރަޝްވާން ނަޢީމް.
